زراعت و لائیو سٹاک دا شعبہ ملکی معیشت کیتے ریڑھ دی ہڈی دی حیثیت رکھدے، وزیراعظم محمد شہباز شریف دا لائیو سٹاک دی استعداد بارے قومی سیمینار نال خطاب

اسلام آباد۔15جولائی(اے پی پی)وزیراعظم محمد شہباز شریف زراعت و لائیو سٹاک کوں ملکی معیشت دی چنڳائی کیتے اہم قرار ݙیندے آکھیے جو وفاق ایں سال ہک ہزار ٻئے نویں گریجوایٹس کوں جدید تربیت کیتے چین ٻھجیسی، زراعت و لائیو سٹاک دے شعبے دی استعداد توں مکمل فائدہ نئیں چاتا ویندا پیا، آئی ٹی سودھا جدید ٹیکنالوجی اتے جدت نال زراعت و لائیو سٹاک اچ انقلاب ڳھن آیا ونڄ سڳدے اتے پاکستان ہک سال اچ خوشحال و خود کفیل تھی سڳدے۔ اے ڳالھ انہان اسلام آباد اچ پاکستان اچ لائیو سٹاک دی استعداد بارے قومی سیمینار نال خطاب اچ آکھی۔ وزیراعظم آکھیا جو پاکستان اچ لائیو سٹاک دے ودھارے کیتے کوشاں لائقِ تحسین ہن ٻھل اے ہک لمبا پندھ اے ڄیکوں وفاق اتے صوبیاں رل تے طے کرݨے، اے ویلھا عملی اقدامات دا اے۔ انہاں آکھیا جو پاکستان کھیر دی پیداوار دے لحاظ نال دنیا اچ چوتھے نمبر تے اے ٻھل لیکن ویلیو ایڈیشن نہ تھیوݨ پاروں گوشت و کھیر دی پیداوار دے شعبے دی صلاحیت توں بھرپور فائدہ نئیں چاتا ویندا پئے۔ وزیراعظم آکھیا جو چین پاکستان دا قابلِ اعتماد دوست اے، او ایں شعبے اچ چین دی ترقی ݙیکھ اتے حیران رہ ڳئے۔ انھاں پاکستان اچ زرعی تحقیق دے اداریاں دی کارکردگی تے افسوس کیتے اتے آکھیا جو اے مردہ گھوڑے ٻݨ چکین، انھاں دے حالات ݙیکھ تے دل کڑھدے ٻھل حکومت انھاں دی مکمل ٹرانسفارمیشن کریندی پئی اے۔ زراعت و لائیو سٹاک دے شعبے کوں ترقی ݙے تے ہک سال اچ معیشت کوں بحال کیتا ونج سڳدے۔ وزیراعظم منہ کھر دی بیماری دے حوالے نال اقدامات و ویکسین دی تیاری کیتے ہدایت ݙیندے آکھیا جو وفاق ایں کیتے ضروری فنڈز ݙیسی ٻھل ایکوں پروفیشنلز چلیسن نتاں پی اے آر سی جھیاں حشر تھیسی۔ وزیراعظم آکھیا جو منہ کھر دی بیماری تے قابو پاوݨ تئیں لائیو سٹاک دی برآمدات کوں بہتر نئیں ٻݨایا ونڄ سڳدا۔ وزیراعظم آکھیا جو میرٹ تے نویں گریجویٹس کوں چین ٻھیڄیا ویسی، اساں پہلے وی چین بھیجے ڳئے گریجوایٹس دی تھرڈ پارٹی ویلیڈیشن کرائی اے۔ وزیراعظم آکھیا جو زراعت و لائیو سٹاک اچ جدت گھن آ تے ملک کوں ترقی و خوشحالی تے معیشت کوں بحال کیتا ونج سڳدے، ایویں ہی پاکستان خودکفیل و خوشحال تھی سڳدے۔ ایں توں پہلے وزیراعظم لیپ ٹاپ دے ذریعے گرین کارپوریٹ لائیو سٹاک انیشی ایٹو دے پروگرام دا افتتاح کیتا۔ ایں موقع تے وفاقی وزیر نیشنل فوڈ سکیورٹی و ریسرچ رانا تنویر حسین، کوآرڈینیٹر لائیو سٹاک و غذائی تحفظ احمد عمیر اتے سی ای او گرین کارپوریٹ لائیو سٹاک انیشیٹو بریگیڈئر (ر) احتشام یونس وی خطاب کیتے۔