کشمیر دی آزادی تائیں ہر عالمی فورم تے آواز چیندے رہسوں، وفاقی وزیرِ داخلہ دا یومِ شہدائے کشمیر دے موقعے تے سنیھا

اسلام آباد۔13 جولائی (اے پی پی) وفاقی وزیرِ داخلہ محسن نقوی 13 جولائی کوں حق، قربانی تے استقامت دا عظیم ݙینھ قرار ݙیندیں ہوئیں یومِ شہدائے کشمیر تے 1931 دے 22 شہدا کوں سلامِ عقیدت پیش کیتے۔ انھاں آکھیا جو ڈوگرہ راج دے ظلم دے خلاف اذان دے دوران جاناں دا نذرانہ پیش کرݨ آلے شہدا دا عزم اڄ وی کشمیریاں دے حوصلے دی علامت اے۔ وزیرِ داخلہ آپݨے بیان اچ آکھیا جو 13 جولائی 1931 دے شہدا آپݨے لہو نال حق تے صداقت دی جدوجہد کوں نویں سمت ݙتی اے، جیہڑی اڄ وی کشمیری عوام دے حقِ خودارادیت کوں نویں طاقت تے حوصلہ عطا کریندی پئی اے۔ انھاں بھارت دے غیر قانونی زیرِ تسلط وادی دی مخدوش صورتحال تے تشویش دا اظہار کریندیں ہوئیں آکھیا جو بھارت دے غیر قانونی تے غیر آئینی اقدامات نے کشمیر کوں دنیا دی سبھ توں وݙی جیل اچ تبدیل کر ݙتے جتھاں طویل پابندیاں تے گرفتاریاں دے ذریعے بنیادی آزادیاں سلب ہن۔ محسن نقوی عالمی برادری تے انسانی حقوق دے اداریاں تے زور ݙتا جو او بھارت دے غیر قانونی زیرِ تسلط جموں تے کشمیر اچ جاری بھارتی جارحیت تے انسانی حقوق دی سنگین پامالیاں دا فوری نوٹس گھنن۔ انھاں ایں عزم دا اعادہ کیتا جو مسئلہ کشمیر دا پائیدار تے منصفانہ حل صرف اقوامِ متحدہ دی قرارداداں تے کشمیریاں دی امنگاں دے مطابق ممکن اے۔ کشمیر پاکستان دی شہ رگ اے، کشمیری ٻھراواں کوں کہیں موڑ تے کلھا نہ چھڑیسوں تے آزادی تائیں پاکستان ہر عالمی فورم تے انھاں دی مؤثر آواز بݨدا رہسی۔