وزیرِاعظم دا ڈیجیٹل ادائیگیاں کیتے کیو آر کوڈ استعمال کرݨ آلے فعال مرچنٹس دی تعداد اچ 300 فیصد اضافے تے معاشی ٹیم کوں خراجِ تحسین

اسلام آباد۔14جولائی (اے پی پی) وزیرِاعظم محمد شہباز شریف ڈیجیٹل ادائیگیاں کیتے کیو آر کوڈ استعمال کرݨ آلے فعال مرچنٹس دی تعداد اچ ہک سال دے دوران 300 فیصد اضافے تے معاشی ٹیم کوں خراجِ تحسین پیش کریندیں ہوئیں آکھیا جو معیشت کوں کیش لیس نظام تے منتقل کرݨ نال پائیدار معاشی ترقی تھیسی اتے شفافیت کوں ودھارا ملسی۔ وزیرِاعظم محمد شہباز شریف دی صدارت منگل کوں اتھاں کیش لیس معیشت تے ڈیجیٹل ادائیگیاں دے فروغ تے اجلاس تھیا جئیں اچ وفاقی وزراء احد خان چیمہ، محمد اورنگزیب، عطاء اللہ تارڑ، شزا فاطمہ خواجہ، علی پرویز ملک، وزیرِ مملکت برائے خزانہ بلال اظہر کیانی، گورنر سٹیٹ بینک جمیل احمد، چیئرمین نادرا تے متعلقہ اداریاں دے اعلیٰ افسراں شرکت کیتی۔ وزیرِاعظم آفس دے میڈیا ونگ ولوں جاری بیان دے مطابق وزیرِاعظم گزریل ہک سال دے دوران پاکستان دی معیشت کوں ڈیجیٹل ادائیگیاں تے مبنی کیش لیس معیشت اچ تبدیل کرݨ دی پیشرفت تے معاشی ٹیم دی کارکردگی دی ستائش کیتی۔ انھاں آکھیا جو ملکی معیشت کوں کیش لیس نظام تے منتقل کرݨ نال پائیدار معاشی ترقی تھیسی اتے شفافیت کوں ودھارا ملسی۔ وزیرِاعظم ڈیجیٹل ادائیگیاں کیتے کیو آر کوڈ استعمال کرݨ آلے فعال مرچنٹس دی تعداد اچ ہک سال دے دوران 300 فیصد اضافہ کرݨ تے معاشی ٹیم کوں خراجِ تحسین پیش کیتا۔ انھاں مرچنٹس کوں کیو آر کوڈ دے ذریعے ڈیجیٹل ادائیگیاں ݙو راغب کرݨ کیتے آگاہی مہم مزید مؤثر بݨاوݨ دی ہدایت کیتی۔ وزیرِاعظم آکھیا جو موبائل بینکنگ ایپ استعمال کرݨ آلیاں دی تعداد ہک سال اچ 9 کروڑ 50 لکھ توں ودھ تے 13 کروڑ 70 لکھ تھیوݨ اہم کامیابی اے۔ انھاں ہدایت کیتی جو بینک تے مالیاتی ادارے کیش لیس معیشت دے فروغ اچ بھرپور کردار ادا کرن اتے بیرونِ ملک توں آوݨ آلی ترسیلاتِ زر کوں 100 فیصد ڈیجیٹل بݨایا ونڄے۔ وزیرِاعظم بے نظیر انکم سپورٹ پروگرام دی ادائیگیاں کوں ڈیجیٹل نظام تے منتقل کرݨ دے اقدام کوں شفاف، تیز رفتار تے مستحقین کیتے سہل قرار ݙیندیں ہوئیں سراہیا۔ اجلاس اچ کیش لیس اکانومی کیتے اقدامات دی پیشرفت تے بریفنگ ݙتی ڳئی جئیں دے مطابق جون 2025ء توں جون 2026ء تائیں ڈیجیٹل طریقے نال ادائیگیاں موصول کرݨ آلے مرچنٹس دی تعداد 300 فیصد اضافے نال 20 لکھ، 3 ہزار تھی ڳئی اے۔ بریفنگ اچ ݙسایا ڳیا جو نادرا دیاں 99 فیصد ادائیگیاں ڈیجیٹائز تھی ڳئن اتے کیش ادائیگیاں 71 فیصد توں ڳھٹ تھی تے صرف 1 فیصد تے آ ڳئن۔ وزیرِ اعظم کوں ݙسایا ڳیا جو بینظیر انکم سپورٹ پروگرام دے ہک کروڑ صارفین کوں تمام ادائیگیاں ڈیجیٹل والٹ توں کیتیاں ویندی پئن۔ بریفنگ اچ ݙسایا ڳیا جو ایں ویلھے موبائل بینکنگ ایپ صارفین دی تعداد 13 کروڑ، 70 لکھ اے، جولائی 2025ء توں جون 2026ء دے دوران 11.9 ارب ڈیجیٹل ٹرانزیکشن ریکارڈ کیتیاں ڳئن۔ اجلاس اچ ݙسایا ڳیا جو گزشتہ سال دے دوران ترسیلاتِ زر دی 92 فیصد رقوم ڈیجیٹل طریقے نال موصول تھین، کیش لیس اکانومی دے حوالے نال تھرڈ پارٹی ویلیڈیشن جاری اے اتے حتمی رپورٹ بمع سفارشات نومبر 2026ء اچ پیش کیتی ویسی۔ بریفنگ اچ ݙسایا ڳیا جو پاکستان بینکنگ ایسوسی ایشن ممبر بینکاں کوں ڈیجیٹل ادائیگیاں بشمول راست نظام دے فروغ کیتے اہداف ݙتن۔