حکومت آزاد، ذمہ دار تے تکڑے پرنٹ میڈیا تے یقین رکھیندی اے، وفاقی وزیرِ اطلاعات عطاء اللہ تارڑ دی سی پی این ای دے وفد نال ڳالھ مہاڑ

اسلام آباد۔14جولائی(اے پی پی)وفاقی وزیرِ اطلاعات و نشریات عطاء اللہ تارڑ آکھیے جو حکومت آزاد، ذمہ دار اتے تکڑے پرنٹ میڈیا تے یقین رکھیندی اے، اخباری صنعت کوں درپیش مسائل دے حل کیتے سارے متعلقہ فریقین نال صلح مشورہ جاری رکھیا ویسی۔ اے ڳالھ انھاں اسلام آباد اچ ملݨ آئے کونسل آف پاکستان نیوز پیپرز ایڈیٹرز (سی پی این ای) دے صدر کاظم خان دی قیادت اچ وفد نال الیندے آکھی۔ ملاقات اچ اخباری صنعت کوں درپیش مسائل، آڈٹ بیورو آف سرکولیشنز (اے بی سی) اچ اصلاحات، نیوز ایجنسیاں دے بجٹ، میڈیا ہاؤسز دے واجبات اتے ڈمی اخبارات سودھا مختلف امور تے ڳالھ کیتی ڳئی۔ وفاقی وزیرِ اطلاعات اتے سی پی این ای دے عہدیداران آڈٹ بیورو آف سرکولیشنز (اے بی سی) دے نظام اچ اصلاحات کرݨ تے اتفاق کیتا۔ وفاقی وزیرِ اطلاعات آکھیا جو اخباری صنعت کوں درپیش مسائل دے حل کیتے متعلقہ فریقاں نال مشاورت جاری رکھی ویسی، اے بی سی دے نظام کوں جدید، مؤثر اتے شفاف بݨاوݨ دی وݙی لوڑھ اے، آڈٹ بیورو آف سرکولیشنز اچ ضروری اصلاحات، میڈیا ہاؤسز دے واجبات دی ادائیگی اتے نیوز ایجنسیاں بارے امور کوں ترجیحی بنیاداں تے اڳوں ودھایا ویسی۔ انھاں آکھیا جو صحافتی اداریاں دے جائز مسائل دے حل کیتے ہر ممکن تعاون کیتا ویسی۔ ایں موقعے تے سی پی این ای دے وفد نویں پرنسپل انفارمیشن آفیسر رئیسہ عادل کوں ذمہ داریاں سنبھالݨ تے مبارکباد ݙیندے آکھیا جو انھاں دی قیادت اچ وزارتِ اطلاعات اتے اخباری صنعت وچال باہمی تعاون ٻیا ودھیس۔ وفد سبکدوش تھیوݨ آلے پرنسپل انفارمیشن آفیسر مبشر حسن دی خدمات کوں وی سراہندے انھاں کیتے نیک تمناواں پچائن۔ ملاقات اچ وفاقی سیکریٹری اطلاعات و نشریات اشفاق احمد خلیل وی موجود ہن۔