معیشت استحکام دی راہ تے ویندی پئی اے، ایں سال معاشی ودھارا، کاروباری سرگرمیاں دے ودھارے دا سال تھیسی، وزیرِاعظم شہباز شریف دا ایف بی آر اچ اصلاحات تے جائزہ اجلاس توں خطاب

اسلام آباد۔15جولائی (اے پی پی) وزیرِاعظم محمد شہباز شریف ایں سال کوں معاشی ودھارے تے کاروباری سرگرمیاں دے ودھارے دا سال قرار ݙیندیں ہوئیں آکھیا اے جو ملکی معیشت استحکام دی راہ تے ویندی پئی اے، پیداوار ودھاوݨ تے برآمدات دے ودھارے کیتے کاروباری برادری کوں ہر ممکن سہولیات فراہم کیتی ویسن۔ وزیرِاعظم محمد شہباز شریف دی صدارت بدھ کوں ایف بی آر اصلاحات تے جائزہ اجلاس تھیا جئیں اچ جاری اصلاحات تے ٹیکس نظام اچ چنڳائی تے پیشرفت دا جائزہ گھدا ڳیا۔ وزیرِاعظم آفس دے میڈیا ونگ ولوں جاری بیان دے مطابق وزیرِاعظم اجلاس اچ ڳالھ مہاڑ کریندیں ہوئیں آکھیا جو پاکستان دی معیشت استحکام دی راہ تے ویندی پئی اے، ایں سال معاشی ودھارا تے کاروباری سرگرمیاں دے ودھارے دا سال تھیسی۔ انھاں آکھیا جو کاروباری برادری ملکی معیشت دی ریڑھ دی ہڈی اے، انھاں کوں زیادہ پیداوار تے برآمدات دے ودھارے کیتے ہر ممکن سہولت فراہم کیتی ونڄے۔ وزیرِاعظم ایف بی آر کوں ہدایت کیتی جو کاروباری طبقے دے نال تعاون تے انھاں دے جائز مسائل ترجیحی بنیادوں تے حل کیتے ونڄن۔ انھاں ایف بی آر دے سینئر افسراں کوں ہر ماہ دے پہلے ہفتے اچ کراچی دا دورہ کرݨ دی وی ہدایت کیتی تانجو کاروباری برادری نال براہِ راست رابطہ ہووے اتے انھاں دے مسائل بلاتاخیر حل تھیون۔ وزیرِاعظم آکھیا جو ٹیکس قوانین دی پابندی کرݨ آلی کمپنیاں دی سرکاری سطح تے حوصلہ افزائی تے انھاں دی خدمات دا اعتراف کیتا ویسی، حکومت کا مقصد کاروبار اچ آسانی پیدا کرݨ، سرمایہ کاری تے برآمدات کوں ودھارا ݙیوݨ تے ٹیکس نظام کوں ٻیا شفاف تے آسان بݨاوݨ اے تانجو کاروباری برادری دا اعتماد ودھے۔ اجلاس کوں ایف بی آر دی کارکردگی تے جاری اصلاحات دے نفاذ دے حوالے نال بریفنگ ݙتی ڳئی جئیں دے مطابق شوگر، سیمنٹ، ٹوبیکو، ٹائلز تے فرٹیلائزرز دیاں صنعتاں دی پروڈکشن مانیٹرنگ سسٹم دی تنصیب تھی ڳئی اے، ٹیکسٹائل تے مشروبات دی صنعتاں دی پروڈکشن مانیٹرنگ دے نظام دی تنصیب دا عمل جاری اے، گزشتہ ہک سال دے دوران شوگر انڈسٹری اچ پروڈکشن مانیٹرنگ دے ذریعے 42 بلین روپے دا اضافی ٹیکس کٹھا تھیا، سیمنٹ انڈسٹری اچ گزشتہ ہک سال دے دوران پروڈکشن مانیٹرنگ دے ذریعے 38 بلین روپے دا اضافی ٹیکس وصولی تھئی، گزشتہ ہک سال دے دوران بیوریجز انڈسٹری اچ پروڈکشن مانیٹرنگ دے ذریعے 15 بلین روپے دا اضافی ٹیکس کٹھا تھیا۔ اجلاس اچ وفاقی وزیرِ قانون، انصاف تے انسانی حقوق اعظم نذیر تارڑ، وفاقی وزیرِ اقتصادی امور احد خان چیمہ، وفاقی وزیرِ خزانہ تے محصولات محمد اورنگزیب، وفاقی وزیرِ اطلاعات تے نشریات عطاء اللہ تارڑ، وفاقی وزیرِ انفارمیشن ٹیکنالوجی تے ٹیلی کام شزا فاطمہ، وزیرِ مملکت برائے خزانہ تے ریلوے بلال اظہر کیانی، معاونِ خصوصی برائے وزیرِاعظم ہارون اختر، گورنر سٹیٹ بینک جمیل احمد اتے متعلقہ اعلیٰ سرکاری افسراں شرکت کیتی۔