سلامتی دے اداریں تے بلاجواز تنقید کہیں صورت قابلِ قبول کائنی، پاکستان دی خود مختاری تے علاقائی سالمیت تے کوئی سمجھوتہ نہ تھیسی، وفاقی وزیرِ دفاعی پیداوار محمد رضا حیات ہراج

اسلام آباد۔15جولائی (اے پی پی) وفاقی وزیرِدفاعی پیداوار بیرسٹر محمد رضا حیات ہراج مولانا فضل الرحمن دے بیان تے تنقید کریندیں آکھیے جو سلامتی دے اداریں تے بلاجواز تنقید کہیں صورت قابلِ قبول کائنی، پاکستان دی خود مختاری تے علاقائی سالمیت تے کوئی سمجھوتہ نہ تھیسی۔ اِے ڳالھ انہاں اتھاں پریس کانفرنس توں خطاب کریندیں آکھی۔انھاں آکھیا جو ملک دیاں علاقائی سرحداں دے تحفظ تے دہشت گردی دے خلاف جنگ اچ پاک فوج دیاں قربانیاں لازوال ہن، فوج دیاں قربانیاں کوں سیاست دی نذر نی کرݨا چاہیدا۔ انھاں آکھیا جو مولانا فضل الرحمن دے بیان توں ٻہوں ݙکھ تھئے، مولانا فضل الرحمن شہدا دی بے حرمتی کیتی، ہک مذہبی رہنما توں غیر ذمہ دارانہ بیان دی توقع کائناں ہئی۔ انھاں آکھیا جو مولانا فضل الرحمن شہدا دے لہو دی بے حرمتی کیتی، ہک عالمِ دین کوں ایجھی ڳالھ زیب نی ݙیندی، انھاں دے بیان توں شہدا دے والدین تے عوام اضطراب دا شکار ہن، انھاں دے بیان را تے موساد دے ایجنڈے کوں تقویت ݙتی، مولانا فضل الرحمن دشمن دے انتشار کھنڈاوݨ دے ایجنڈے کوں اڳوں ودھائے۔وفاقی وزیرآکھیا جو اے ویلھا قوم کوں ھک کرݨ تے افواجِ پاکستان دے نال کھڑݨ دا اے، سلامتی دے اداریں تے بلاجواز تنقید کہیں صورت قابلِ قبول کائنی، پاکستانی قوم شہدا تے انھاں دے وراثاں دی مقروض اے، شہدا اساݙے سر دا تاج تے اساݙا ماݨ ہن۔ انھاں آکھیا جو عزت، غیرت تے جرات اچ پاکستانی قوم دا کوئی ثانی کائنی، پاکستان دی خود مختاری تے علاقائی سالمیت تے کوئی سمجھوتہ نہ تھیسی، محبِ وطن پاکستانی پاک فوج دے رلے کھڑن۔وفاقی وزیرِ دفاعی پیداوار آکھیا جو انھاں قوماں توں حالات پچھو جنھاں دیاں افواج انھاں دیاں سرحداں دا تحفظ نی کرسڳدیاں پیاں۔ انھاں آکھیا جو معرکہِ حق اچ کامیابی تے دنیا افواجِ پاکستان دیاں صلاحیتاں دی معترف اے، افواجِ پاکستان دیاں قربانیاں پاروں اڄ اساݙیاں سرحداں محفوظ ہن۔