وفاقی وزیر ڈاکٹر مصدق ملک دا انڈس بلائنڈ ڈولفن دے تحفظ کیتے اجتماعی اقدامات تے زور

اسلام آباد۔14جولائی (اے پی پی) وفاقی وزیرِموسمیاتی تبدیلی و ماحولیاتی ہم آہنگی ڈاکٹر مصدق ملک انڈس بلائنڈ ڈولفن دے تحفظ کیتے اجتماعی اقدامات تے زور ݙیندیں آکھیے جو معدوم تھیندی انڈس ڈولفن کوں وفاقی تے صوبائی حکومتاں رل کراہیں بچائے، انڈس ڈولفن کئی تہذیباں توں وی پراݨی اے، جدید ڈولفن ریسکیو ایمبولینس تقریباً 200 کلومیٹر دے علاقے اچ خدمات سرانجام ݙیسی، ہݨ تئیں 220 پھس ونڄݨ آلیاں انڈس ڈالفنز کوں کامیابی نال ریسکیو کیتا ڳئے، ماحولیاتی تباہی توں بچݨ کیتے اجتماعی اقدامات درکار ہن، ماحولیاتی تباہی دے آبی و جنگلی حیات تے وی سنگین اثرات پَمدے پئن۔اے ڳالھ انہاں اسلام آباد اچ ورلڈ وائلڈ لائف فنڈ دے زیرِ اہتمام انڈس ڈولفن ایمبولینس دی افتتاحی تقریب توں خطاب کریندیں آکھی۔ وفاقی وزیرآکھیا جو انڈس بلائنڈ ڈولفن دریائے سندھ دی قدیم ترین حیات دا حصہ اے جیڑھی وادیِ سندھ دی قدیم تہذیباں توں وی پہلے توں ایں دریا اچ موجود اے۔ انھاں آکھیا جو اے ڈولفن کہیں بیماری یا حادثے پاروں اندھی نئی قدرتی ارتقائی عمل دے تحت ایکو لوکیشن (آواز دیاں لہراں) دے ذریعے رستہ لبھیندی اے تے شکار کریندی اے جیڑجا ایں کوں دریائے سندھ دے ماحول نال مکمل ہم آہنگ بݨیندے۔ انھاں آکھیا جو اے ڈولفن دریا کوں اکھیں نال نی ایں دی آواز کوں سݨ تے آپݨا سفر جاری رکھیندی اے ڄݙاں جو اڄ اصل سوال اے ہے جو کیا انسان ایں دی پکار سݨݨ کیتے تیار اے۔ڈاکٹر مصدق ملک آکھیا جو کجھ ݙھاکیں پہلے تقریباً 1970ء دے دوران انڈس بلائنڈ ڈولفن دی تعداد گھٹ تھی تے تقریباً 12 سو رہ ڳئی ہئی تے ماہرین ایں نسل دے معدوم تھیوݨ دے خدشات دا اظہار کریندے پئے ہن، تاںجو وفاقی حکومت، حکومتِ سندھ، حکومتِ پنجاب، ورلڈ وائلڈ لائف فنڈ تے ٻئے شراکت دار اداریں دی سانجھیاں کوششاں نال ایں نایاب نسل دے تحفظ کیتے مؤثر اقدامات کیتے ڳئے۔ انھاں آکھیا جو اے ریسکیو ایمبولینس قدرتی ورثے دے تحفظ دے قومی عزم دی علامت اے تے مستقبل اچ وی ایجھے مزید عملی منصوبے متعارف کرائے ویسن تان جو دنیا کوں اے پیغام ݙتا ونڄ سڳے جو پاکستان آپݨی قدرتی وراثت، دریائے سندھ، حیاتیاتی تنوع تے ماحول دے تحفظ کیتے سنجیدہ تے پرعزم اے۔ انھاں عوام توں اپیل کیتی جو او قدرت، ماحول تے آپݨی تہذیبی وراثت دے تحفظ کیتے اجتماعی ذمہ واری دا مظاہرہ کرن۔