چیئرمین سینیٹ دا آبادی دی منصوبہ بندی، نینگراں دے ترقی دے ودھارے سانڳے اجتماعی اقدامات تے زور

اسلام آباد۔15جولائی (اے پی پی) چیئرمین سینیٹ سید یوسف رضا گیلانی آبادی اچ تکھی رفتارودھارے دے چیلنج نال نبڑݨ تے نینگراں دیاں صلاحیتاں کوں قومی ودھارے دا ذریعہ بݨاوݨ کیتے قومی اتفاقِ رائے دی لوڑھ تے زور ݙتے، پاکستان دا مستقبل نینگراں کوں تعلیم، صحت تے ہنر مندی دے بہتر موقع ݙیوݨ جڑیا ہویا اے ۔ اِے ڳالھ انہاں ورلڈ پاپولیشن ڈے 2026 دی تقریب توں خطاب کریندیں آکھی۔چیئرمین سینیٹ آکھیا جو پاکستان دی ودھدی آبادی ہک چیلنج وی ہے تے ہک موقع وی۔ انھاں آکھیا جو ملک دی 65 فیصد توں ودھ آبادی 30 سال توں گھٹ عمر لوکاں تے مشتمل اے جیڑھی ہک قیمتی ڈیموگرافک ڈیویڈنڈ اے تانجو ایں توں بھرپور فیدہ صرف انسانی وسائل اچ سرمایہ کاری دے ذریعے ہی چاتا ونڄ سڳدے۔سید یوسف رضا گیلانی آکھیا جو آبادی اچ مسلسل ودھارا صحت، تعلیم، روزگار، آبی وسائل تے ماحولیات تے دٻاؤ ودھدا پئے، ایں کیتے آبادی دی منصوبہ بندی کوں قومی معاشی تے ترقیاتی حکمتِ عملی دا لازمی حصہ بݨایا ونڄݨا چاہیدے۔ انھاں خاندانی منصوبہ بندی کوں ماء تے ٻال دی بہتر صحت، غربت اچ کمی تے پائیدار ترقی دے حصول دا اہم ذریعہ قرار ݙتا۔چیئرمین سینیٹ ایں معاملے تے سیاسی جماعتاں وچال اتفاقِ رائے دی لوڑھ تے زور ݙیندیں آکھیا جو پارلیمان ذمہ دارانہ آبادی دی منصوبہ بندی تے مؤثر پارلیمانی نگرانی کیتے قانون سازی تے پالیسی اقدامات دی بھرپور حمایت جاری رکھیسی۔ انھاں سیاسی و مذہبی رہنماواں، سماجی شخصیات تے میڈیا تے زور ݙتا جو او عوامی آگاہی پیدا کرن تے خاندانی منصوبہ بندی متعلق غلط فہمیاں مکاوݨ اچ آپݨا کردار نبھاون کیوں جو اے ہک سانجھی قومی ذمہ واری اے۔چیئرمین سینیٹ وزارتِ قومی صحت، صوبائی حکومتاں، اقوامِ متحدہ دے ادارہِ برائے آبادی (یو این ایف پی اے) تے ترقیاتی شراکت داراں دی خدمات دی تعریف کریندے آکھیے جو سانجھے تعاون تے سانجھیاں کوششاں دے ذریعے پاکستان آپݨی آبادی کوں قومی ودھارا تے خوشحالی دی طاقت اچ تبدیل کرسڳدے۔