اسلام آباد اچ او آئی سی خواتین وزارتی کانفرنس دا آغاز، 57 رکن ریاستاں دے نمائندے شریک

اسلام آباد۔12 جولائی (اے پی پی) اسلامی تعاون دی تنظیم (او آئی سی) دی نویں خواتین وزارتی کانفرنس اتوار کوں اسلام آباد اچ تکنیکی سطح دے اجلاساں دے نال شروع تھی ڳئی، ایں ݙو روزہ کانفرنس اچ تقریباً 190 نمائندے شریک ہن، جنھاں اچ وزراء، اعلیٰ حکومتی افسران تے او آئی سی دے 57 رکن ملکاں دے نمائندے شامل ہن۔ کانفرنس اچ تریمتیں دی سماجی، معاشی تے سیاسی شرکت کوں ودھاوݨ تے رکن ملکاں وچال تعاون کوں مضبوط کرݨ دے طریقیاں تے بحث کیتی ویسی۔ ’’او آئی سی ممالک اچ تریمتیں دی سماجی، معاشی تے سیاسی بااختیار سازی: چیلنجز تے اڳوں ودھݨ دی راہ‘‘ دے موضوع تے منعقد تھیوݨ آلی ایں کانفرنس دا فوکس تریمتیں دی تعلیم، صحت، روزگار، انٹرپرینیورشپ، مالیاتی خدمات، ٹیکنالوجی تے ڈیجیٹل مواقع تائیں رسائی کوں وسعت ݙیوݨ اتے عوامی زندگی اچ انھاں دی مکمل شرکت دی راہ اچ حائل رکاوٹاں کوں دور کرݨ اے۔ افتتاحی ݙینھ تکنیکی ماہرین اتے اعلیٰ افسراں دے تیاری دے سیشنز منعقد تھیندے پئن تانجو سنوار دے ݙینھ تھیوݨ آلے وزرا اجلاس کیتے سفارشات کوں حتمی شکل ݙتی ونڄ سڳے۔ وزیرِاعظم شہباز شریف وزارتی سیشن دا افتتاح کریسن جڈانجو پاکستان آئندہ ݙو سال کیتے مصر توں او آئی سی خواتین وزارتی کانفرنس دی چیئرمین شپ باقاعدہ سنبھال گھنسی۔ کانفرنس توں متعدد اعلیٰ پاکستانی رہنما خطاب کریسن، جنھاں اچ پنجاب دی وزیرِ اعلیٰ مریم نواز شریف، وزیر برائے انفارمیشن ٹیکنالوجی تے ٹیلی کمیونیکیشن شیزہ فاطمہ خواجہ، وزیرِ قانون تے انصاف اعظم نذیر تارڑ تے قومی اسمبلی دیاں اراکین وجیہہ قمر تے صبا صادق شامل ہن۔ او پاکستان دی تریمتیں کوں بااختیار بݨاوݨ دے اقدامات، تعلیم، معاشی شمولیت تے قیادت کوں فروغ ݙیوݨ کیتے کیتے ڳئے اقدامات کوں اجاگر کریسن۔ کانفرنس دا اختتام ’’اسلام آباد اعلامیہ‘‘ دی منظوری دے نال متوقع اے، جئیں اچ رکن ملکاں اچ تریمتیں کوں بااختیار بݨاوݨ اتے انھاں کوں اڳوں ودھاوݨ تے جامع تے پائیدار ترقی کوں فروغ ݙیوݨ کیتے ہک مشترکہ فریم ورک پیش کیتا ویسی۔