اسلام آباد۔15جولائی (اے پی پی) نائب وزیرِاعظم اتے وزیرِ خارجہ سینیٹر محمد اسحاق ڈار نال شنگھائی تعاون تنظیم (ایس سی او) دے سیکرٹری جنرل نورلان یرمیکبایف اتھاں ملاقات کیتی جئیں اچ تنظیم دی ترجیحات، علاقائی تعاون تے آئندہ اجلاساں بارے معاملیاں تے تفصیلی ڳالھ مہاڑ کیتی ڳئی۔ بدھ کوں دفترِ خارجہ دے مطابق ملاقات دے دوران ݙوہیں رہنماواں ایس سی او دے رکن ملکاں وچال اقتصادی تعاون، ٹرانسپورٹ، علاقائی روابط …
نائب وزیرِاعظم سینیٹر محمد اسحاق ڈار نال شنگھائی تعاون تنظیم دے سیکرٹری جنرل دی ملاقات
مزید خبراں
اسلام آباد۔15جولائی (اے پی پی) نائب وزیرِاعظم اتے وزیرِ خارجہ سینیٹر محمد اسحاق ڈار نال شنگھائی تعاون تنظیم (ایس سی او) دے سیکرٹری جنرل نورلان یرمیکبایف اتھاں ملاقات کیتی جئیں اچ تنظیم دی ترجیحات، علاقائی تعاون تے آئندہ اجلاساں بارے معاملیاں تے تفصیلی ڳالھ مہاڑ کیتی ڳئی۔ بدھ کوں دفترِ خارجہ دے مطابق ملاقات دے دوران ݙوہیں رہنماواں ایس سی او دے رکن ملکاں وچال اقتصادی تعاون، ٹرانسپورٹ، علاقائی روابط (کنکٹیویٹی) تے آپسی دلچسپی دے ٻئے شعبیاں اچ تعاون کوں ٻیا ودھاوݨ دے طریقیاں تے تعمیری ڳالھ مہاڑ کیتی۔ فریقین علاقائی تے بین الاقوامی صورتحال تے وی ڳالھ کیتی اتے خطے اچ امن، استحکام تے پائیدار ترقی دے ودھارے کیتے کثیرالجہتی تعاون دی اہمیت تے زور ݙتا۔ ایس سی او دے سیکرٹری جنرل تنظیم دے ذریعے علاقائی امن، استحکام تے تعاون دے ودھارے اچ پاکستان دے تعمیری کردار کوں سراہیا۔ انھاں تنظیم دی فعالیت تے مؤثریت اچ ٻئی چنڳائی کیتے آپݨی تجاویز وی پیش کیتیاں اتے نائب وزیرِاعظم کوں کرغزستان دے دارالحکومت بشکیک اچ تھیوݨ آلے شنگھائی تعاون تنظیم دے وزرائے خارجہ کونسل دے آئندہ اجلاس دی تیاریاں دا ݙسیا۔ ایں موقعے تے نائب وزیرِاعظم سینیٹر محمد اسحاق ڈار شنگھائی تعاون تنظیم دے مقاصد دے حصول کیتے پاکستان دے پختہ عزم دا اعادہ کیتا۔ انھاں آکھیا جو پاکستان ستمبر 2026 اچ ایس سی او دی کونسل آف ہیڈز آف اسٹیٹ دی چیئرمین شپ سنبھالݨ توں پہلے تمام رکن ملکاں دے نال قریبی تعاون جاری رکھیسی۔ انھاں ایں عزم دا وی اظہار کیتا جو پاکستان 2027 اچ ایس سی او سربراہ اجلاس دی میزبانی کیتے مکمل طور تے تیار اے۔
