پاکستان تریمتاں متعلق او آئی سی وزارتی کانفرنس دی صدارت سانبھ ڳھدی

اسلام آباد۔13جولائی(اے پی پی) پاکستان اسلام آباد اچ تریمتاں متعلق نویں او آئی سی وزارتی کانفرنس دی صدارت سانبھ ڳھدی اے۔ نویں او آئی سی وزارتی کانفرنس دے دوران صدارت سنبھالݨ دے بعد وفاقی وزیر قانون، انصاف و انسانی حقوق اعظم نذیر تارڑ آپݨے خطاب اچ آکھیا جو پاکستان ایں صدارت کوں ہک ایجھی ذمہ واری سمجھدے جیڑھی پوری اسلامی دنیا اچ تریمتاں دی زندگیاں کوں بہتر بݨاوݨ کیتے سانجھی خواہشات کوں عملی اقدامات اچ تبدیل کرݨ اچ مدد گار ثابت تھیسی۔وفاقی وزیر قانون آکھیا جو پاکستان تجربیں دے تبادلے کوں ودھارا ݙیسی، عملی تعاون دی حوصلہ افزائی تے تریمتاں کوں با اختیار بݨاوݨ دے سانجھے عزم کوں اڳوں ودھیسی۔ انھاں آکھیا جو پاکستان تریمتاں دے حقوق، موقع تے قیادت کوں اڳوں ودھاوݨ کیتے آپݨے قانونی، پالیسی تے ادارہ جاتی فریم ورک کوں مسلسل تکڑا بݨیندا پئے۔ انھاں آکھیا جو اساں تریمتاں دی قیادت، مالیاتی شعبے اچ انھاں دی شمولیت تے کاروبار کوں وسعت ݙیندے پئن، ڈیجیٹل تفریق کوں ختم کریندے پئن، انصاف تئیں رسائی کوں سوکھا بݨیندے پئن تے کم دیاں جہیں تے محفوظ و مزید ساز گار ماحول پیدا کریندے پئن۔ اعظم نذیر تارڑ آکھیا جو اساݙی اجتماعی کوشش اے یقینی بݨاوݨ اے جو کوئی وی عورت یا چھوہر، غربت تے عدم مساوات پاروں پِچھوں نہ رہ ونڄے۔ ایں موقع تے مصر دی قومی کونسل تریمتاں دی صدر امل عمار آپݨے خطاب اچ وزیرِ قانون، انصاف و انسانی حقوق اعظم نذیر تارڑ کوں تریمتاں متعلق نویں او آئی سی وزارتی کانفرنس دی صدارت سنبھالݨ دی دعوت ݙتی۔