پائیدار ترقیاتی اہداف گھنݨ کیتے عالمی یکجہتی، موسمیاتی انصاف تے بین الاقوامی مالیاتی نظام اچ اصلاحات ناگزیر ہن، پروفیسر احسن اقبال

نیویارک۔14جولائی (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال پائیدار ترقیاتی اہداف (ایس ڈی جیز) دے حصول کیتے عالمی یکجہتی، موسمیاتی انصاف تے بین الاقوامی مالیاتی نظام اچ اصلاحات دی لوڑھ تے زور ݙیندیں آکھیے جو پاکستان آپݨی قومی تبدیلی دی حکمتِ عملی دے فریم ورک “اڑان پاکستان” دے ذریعے پائیدار ترقی دے اہداف گھنݨ کیتے پرعزم اے تے حکومت دی معاشی اصلاحات ملکی معیشت اچ استحکام تے سرمایہ کاراں دے اعتماد دی بحالی اچ اہم کردار ادا کیتے۔وزارتِ منصوبہ بندی، ترقی و اصلاحات توں جاری پریس ریلیز موجب وفاقی وزیر پروفیسر احسن اقبال اقوامِ متحدہ دے ہیڈکوارٹرز اچ پائیدار ترقی توں متعلق اعلیٰ سطحی سیاسی فورم (HLPF) 2026 دے وزارتی اجلاس اچ پاکستان دا قومی بیان پیش کیتا تے پائیدار ترقی دے اہداف دے حصول کیتے عالمی یکجہتی، موسمیاتی انصاف تے بین الاقوامی مالیاتی نظام اچ اصلاحات دی لوڑھ تے زور ݙتا۔اقتصادی و سماجی کونسل (ECOSOC) دے اعلیٰ سطحی اجلاس توں خطاب کریندیں وفاقی وزیر آکھیا جو 2030ء دے اہداف دے حصول کیتے صرف پنج سال باقی ہن ڄݙاں جو عالمی معیشت کوں درپیش بحراناں، موسمیاتی آفتاں، جغرافیائی سیاسی کشیدگی تے ودھدے قرضیں پائیدار ترقی دے اہداف دے پاسے پیشرفت کوں مدہم کرݙتے۔ انھاں آکھیا جو پاکستان آپݨی قومی تبدیلی دی حکمتِ عملی دے فریم ورک “اڑان پاکستان” دے ذریعے پائیدار ترقی دے اہداف دے حصول کیتے پرعزم اے۔ اے حکمتِ عملی معاشی نمو اچ تیزی، روزگار دے موقع بݨاوݨ، جدید ٹیکنالوجی توں فیدہ ، موسمیاتی لچک، توانائی دے تحفظ تے ایجھی جامع ترقی کوں یقینی بݨاوݨ تے مرکوز اے جیں دے ثمرات معاشرے دے ہر طبقے تئیں پڄن۔ انھاں آکھیا جو گزریل ݙو سال دے دوران حکومت دی معاشی اصلاحات ملکی معیشت اچ استحکام تے سرمایہ کاراں دے اعتماد دی بحالی اچ اہم کردار ادا کیتے۔وفاقی وزیر احسن اقبال آکھیا جو 2022ء تے 2025ء دی تباہ کن چھل ایں امر دی واضح یاد دہانی ہن جو پاکستان موسمیاتی تبدیلی توں ساریں توں ودھ متاثر تھیوݨ آلے ملکاں اچ شامل اے ۔ انھاں آکھیا جو حکومت ماحولیاتی نظام دی بحالی، آبی تحفظ، صاف توانائی دے ودھارے تے موسمیاتی تبدیلی نال ہم آہنگ ترقیاتی منصوبہ بندی تے خصوصی توجہ ݙیندی پئی اے۔ انھاں سندھ طاس معاہدے دا حوالہ ݙیندیں آکھیا جو ہک فریق ولوں ایں معاہدے دی یکطرفہ تے غیرقانونی معطلی پاکستان دے 24 کروڑ عوام دے آبی تحفظ تے ذریعہِ معاش کیتے سنگین خطرہ اے جیڑھا بین الاقوامی معاہدیں دے احترام دے اصولاں دے وی منافی اے۔وفاقی وزیر عالمی برادری تے زور ݙتا جو او بین الاقوامی مالیاتی نظام کوں موجودہ عالمی حقائق نال ہم آہنگ بݨاوے، ترقی پذیر ملکاں کوں رعایتی مالی وسائل تئیں بہتر رسائی ݙیوے، موسمیاتی مالی معاونت متعلق وعدیں کوں پورا کرے تے ایجھے جدید مالیاتی ذرائع متعارف کراوے جیڑھے قدرتی آفتاں توں پہلے ہی ملکاں دی استعداد تے لچک کوں تکڑا بݨا سڳن۔ انھاں ایں عزم دا اعادہ کیتا جو پائیدار ترقی دے اہداف دا حصول مشترکہ عالمی ذمہ واری اے جیں کیتے وقتی، مؤثر تے اجتماعی اقدامات ناگزیر ہن۔