پمز ملک دا ساریاں توں وݙا ریفرل ہسپتال، یومیہ ست توں نو ہزار مریض علاج کیتے آندن، وفاقی وزیر برائے قومی صحت

اسلام آباد۔14جولائی (اے پی پی) وفاقی وزیر برائے قومی صحت سید مصطفیٰ کمال آکھیا اے جو پمز ملک دا ساریاں توں وݙا ریفرل ہسپتال اے جتھاں روزانہ ست توں نو ہزار مریض علاج کیتے آندن ڄݙاں جو مریضاں تے تیمارداراں دی مجموعی تعداد 30 توں 40 ہزار تائیں پڄ ویندی اے۔ منگل کوں جاری بیان اچ وزیرِ صحت آکھیا جو وݙے ہسپتالاں تے ودھدے ہوئے دباؤ پاروں حکومت اسلام آباد اچ 28 بنیادی مراکزِ صحت کوں فعال تے جدید بݨاوݨ تے کام کریندی پئی اے تانجو عام بیماریاں دا علاج مقامی سطح تے ممکن ہووے تے وݙے ہسپتالاں تے بوجھ ڳھٹ کیتا ونڄ سڳے۔ انھاں آکھیا جو پمز اچ پاکستان دے پہلے سرکاری شعبے دے پلسڈ فیلڈ ایبلیشن پروگرام تے پمز کارڈیک سینٹر دے اپ گریڈیشن دے پہلے مرحلے دی تکمیل تے ایمرجنسی ڈیپارٹمنٹ اچ پیشنٹ فیسلیٹیشن اسسٹنٹ سروس دا وی آغاز کر ݙتا ڳئے۔ انھاں ݙسائے جو پمز کارڈیک سینٹر دی توسیع تے 7.2 ارب روپے لاگت آئی ڄݙاں جو ٻئے 90 کروڑ روپے دی سرمایہ کاری نال ایں کوں جدید کارڈیک ٹیکنالوجی نال آراستہ کیتا ڳئے جتھاں مستحق مریضاں کوں مفت علاج فراہم کیتا ویسی۔