آپریشن شعبان اچ 114 خارجی دہشت گرداں دی ہلاکت سکیورٹی فورسز دی اعلیٰ پیشہ ورانہ صلاحیتاں دا ثبوت اے، محسن نقوی

اسلام آباد۔13 جولائی (اے پی پی) وفاقی وزیرِ داخلہ محسن نقوی بلوچستان اچ فتنہ الہندوستان دے دہشت گرداں دے خلاف کامیاب ’’آپریشن شعبان‘‘ تے سکیورٹی فورسز کوں زبردست خراجِ تحسین پیش کیتے، انھاں پاک فوج، ایف سی بلوچستان تے پولیس دے مشترکہ آپریشن اچ ٻئے 5 خوارجیاں دی ہلاکت تے فورسز دی بہادری کوں سلام پیش کیتا۔ ہک بیان اچ محسن نقوی دہشت گرداں دے خلاف مؤثر زمینی تے فضائی کارروائیاں تے سکیورٹی فورسز دی پیشہ ورانہ صلاحیتاں دی تعریف کریندیں ہوئیں آکھیا جو وطنِ عزیز توں فتنہ الہندوستان دے دہشت گرداں دے مکمل خاتمے تائیں جنگ جاری رہسی۔ انھاں آکھیا جو بلوچستان دا امن تباہ کرݨ آلے درندے ہݨ عبرت دا نشان بݨدے پئن، بلوچستان دی دھرتی تے معصوم لوکاں دا خون وہاوݨ آلے کہیں وی رعایت دے مستحق کائنی۔ محسن نقوی آکھیا جو ’’آپریشن شعبان‘‘ تے ٻئے انٹیلی جنس بیسڈ آپریشنز اچ ہݨ تائیں 114 خوارجی دہشت گرداں دی ہلاکت ایں ڳالھ دا واضح ثبوت اے جو اساݙی فورسز انتہائی متحرک، پروفیشنل تے الرٹ ہن۔ انھاں ایں عزم دا اعادہ کیتا جو پوری قوم دہشت گردی دے خلاف ایں جنگ اچ آپݨی سکیورٹی فورسز دے نال کھڑی اے۔