وزیرِاعظم شہباز شریف دا موسمیاتی تبدیلیاں نال ودھدے خطرات نال نبڑݨ کیتے عالمی تعاون تکڑا بݨاوݨ تے زور

اسلام آباد۔15جولائی (اے پی پی) وزیرِاعظم محمد شہباز شریف موسمیاتی تبدیلیاں پاروں ودھدے خطرات نال نٻڑݨ کیتے اقدامات، صلاحیت تے تعاون کوں تکڑا بݨاوݨ دی ضرورت تے زور ݙتے۔ اقوامِ متحدہ دے انڈر سیکرٹری جنرل برائے انسانی امور تے ایمرجنسی ریلیف کوآرڈینیٹر ٹام فلیچر بدھ کوں اتھاں وزیرِاعظم محمد شہباز شریف نال ملاقات کیتی جئیں اچ نائب وزیرِاعظم تے وزیرِ خارجہ سینیٹر محمد اسحاق ڈار، وزیرِاعظم دے مشیر ڈاکٹر سید توقیر شاہ، چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدر ملک تے ٻئے اعلیٰ حکام وی موجود ہن۔ وزیرِاعظم آفس دے میڈیا ونگ ولوں جاری بیان دے مطابق وزیرِاعظم دنیا بھر اچ پیچیدہ انسانی بحراناں نال نٻڑݨ کیتے اقوامِ متحدہ دے ادارہِ برائے رابطہِ انسانی امور (او سی ایچ اے) ولوں انجام ݙتی ونڄݨ آلیاں گراں قدر خدمات کوں سراہا۔ انھاں بالخصوص 2022ء دے تباہ کن سیلاب دے دوران پاکستان دی معاونت تے او سی ایچ اے دا شکریہ ادا کیتا اتے ملک اچ قدرتی آفات نال نبڑݨ دی صلاحیت کوں تکڑا بݨاوݨ اچ ادارے دے تعاون کوں قابلِ قدر قرار ݙتا۔ وزیرِاعظم آکھیا جو پاکستان دے قومی تے صوبائی اداریاں گزشتہ سالاں دے دوران موسمیاتی تبدیلیاں توں پیدا تھیوݨ آلیاں قدرتی آفات نال نبڑݨ دی آپݨی صلاحیت اچ نمایاں اضافہ کیتے جڈانجو انھاں ایں امر تے زور ݙتا جو موسمیاتی تبدیلیاں پاروں ودھدے خطرات نال مؤثر انداز اچ نبڑݨ کیتے تیاری، مزاحمتی صلاحیت تے تمام سطحوں تے باہمی رابطے تے تعاون کوں ٻیا تکڑا بݨاوݨ دی ضرورت اے۔ ٹام فلیچر ملاقات تے وزیرِاعظم دا شکریہ ادا کریندیں ہوئیں پاکستان تے او سی ایچ اے وچال گزشتہ سالاں توں جاری قریبی تعاون کوں سراہیا۔ انھاں خطے اچ امن تے استحکام دے ودھارے کیتے وزیرِاعظم دی کوششاں کوں وی خراجِ تحسین پیش کیتا اتے آکھیا جو پائیدار امن ای جنگاں توں پیدا تھیوݨ آلے انسانی تے معاشی بحراناں نال مؤثر طور تے نبڑݨ دی بنیاد فراہم کریندے۔ ملاقات دے دوران ٹام فلیچر وزیرِاعظم کوں غزہ دی انسانی صورتحال تے اتھاں امدادی سرگرمیاں دے دوران او سی ایچ اے کوں درپیش مشکلات توں آگاہ کیتا۔ انھاں افغانستان اچ انسانی امداد دی فراہمی کیتے او سی ایچ اے دی کوششاں اچ پاکستان دے مسلسل تعاون کوں وی سراہیا۔ وزیرِاعظم ایں عزم دا اعادہ کیتا جو پاکستان عالمی انسانی تعاون دے ودھارے، قدرتی آفات نال نبڑݨ دی تیاری تے متاثرہ تے کمزور طبقات تائیں امداد دی بروقت فراہمی کیتے اقوامِ متحدہ تے او سی ایچ اے دے نال آپݨا قریبی تعاون جاری رکھیسی۔