وفاقی وزیرِ احسن اقبال دی ایڈمنسٹریٹر یو این ڈی پی نال ملاقات

اقوامِ متحدہ۔14جولائی (اے پی پی) وفاقی وزیرمنصوبہ بندی، ترقی و خصوصی اقدامات پروفیسر احسن اقبال نیویارک اچ اقوامِ متحدہ دے ترقیاتی پروگرام (یو این ڈی پی) دے ایڈمنسٹریٹر الیگزینڈر ڈی کرو نال ملاقات کیتی جیں دوران پاکستان دی ترقیاتی ترجیحات تے پاکستان و یو این ڈی پی وچال پراݨی شراکت داری کوں مزید تکڑا بݨاوݨ دے مختلف پہلوواں تے ڳالھ مہاڑ کیتی ۔ اتھاں وزارتِ منصوبہ بندی، ترقی و اصلاحات ولوں جاری پریس ریلیز موجب ایں موقع تے وفاقی وزیر یو این ڈی پی دے نال پاکستان دی تکڑی شراکت داری دے عزم دا اعادہ کیتا تے قومی ترقیاتی ایجنڈے دی تکمیل اچ ادارے دے مسلسل تعاون دی تعریف کیتی۔انھاں آکھیا جو پاکستان دی ترقیاتی حکمتِ عملی ’’اڑان پاکستان‘‘ پروگرام تے مبنی اے جیں دی بنیاد پنج ترجیحی ستوناں تے رکھی ڳئی اے جنھاں اچ برآمدات، ڈیجیٹلائزیشن، ماحولیات، توانائی تے مساوات شامل ہن۔ پروفیسر احسن اقبال وزارتِ منصوبہ بندی دے نال یو این ڈی پی دے پراݨے تعاون دی تعریف کریندے آکھیا جو ادارے ایس ڈی جی سپورٹ یونٹس دے ذریعے پائیدار ترقیاتی اہداف کوں مقامی سطح تئیں منتقل کرݨ تے 2025 دے ایس ڈی جیز پالیسی ڈائیلاگ فار ایکشن دے انعقاد اچ اہم کردار ادا کیتے۔ ملاقات اچ پاکستان دے ’’ایس ڈی جی پلس پروگرام‘‘ تے وی تفصیلی ڳالھ مہاڑ کیتی ڳئی جیں دا مقصد صوبائی سطح تے زیادہ مؤثر شمولیت تے مقامی اقدامات دے ذریعے پائیدار ترقیاتی اہداف دے نفاذ اچ تیزی گھن آوݨ اے۔ ݙوہیں رہنماواں ایں امر تے اتفاق کیتا جو ایس ڈی جیز دے اہداف کوں مقامی برادریاں تئیں پڄاوݨ کیتے صوبائی سطح تے عملدرآمد دے نظام کوں مزید تکڑا بݨاوݨ ناگزیر اے۔وفاقی وزیر موسمیاتی تبدیلیاں پاروں پاکستان کوں پیش ودھدے خطرات دا ذکر کریندیں 2022 دی تباہ کن چھل دے بعد امدادی تے بحالی دی سرگرمیاں، کلائمیٹ ریزیلینٹ پاکستان کانفرنس دے انعقاد تے ریزیلینٹ ریکوری، ری ہیبیلیٹیشن اینڈ ریکنسٹرکشن فریم ورک (4RF) تے عملدرآمد اچ یو این ڈی پی دے کردار دی تعریف کیتی۔ انھاں گلیشیائی جھیلاں دے پھٹݨ توں آوݨ آلی چھل نال نبٹݨ دے منصوبیں، غربت مکاوݨ، روزگار دے موقع بݨاوݨ تے پاکستان دے آبادیاتی و روزگار متعلق چیلنجز نال نبڑݨ کیتے طویل المدتی موسمیاتی لچک پیدا کرݨ دے شعبیں اچ تعاون مزید ودھاوݨ دی لوڑھ تے زور ݙتا۔ وفاقی وزیر مالی اوکھ دے باوجود پاکستان اچ آپݨی موجودگی برقرار رکھݨ تے یو این ڈی پی دی تعریف کیتی تاں جو انھاں ادارے دی بنیادی فنڈنگ اچ نمایاں کمی تے تشویش دا اظہار کریندیں آکھیا جو اقوامِ متحدہ دے ترقیاتی نظام اچ جاری اصلاحات توں ترقی پذیر ملکاں بالخصوص پاکستان کیتے معاونت اچ ودھارا تھیوݨا چاہیدے نہ جو گھٹکی ۔ انھاں ایں ڳالھ تے زور ݙتا جو یو این ڈی پی دے بنیادی ترقیاتی مینڈیٹ کوں تکڑا رکھیا ونڄے تے ملک دی سطح تے تعاون کوں قومی ترجیحات نال ہم آہنگ رکھیا ونڄے۔وفاقی وزیر ناروے دے ولی عہد جیڑھے یو این ڈی پی دے گڈ وِل ایمبیسیڈر وی ہن، دے آندے دورہِ پاکستان دا خیرمقدم کریندیں امید ظاہر کیتی جو ایں دورے نال پاکستان دی ترقیاتی ترجیحات کوں عالمی سطح تے مزید اڳونہا کرݨ اچ مدد ملسی۔ پروفیسر احسن اقبال وزیرِاعظم پاکستان ولوں الیگزینڈر ڈی کرو کوں پاکستان دے دورے دی دعوت وی ݙتی۔ ملاقات دے چھیکڑ تے ݙوہیں فریقاں پاکستان دے پائیدار ترقیاتی اہداف سانڳے ملک دے اندر تے اقوامِ متحدہ دے ہیڈکوارٹرز دی سطح تے سانجھے تعاون کوں مزید وسعت ݙیوݨ دے عزم دا اعادہ کیتا۔