سندھ زرعی یونیورسٹی اچ وسَل دی ویلیو ایڈیشن ٹیکنالوجیز تے سیمینار، ماہرین دا دیہاتی معیشت تکڑی بݨاوݨ تے زور

ٹنڈوجام۔15جولائی(اے پی پی) سندھ زرعی یونیورسٹی ٹنڈوجام اچ ماہرین وسَل دی ویلیو ایڈیشن متعلق جدید ٹیکنالوجیز پیش کریندیں کٹائی دے بعد تھیوݨ آلے زیان اچ گھٹکی ، غذائی تحفظ دے ودھارے تے دیہاتی سطح تے روزگار تے کاروباری موقع پیدا کرݨ تے زور ݙتا۔انسٹیٹیوٹ آف فوڈ سائنسز اینڈ ٹیکنالوجی دے اہتمام نال تے سندھ ہائرایجوکیشن کمیشن (SHEC) دے مالی تعاون نال مکمل تھیوݨ آلے تحقیقی منصوبے “اسٹڈی آن دی ویلیو ایڈیشن آف اونین اِن سندھ پروونس آف پاکستان” دے چھیکڑی سیمینار توں خطاب کریندیں سندھ زرعی یونیورسٹی دے وائس چانسلر، میرٹوریس پروفیسر انجینئر ڈاکٹر الطاف علی سیال آکھیا جو زرعی جامعات کوں روایتی تحقیق توں اڳوں ودھدیں زرعی اجناس تے انھاں دیاں ضمنی مصنوعات کوں تجارتی بنیاداں تے قابلِ استعمال مصنوعات اچ بدالݨ آلیاں ٹیکنالوجیز تے توجہ ݙیوݨی چاہیدی اے تانجو کساناں دی آمدݨ اچ ودھارا، روزگار دے نویں موقع تے ملکی معیشت کوں تقویت مل سڳے۔انھاں آکھیا جو خام زرعی پیداوار کوں گھٹ قیمت تے ویچݨ دے بجائے ویلیو ایڈیشن دے ذریعے زیادہ معاشی قدررکھݨ آلیاں مصنوعات تیار کیتیاں ونڄن، جیں نال فصل دی کٹائی دے بعد تھیوݨ آلے زیان اچ نمایاں گھٹکی آسی تے دیہاتی علاقیں اچ گھریلو و کاٹیج انڈسٹریز، خصوصاً تریمتاں ، نینگراں تے چھوٹے کاروباری لوکاں کیتے نویں موقع بݨسن۔ انھاں آکھیا جو جامعات دی ذمہ واری اے جو او کساناں، فوڈ پروسیسرز تے صنعتکاراں کوں جدید ٹیکنالوجی، تکنیکی رہنمائی تے مشاورتی خدمات ݙیون تاں جو زرعی بنیاداں تے صنعتاں کوں ودھارا ݙتا ونڄ سڳے۔تحقیقی منصوبے دی پرنسپل انویسٹی گیٹر تے ایسوسی ایٹ پروفیسر ڈاکٹر تحسین فاطمہ میانو ݙسایا جو منصوبے دا مقصد گھٹ لاڳت تے قابلِ عمل ٹیکنالوجیز تیار کرݨ ہئی تاں جو چھوٹے پیمانے تے کم کرݨ آلے فوڈ پروسیسرز، کساناں دے گروپس تے کاروباری لوک ایں توں فید چاسڳن۔ انھاں آکھیا جو وسَل دی ویلیو ایڈیشن نال نہ صرف کاشتکاراں دی آمدݨ اچ ودھارا تھیسی بلکہ پائیدار زراعت، غذائی تحفظ تے دیہاتی معیشت دے استحکام اچ وی مدد ملسی۔سیمینار دے دوران تحقیقی ٹیم وسل توں تیار کیتی ڳئی مختلف ویلیوایڈڈ مصنوعات، جنھاں اچ وسل پاؤڈر، ڈی ہائیڈریٹڈ وسل رنگز، وسل فلیکس، وسل پیسٹ تے وسل دا اچار شامل ہن، دی نمائش کیتی۔ ایں موقع تے ایجھی جدید پراسیسنگ تے پیکیجنگ ٹیکنالوجیز وی متعارف کرائیاں ڳئیاں جیڑھیاں غذائیت برقرار رکھݨ، مصنوعات دی شیلف لائف ودھاوݨ تے ذخیرہ و ترسیل دے دوران تھیوݨ آلے زیان کوں گھٹ کرݨ اچ معاون ثابت تھیسن۔سیمینار اچ پاکستان ایگریکلچرل ریسرچ کونسل (PARC)، فوڈ اینڈ ایگریکلچر آرگنائزیشن (FAO)،مختلف جامعات، تحقیقی اداریں، سرکاری محکمیں، فوڈ انڈسٹری، زرعی توسیعی اداریں، ترقی پسند کساناں، اساتذہ، محققین تے طلبہ شرکت کیتی۔ شرکاء ایں عزم دا اظہار کیتا جو جامعات تے صنعت دے سانجھے تعاون، تحقیق دے تجارتی استعمال تے کساناں و زرعی صنعتاں دی استعدادِ کار اچ ودھارے دے ذریعے وسل دی ویلیو ایڈیشن ٹیکنالوجیز کوں ملک اچ ودھارا ݙتا ویسی۔