سینیٹ دی کمیٹی اطلاعات و نشریات دا اجلاس، حکومت میڈیا ورکرز دے تحفظ، مین اسٹریم میڈیا دے استحکام، ایڈورٹائزمنٹ پالیسی اچ شفافیت کیتے موثر اقدامات کریندی پئی اے، وفاقی وزیرِاطلاعات عطاء اللہ تارڑ دی کمیٹی کوں بریفنگ

اسلام آباد۔15جولائی (اے پی پی) وفاقی وزیرِاطلاعات و نشریات عطاء اللہ تارڑ آکھیے جو حکومت میڈیا ورکرز دے تحفظ، مین اسٹریم میڈیا دے استحکام، ایڈورٹائزمنٹ پالیسی اچ شفافیت کیتے موثر اقدامات کریندی پئی اے، سرکاری اشتہارات کوں میڈیا ملازمین دی فلاح و بہبود نال منسلک کیتا ویندا پئے، ڈیجیٹل میڈیا کوں پرنٹ تے الیکٹرانک میڈیا دی قیمت تے ودھارا نئی ݙتا ونڄ سڳدا، ایڈورٹائزمنٹ پالیسی 2024ء دے تحت ویوز، امپریشنز تے ڈیجیٹل کارکردگی دے ٻئے اشاریں دی آزاد تھرڈ پارٹی دے ذریعے تصدیق دا نظام متعارف کروایا ڳئے ڄݙاں جو اے بی سی تے پریس رجسٹرار دفتر کوں ضم کرتے جدید ادارہ بݨاوݨ تے وی غور کیتا ویندا پئے، الیکٹرانک میڈیا تے پرنٹ میڈیا کوں زیادہ معاونت درکار اے ڄݙاں جو ڈیجیٹل میڈیا ٻہوں وݙی حد تئیں خودکفیل شعبہ اے، پی ٹی وی پہلی واری مالی طور تے مستحکم تھئے، پی ٹی وی سپورٹس ایں ویلھے پاکستان اچ فیفا ورلڈ کپ نشر کرݨ آلا واحد چینل اے۔ اتھاں پارلیمنٹ لاجز اچ سینیٹر سرمد علی دی زیرِ صدارت سینیٹ دی قائمہ کمیٹی اطلاعات و نشریات دے اجلاس اچ بریفنگ ݙیندیں وفاقی وزیرِ اطلاعات آکھیا جو سوشل میڈیا دے حوالے نال 2021ء دی پالیسی اچ توثیقی اقدامات شامل کائناں ہن، ایں پالیسی اچ 2022ء اچ وی ترمیم تھئی۔ اساں 2024ء اچ ایڈورٹائزمنٹ پالیسی کوں مزید بہتر بݨیندیں ہوئیں سوشل میڈیا کیتے واضح گائیڈ لائنز تے طریقہ کار وضع کیتے جنھاں کوں پنجاب حکومت وی اختیار کیتا۔ انھاں آکھیا جو حکومتی اشتہارات اچ ساریں توں وݙا حصہ الیکٹرانک میڈیا کیتے مختص اے اوندے بعد پرنٹ میڈیا تے ول ڈیجیٹل میڈیا دا نمبر آندے۔ انھاں آکھیا جو الیکٹرانک تے پرنٹ میڈیا کوں مالی معاونت دی زیادہ لوڑھ اے ڄݙاں جو ڈیجیٹل میڈیا ملک اچ ٻہوں وݙی حد تئیں خودکفیل فورم اے ایں کیتے اوندے کیتے گھٹ تخصیص رکھی ڳئی اے۔وفاقی وزیر آکھیا جو 2024ء دی پالیسی شفافیت کوں یقینی بݨاوݨ کیتے مرتب کیتی ڳئی اے۔ ایں پالیسی اچ گوگل اینالیٹکس، ویب ٹریفک دے اعداد و شمار، سرونگ رپورٹس تے آزاد تھرڈ پارٹی تصدیقی نظام شامل کیتا ڳئے تاں جو ویوز تے ڈیجیٹل کارکردگی متعلق ٻئے اشاریں دی تصدیق کیتی ونج سڳے۔ انھاں آکھیا جو ایں توں پہلے ٻیاں حکومتاں کول سوشل میڈیا تے ویوز، امپریشنز تے ٻئے ڈیجیٹل پیمانیں دی تصدیق کیتے کوئی موثر نظام موجود کائناں ہئی۔ انھاں آکھیا جو اے ممکن کائنی جو جیں پلیٹ فارم کوں اشتہار ݙتا ویندا پیا ہووے اوہو آپݨے ویوز تے امپریشنز دی تصدیق وی کرے، ایں کیتے 2024ء دی پالیسی اچ تھرڈ پارٹی ویریفکیشن دا نظام متعارف کروایا ڳئے۔ انھاں آکھیا جو ویوز، امپریشنز تے ٻئے ڈیجیٹل اعداد و شمار دی تصدیق متعلقہ پلیٹ فارم دے بجائے ہک آزاد تھرڈ پارٹی ادارہ کریسی تاں جو شفافیت کوں یقینی بݨایا ونڄ سڳے۔انھاں آکھیا جو 2024ء دی سوشل میڈیا پالیسی من و عن پنجاب اچ نافذ کیتی ڳئی اے۔ انھاں آکھیا جو یوٹیوب، میٹا (فیس بک، انسٹا گرام) تے ٹک ٹاک سودھا مختلف ڈیجیٹل پلیٹ فارمز تے حکومتی اشتہارات کیتے ٻہوں محدود اخراجات کیتے ویندن۔ ڈیجیٹل میڈیا کوں مالی معاونت دی لوڑھ کائنی، ایں کیتے اونکوں صرف ضرورت موجب اشتہارات ݙتے ویندن۔ انھاں آکھیا جے کوئی اہم قومی یا بین الاقوامی ایونٹ ہووے تاں اوندی تشہیر کیتے ڈیجیٹل مہم چلائی ویندی اے۔ مثال دے طور تے اڄوکی او آئی سی کانفرنس برائے خواتین دے موقع تے پاکستان دا مثبت تشخص اجاگر کرݨ کیتے ڈیجیٹل مہم چلائی ڳئی۔وزیرِ اطلاعات آکھیا جو الیکٹرانک تے پرنٹ میڈیا کوں زیادہ معاونت درکار اے ڄݙاں جو ڈیجیٹل میڈیا ٻہوں وݙی حد تئیں خودکفیل شعبہ اے۔ حکومت دی ساریں توں وݙی ترجیح میڈیا ملازمین دی فلاح و بہبود اے تان جو الیکٹرانک میڈیا اچ کم کرݨ آلے لوک ڈاؤن سائزنگ دا شکار نہ ہوون تے انھاں کوں کہیں قسم دی اوکھ دا سامݨا نہ کرݨا پووے۔ انھاں آکھیا جو حکومت میڈیا ورکرز دے تحفظ کیتے ہر ممکن اقدامات کریندی پئی اے ڄݙاں جو ملازمین دی سہولت کیتے ہیلتھ کارڈ سودھا ٻئے اقدامات وی کیتے ڳئن۔ انھاں ایں حوالے نال مزید تجویزاں ݙیوݨ دی لوڑھ تے وی زور ݙتا۔وفاقی وزیر آکھیا جو اسلام آباد اچ کہیں وی میڈیا ادارے توں ملازم فارغ کیتا ویندے تاں اونکوں آپݨی ذمہ واری سمجھدن۔ انھاں آکھیا جو صحافی میݙی ذمہ واری ہن تے جیں تئیں ممکن ہوسی انھاں کوں سہارا ݙیوݨ تے انھاں دے مسئلیں دے حل کیتے کردار ادا کریندے رہسن۔ انھاں آکھیا جو سنو نیوز سودھا کجھ میڈیا اداریں اچ ملازمین دی برطرفیاں دے معاملات وی سامݨے آئے، سنو نیوز ولوں ملازمین کوں فارغ کیتے ونڄݨ دے معاملات تے حکومت انھاں دے اشتہارات روک ݙتے ہن۔ انھاں آکھیا جو حکومتی اشتہارات دا مقصد میڈیا اداریں کوں تکڑا بݨاوݨ تے ملازمین دی فلاح و بہبود کوں یقینی بݨاوݨ اے نہ جو ایں دے ذریعے ملازمین کوں برطرف کیتا ونڄے۔ انھاں آکھیا جو ایں معاملے دے بعد سنو نیوز دی انتظامیہ تے متعلقہ ٹیم رابطہ کیتا جیں دے نتیجے اچ ملازمین دے واجبات تے ٻئے بقایا جات ادا کیتے ڳئے ڄݙاں جو ملازمین کوں ول بحال وی کیتا۔ انھاں آکھیا جو ایں طرح اڄ ٹی وی دے واجبات دے معاملے تے وی متعلقہ لوکاں نال رابطہ رہیا، سنو ٹی وی دے بعد اے اڳلا اہم معاملہ ہئی جیں کوں حل کیتا ڳیا تے واجبات دی ادائیگی یقینی بݨائی ڳئی۔ انھاں آکھیا جو پاکستان براڈ کاسٹرز ایسوسی ایشن (پی بی اے) دے نال اے طریقہ کار طے کیتا ڳئے جو حکومت ولوں جݙاں وی واجبات دی ادائیگی کیتی ویسی تاں ایں ڳالھ کوں یقینی بݨایا ویسی جو اے رقم میڈیا اداریں دے ملازمین دے واجبات تے تنخواہواں دی ادائیگی تے خرچ تھیسی۔وفاقی وزیرِ اطلاعات آکھیا جو الیکٹرانک میڈیا اچ کم کرݨ آلے ملازمین دی فلاح و بہبود تے تحفظ کوں یقینی بݨاوݨ ضروری اے۔ انھاں آکھیا جو بدقسمتی نال جے کہیں ٹی وی چینل دا رپورٹر یا کوئی ملازم دورانِ ملازمت انتقال کر ونڄے تاں اکثر اوقات اوندا اہل خانہ اوکھ دا شکار تھیندن۔ انھاں تجویز ݙتی جو قائمہ کمیٹی ولوں سارے ٹی وی چینلز کیتے واضح ہدایات جاری کیتیاں ونڄن جو دورانِ ملازمت کہیں ملازم دے انتقال دی صورت اچ اوندے اہل خانہ کیتے ہک مناسب مالی پیکیج مقرر کیتا ونڄے۔ انھاں آکھیا جو جیڑھے رپورٹر تے میڈیا ورکرز سردی، گرمی، دھپ تے مینھ اچ فیلڈ اچ کم کریندن، خبراں ݙیندن تے جنھاں دی محنت نال میڈیا اداریں دی ریٹنگ تے ساکھ اچ ودھارا تھیندے، انھاں دے انتقال دے بعد انھاں دے خانداناں کوں بے سہارا نئی چھوڑیا ونڄ سڳدا۔ انھاں آکھیا جو میڈیا ملازمین دے اہل خانہ دے تحفظ کیتے ہک موثر نظام بݨاوݨ دی لوڑھ اے۔انھاں الیکٹرانک میڈیا دے کردار تے اہمیت کوں مزید تکڑا کرݨ دی لوڑھ تے زور ݙیندیں آکھیا جو بھانویں جو ڈیجیٹل میڈیا دی مقبولیت تے رسائی اچ تکھے ودھارا تھیندا پئے تے ایں دی طرف حکومتی اشتہارات ودھاوݨ کیتے دٻاؤ وی موجود اے تانجو اے حقیقت اے جو سوشل میڈیا اڄ ساریں توں زیادہ استعمال تھیوݨ آلا پلیٹ فارم بݨ چکے۔ انھاں آکھیا جو 12 سال دے ٻالیں توں گھن تے 70 سال تئیں دے لوک سوشل میڈیا دا استعمال کریندے پئن تے ایں دی رسائی ٻہوں وسیع اے۔ تانجو سوشل میڈیا کوں بنیادی مواد ݙیوݨ آلے ذرائع اڄ وی ٹیلی ویژن تے اخبارات ہن۔ وفاقی وزیر آکھیا جو جے پہلے توں تکھے ودھارا پاوݨ آلے ڈیجیٹل میڈیا کوں مزید سرکاری معاونت ݙتی ویسی تاں اوندا اثر الیکٹرانک اینڈ پرنٹ میڈیا تے پوسی۔عطاء اللہ تارڑ آکھیا جو پرنٹ میڈیا دی اہمیت آپݨی جاہ برقرار اے تے اخبارات ملک اچ صحافتی اقدار دے ودھارے اچ بنیادی کردار ادا کیتن۔ اخبارات اڄ وی معلومات دے معتبر تے ذمہ دار ذرائع ہن۔ انھاں آکھیا جو آل پاکستان نیوز پیپرز سوسائٹی (اے پی این ایس) تے کونسل آف پاکستان نیوز پیپرز ایڈیٹرز (سی پی این ای) نال اڄوکیاں ملاقاتاں اچ یقین ݙیوایا ڳئے جو حکومت پرنٹ میڈیا کوں ہر ممکن معاونت ݙیسی۔ انھاں آکھیا جو اخبارات کنے باقاعدہ ایڈیٹوریل بورڈ، پیشہ ورانہ نظام، ضابطہِ اخلاق تے ذمہ دار ادارتی ڈھانچہ موجود اے جیڑھا انھاں کوں ٻئے پلیٹ فارمز توں ممتاز بݨیندے۔ انھاں آکھیا جو 2024ء دی ایڈورٹائزمنٹ پالیسی دے تحت حکومت دی کوشش اے جو موجودہ اخبارات دے ڈیجیٹل پلیٹ فارمز کوں وی اہمیت ݙتی ونڄے۔ انھاں آکھیا جو عالمی سطح تے تھیوݨ آلے اڄوکے سرویز توں وی ظاہر تھیندے جو پرنٹ میڈیا آپݨی ڈیجیٹل شکل دے نال موثر انداز اچ موجود اے ڄݙاں جو کئی ملکاں اچ شائع تھیوݨ آلے اخبارات دی سرکولیشن اچ وی ودھارا تھئے۔وفاقی وزیر آکھیا جو ملک دے وݙے اخبارات تے صحافتی اداریں صحافت دے ودھارے اچ نمایاں کردار ادا کیتے۔ انھاں آکھیا جو اشتہارات دی تقسیم دا شفاف نظام بݨایا ڳئے تے ایں حوالے نال سارے امور واضح طریقہ کار دے تحت انجام ݙتے ویندے پئن۔ انھاں آکھیا جو ڈیجیٹل معاونت اچ ساریں توں پہلا حق اخبارات دا ہووݨا چاہیدے۔ انھاں آکھیا جو ایڈورٹائزمنٹ پالیسی 2024ء دے تحت حکومت اخبارات دے ڈیجیٹل پلیٹ فارمز دی شمولیت کوں مزید وسعت ݙیسی۔ انھاں آکھیا جو ڈیجیٹل میڈیا کوں پرنٹ تے الیکٹرانک میڈیا دی قیمت تے پروموٹ نئی کیتا ونڄ سڳدا۔ انھاں آکھیا جو غلط معلومات تے کوڑیاں خبراں دے تدارک کیتے معتبر مین اسٹریم میڈیا اڄ وی ناگزیر اے۔وفاقی وزیر کمیٹی کوں ݙسایا جو اخبارات دے ملازمین کیتے امپلی منٹیشن ٹربیونل (آئی ٹی این ای) دے چیئرمین دی تقرری متعلق سارے امور حل کر ڳھدے ڳئن، شفاف تے میرٹ تے مبنی انتخابی عمل دی تکمیل دے بعد وقتی ہی اوندا نوٹیفیکیشن جاری کر ݙتا ویسی۔ انھاں میڈیا ملازمین دی رجسٹریشن کوں ایمپلائیز اولڈ ایج بینیفٹس انسٹیٹیوشن (ای او بی آئی) تے صوبائی سوشل سیکورٹی اداریں دے نال لازمی قرار ݙیوݨ دی تجویز وی پیش کیتی۔ وفاقی وزیرِ اطلاعات مزید آکھیا جو پرنٹ تے الیکٹرانک میڈیا دے ملازمین کیتے لائف انشورنس دی تجویز ہک ہفتے دے اندر تیار کیتی ویسی جیں اچ وفاقی حکومت انشورنس پریمیم اچ آپݨا حصہ پیسی۔قائمہ کمیٹی کوں سیکریٹری اطلاعات و نشریات اشفاق احمد خلیل نیشنل پریس ٹرسٹ (این پی ٹی) دے کردار تے طریقہ کار دے حوالے نال وی بریفنگ ݙتی۔ ایں موقع تے وفاقی وزیر وزارتِ اطلاعات دے حکام کوں ہدایت کیتی جو نیشنل پریس ٹرسٹ دے اثاثیں، مالی معاملات تے آڈٹ رپورٹس دی مکمل تفصیلات حاصل کیتیاں ونڄن ڄݙاں جو میڈیا ورکرز دی فلاح و بہبود کیتے ٹرسٹ دے وسائل کوں بروئے کار گھن آوݨ دے قانونی امکانات دا وی جائزہ ڳھدا ونجے۔ اجلاس اچ علاقائی اخبارات بالخصوص بلوچستان تے ٻئے صوبیں توں شائع تھیوݨ آلے علاقائی اخبارات دے حوالے نال معاملہ وی زیرِ غور آیا جیں تے وفاقی وزیرِ اطلاعات پریس انفارمیشن ڈیپارٹمنٹ (پی آئی ڈی) کوں ہدایت کیتی جو اصل علاقائی اخبارات دی نشاندہی کیتے پی آئی ڈی دی ذیلی کمیٹی تشکیل ݙتی ونڄے تے انھاں دی سرکولیشن دے بارے رپورٹ پیش کیتی ونڄے۔ وفاقی وزیر کمیٹی کوں ݙسایا جو حکومت آڈٹ بیورو آف سرکولیشنز (اے بی سی) کوں پریس رجسٹرار آفس دے نال ضم کرتے ہک جدید ادارہ بݨاوݨ تے غور کریندی پئی اے۔ انھاں آکھیا جو اے بی سی دے نظام کوں جدید تقاضیں نال ہم آہنگ کرݨ، شفافیت اچ ودھارے تے موجودہ میڈیا ضرورتاں موجب بݨاوݨ کیتے ہک مخصوص کمیٹی دے ذریعے اصلاحات دا عمل پہلے ہی شروع کر ݙتا ڳئے۔کمیٹی دے چیئرمین سینیٹر سرمد علی آکھیا جو پرنٹ میڈیا دی اہمیت کوں نظر انداز نئی کیتا ونڄ سڳدا، اخبارات کوں تکڑا بݨاوݨ دی لوڑھ اے۔ انھاں میڈیا لسٹ اچ چنڳائی گھن آوݨ دا وی مطالبہ کیتا۔ کمیٹی ہݨے ہی ریلیز تھیوݨ آلی فلم ”بلھے“ دی سنسر سرٹیفیکیشن دے معاملے تے وی غور کیتا۔ سینیٹر پرویز رشید آکھیا جو تشدد تے جرائم دی عکاسی کرݨ آلی فلم کوں عظیم صوفی بزرگ بلھے شاہ دے ناں توں ریلیز نہ ہووݨا چاہیدا ہئی۔ انھاں مطالبہ کیتا جو ایں ڳالھ دا تعین کیتا ونڄے جو فلم دے ایں عنوان دی منظوری کیوں ݙتی ڳئی۔ انھاں آکھیا جو ایں ڳالھ دی تحقیقات ہووݨی چاہیدی اے جو سینسر بورڈ ایجھی فلم دی منظوری کیویں ݙتی جیں دا ناں ہک تاریخی تے قابلِ احترام شخصیت نال منسوب اے۔پاکستان ٹیلی ویژن کارپوریشن اچ اصلاحات دے حوالے نال بریفنگ ݙیندیں وفاقی وزیرِ اطلاعات آکھیا جو سرکاری نشریاتی ادارہ پہلی واری مالی طور تے مستحکم تھئے۔ انھاں آکھیا جو ایں ویلھے پاکستان اچ فیفا ورلڈ کپ صرف پی ٹی وی سپورٹس نشر کریندا پئے جیڑھا ادارے دی بہتر مالی تے پیشہ ورانہ صلاحیتاں دی عکاسی کریندے۔ وفاقی وزیر کمیٹی کوں ݙسایا جو پی ٹی وی دے مختلف مراکز اچ ایں ویلھے تقریباً 216 ملازمین کنٹریکٹ دی بنیاد تے خدمات انجام ݙیندے پئن۔ انھاں آکھیا جو ادارے دی ضرورتاں موجب کنٹریکٹ تے بھرتیاں کیتیاں ویندن ڄݙاں جو پروگرامنگ دے معیار کوں بہتر بݨاوݨ کیتے نجی ٹی وی چینلز توں تجربہ کار اینکرز کوں وی پی ٹی وی دا حصہ بݨایا ڳئے۔ انھاں آکھیا جو پی ٹی وی دا بورڈ آف ڈائریکٹرز مکمل طور تے بااختیار اے تے سارے اہم فیصلے بورڈ دی منظوری نال کیتے ویندن۔ انھاں آکھیا جو نجی شعبے نال تعلق رکھݨ آلے ممتاز پروفیشنل لوکاں کوں وی بورڈ اچ شامل کیتا ڳئے۔ انھاں مزید آکھیا جو پی ٹی وی گزریل ہک سال دے دوران ملازمین کوں تنخواہواں دی وقتی ادائیگی دا سلسلہ برقرار رکھیے تے کہیں ملازم کوں تنخواہ دی ادائیگی اچ تاخیر دا سامݨا نی کرݨا پیا۔وفاقی سیکریٹری اطلاعات اشفاق احمد خلیل کمیٹی کوں ݙسایا جو گزریل مالی سال دے دوران پی ٹی وی اچ نہ تاں تنخواہواں تے نہ ہی پنشنرز دی ادائیگی اچ کوئی تاخیر تھئی اے۔ انھاں آکھیا جو تقریباً 300 ریٹائرڈ ملازمین بالخصوص بیوہ کوں وقتی ادائیگی کوں یقینی بݨاوݨ کیتے ادارے آپݨے اخراجات اچ کمی کیتی اے۔ سیکریٹری اطلاعات کمیٹی کوں مزید ݙسایا جو پی ٹی وی اڄوکے سال پروگراماں دی تیاری ول شروع کرݨ دا ارادہ رکھیندے۔اجلاس اچ پی ٹی وی تے ریڈیو پاکستان دیاں مختلف عمارتاں توں ریونیو کٹھا کرݨ کیتے اقدامات بارے اچ وی ڳالھ تھئی۔ کمیٹی ایسوسی ایٹڈ پریس آف پاکستان (اے پی پی) تے ریڈیو پاکستان دے ملازمین دے پنشن متعلق مسئلیں دے حل سانڳے کیتے ڳئے اقدامات دیاں رپورٹاں وی منڳیاں ۔ وفاقی سیکریٹری اطلاعات کمیٹی کوں ݙسایا جو گزریل مالی سال دے دوران پاکستان براڈ کاسٹنگ کارپوریشن (ریڈیو پاکستان) کوں تنخواہواں تے پنشن دی مد اچ ساریں توں ودھ رقم ادا کیتی ڳئی۔اجلاس اچ پی ٹی وی کالونی دا معاملہ وی زیرِ غور آئے جیں تے قائمہ کمیٹی آندے اجلاس اچ سی ڈی اے حکام تے متعلقہ فریقین کوں طلب کرڳھدا۔ اجلاس اچ این سی سی آئی اے دے حوالے نال معاملہ وی زیرِ غور آئے جیں تے چیئرمین کمیٹی این سی سی آئی اے کوں کہیں وی اخبار کوں نوٹس جاری کرݨ توں روک ݙتا۔اجلاس اچ ارکانِ سینیٹ سینیٹر عبدالشکور خان، سینیٹر سید وقار مہدی، سینیٹر پرویز رشید (بذریعہ زوم) تے سینیٹر جان محمد شرکت کیتی ڄݙاں جو وفاقی سیکریٹری اطلاعات و نشریات اشفاق احمد خلیل، چیئرپرسن پیمرا، پی آئی او، وزارتِ اطلاعات و نشریات دے سینئر حکام سودھا سی ڈی اے تے ٻئے اداریں دے نمائندے وی موجود ہن۔