اسلام تریمتیں دے وقار، حقوق، تعلیم، انصاف تے معاشرے اچ انھاں دے مؤثر کردار کوں تسلیم کیتے، تریمتیں کوں بااختیار بݨاوݨ معاشی ترقی دی ناگزیر شرط اے، وفاقی وزیر اعظم نذیر تارڑ دا او آئی سی دی 9ویں وزارتی کانفرنس توں خطاب

اسلام آباد۔13 جولائی (اے پی پی) وفاقی وزیر برائے قانون تے انصاف تے انسانی حقوق سینیٹر اعظم نذیر تارڑ آکھیا جو تریمتیں کوں بااختیار بݨاوݨ صرف سماجی ضرورت نئی بلکہ معاشی ترقی دی ناگزیر شرط، مؤثر حکمرانی دی ترجیح تے پائیدار ترقی دی بنیادی اساس اے، اسلامی تعاون تنظیم (او آئی سی) اساݙوں ہک منفرد پلیٹ فارم فراہم کریندی اے جتھاں اساں آپݨیاں مشترکہ امنگاں کوں اجتماعی تے مؤثر اقدامات اچ تبدیل کر سڳدن۔ انھاں اے ڳالھیں سنوار کوں او آئی سی دی تریمتیں دی ’’9ویں وزارتی کانفرنس‘‘ توں خطاب کریندیں ہوئیں کیتا۔ کانفرنس اچ چیئرمین سینیٹ سید یوسف رضا گیلانی، وفاقی وزراء، سربراہانِ وفود، بین الاقوامی تنظیموں دے نمائندگان اتے سفارتی کور دے اراکین شرکت کیتی۔ وفاقی وزیر برائے انسانی حقوق اعظم نذیر تارڑ خطاب کریندیں ہوئیں آکھیا جو اسلامی تعاون تنظیم (او آئی سی) دی تریمتیں توں متعلق 9ویں وزارتی کانفرنس دے مندوبین کوں اسلام آباد اچ خوش آمدید آکھݨ باعثِ اعزاز تے مسرت اے۔ انھاں آکھیا جو اڄ اساں اتھاں صرف آپݨے آپݨے رکن ملکاں دے نمائندیاں دی حیثیت نال جمع نئی تھئے بلکہ ہک مشترکہ وژن دے امین بݨ تے اکٹھے تھئن، ہک ایجھے مستقبل کیتے جتھاں ہر تریمت کوں قیادت کرݨ، جدت پیدا کرݨ تے مسلم دنیا دی ترقی تے خوشحالی اچ بھرپور کردار ادا کرݨ دے یکساں مواقع حاصل ہوون۔ انھاں آکھیا جو حکومتِ پاکستان تے پاکستانی عوام ولوں میں تمام معزز وفود دا دلی خیرمقدم کرینداں۔ پاکستان کیتے اے باعثِ فخر اے جو ایں کوں ایں اہم کانفرنس دی میزبانی تے صدارت دا اعزاز حاصل تھئے، اساں ایں ذمہ داری کوں عاجزی، احساسِ ذمہ داری تے ایں پختہ عزم دے نال قبول کریندن جو او آئی سی دے تمام 57 رکن ممالک دی خدمت شراکت داری, شمولیت تے باہمی اتفاقِ رائے دے جذبے دے تحت کریسوں۔ انھاں آکھیا جو اساں آپݨی مشترکہ جدوجہد دے ہک نہایت اہم موڑ تے کھڑے ہن۔ او آئی سی دے مختلف ملکاں اچ تریمتیں معیشتاں کوں مضبوط ٻݨیندی پئن، سائنسی ترقی اچ نمایاں کردار ادا کریندی پئن، اداریاں کوں مستحکم کریندی پئن، کاروباری دنیا دی قیادت کریندی پئن، سرکاری مناصب تے خدمات انجام ݙیندیاں پیاں ہن اتے امن و انسانی ہمدردی دیاں کوششاں اچ بھرپور حصہ ڳھندی پئن۔ انھاں آکھیا جو انھاں دیاں کامیابیاں مضبوط خانداناں، زیادہ باصلاحیت معاشریاں تے خوشحال قوماں دی تشکیل اچ کلیدی کردار ادا کریندیاں پئن جڈانجو اساکوں اے حقیقت وی تسلیم کرݨی پوسی جو اڄ وی لکھاں تریمتیں تے ٻالڑیاں ایجھی رکاوٹوں دا سامنا کریندیاں پیاں ہن جیہڑیاں انھاں دے مواقع محدود کریندن تے انھاں کوں قومی ترقی اچ آپݨی مکمل صلاحیت دے مطابق کردار ادا کرݨ توں روکیندن، اساݙی ذمہ واری صرف اِنھاں حقائق دا اعتراف کرݨ نئی بلکہ اِنھاں حالات کوں تبدیل کرݨ اے۔ انھاں آکھیا جو ایں کانفرنس دا موضوع ’’او آئی سی ممالک اچ خواتین کوں سماجی، معاشی تے سیاسی طور تے بااختیار بݨاوݨ: چیلنجز تے اڳوں ودھݨ دی راہ‘‘ نہایت بروقت، اہم تے مستقبل دی سمت متعین کرݨ آلا اے۔انھاں آکھیا جو او آئی سی اساݙوں ہک منفرد پلیٹ فارم فراہم کریندی اے جتھاں اساں آپݨیاں مشترکہ امنگاں کوں اجتماعی تے مؤثر اقدامات اچ تبدیل کر سڳدن، وفاقی وزیر آکھیا جو پاکستان کیتے تریمتیں کوں بااختیار بݨاوݨ محض ہک پالیسی مقصد نئی بلکہ ہک قومی ترجیح اے جئیں دی بنیاد اساݙے آئین، اساݙیاں اسلامی اقدار تے اساݙے روشن مستقبل دے وژن تے قائم اے، پاکستان دا آئین ہر شہری کوں بلا امتیاز مساوات، وقار تے قانون دے تحت یکساں تحفظ دی ضمانت ݙیندے- انھاں اصولاں دی روشنی اچ تے وزیرِاعظم محمد شہباز شریف دی قیادت اچ پاکستان تریمتیں دے حقوق، مواقع تے قیادت کوں فروغ ݙیوݨ کیتے آپݨے قانونی, پالیسی تے ادارہ جاتی نظام کوں مسلسل مضبوط بݨیندا پئے، وزارتِ انسانی حقوق، صوبائی حکومتوں، پارلیمنٹ، عدلیہ، قانون نافذ کرݨ آلے اداریاں، سول سوسائٹی تے بین الاقوامی شراکت داراں دے نال قریبی تعاون دے ذریعے ایں عزم کوں مؤثر تے عملی اقدامات اچ تبدیل کریندی پئی اے۔ انھاں آکھیا جو قومی صنفی پالیسی فریم ورک 2025 تے وزیرِاعظم ویمن ایمپاورمنٹ پیکیج دی رہنمائی اچ اساں تریمتیں دی قیادت کوں فروغ ݙیندے پئن۔انھاں آکھیا جو اساں آپݨی صدارت دی ذمہ واریاں مکمل دیانت داری، شفافیت تے غیر جانبداری دے نال انجام ݙیسوں، اساں مکالمے کوں فروغ ݙیسوں، اتفاقِ رائے پیدا کریسوں اتے آپسی تعاون کوں ٻیا مضبوط بݨیسوں ۔ انھاں آکھیا جو اسلامی تعاون تنظیم دے جنرل سیکرٹریٹ دا ایں دے مسلسل تعاون تے بھرپور معاونت تے تہہ دل توں شکریہ ادا کرینداں۔ وزیرِاعظم محمد شہباز شریف، نائب وزیرِاعظم تے وزیرِ خارجہ سینیٹر محمد اسحاق ڈار دا انھاں دی انتھک کوششاں، وزارتِ خارجہ دی پوری ٹیم، وزارتِ انسانی حقوق دی ٹیم، ایں کانفرنس دے منتظمین، تمام معزز مہمانوں تے اساݙے تمام شراکت داراں دا وی دلی شکریہ ادا کرینداں جنھاں دی گرانقدر خدمات تے تعاون دے بغیر ایں کانفرنس دا کامیاب انعقاد ممکن نہ ہئی۔ انھاں آکھیا جو میں ہک واری ولا تساں ساریاں کوں پاکستان اچ خوش آمدید آکھینداں اتے اسلامی تعاون تنظیم دی تریمتیں بارے 9ویں وزارتی کانفرنس دی کامیابی کیتے نیک تمناواں دا اظہار کرینداں۔