پاکستان اتے ترکیہ دے تاریخی تعلقات دا ترکہ آندیاں نسلاں تئیں جاری رہݨا چاہیدے، وزیرِ اطلاعات عطاء اللہ تارڑ دا ترکیہ دے یومِ جمہوریت اتے قومی یکجہتی دی ݙاہویں سالگرہ دی تقریب نال خطاب

اسلام آباد۔15جولائی (اے پی پی)وفاقی وزیرِ اطلاعات و نشریات عطاء اللہ تارڑ پاکستان اتے ترکیہ وچال ڳھاٹے تعلقات سانڳے پاکستان دا عزم دوہریندے آکھیے جو ساݙے وݙکیاں دیاں ݙتیاں ڳیاں تاریخی روایات اتے ورثے کوں آوݨ آلیاں نسلاں تئیں جاری رکھݨ ساݙی ذمہ داری اے۔ ترکیہ دے سفارت خانے اچ ترکیہ دے یومِ جمہوریت اتے قومی یکجہتی دی ݙھاہویں سالگرہدی تقریب نال خطاب اچ انہاں آکھیا جو ایں تاریخی موقعے کوں ݙاہ سال مکمل تھی چکین جݙاں ترک قوم جرات، بہادری اتے ثابت قدمی ݙکھیندے ہر قسم دی آزمائش دا ڈٹ تے مقابلہ کیتے، اے ݙسیندے جو جیڑھیاں قوماں آپݨی تقدیر کوں طاقت، خوشحالی تے ودھارے نال جورݨ دا عزم کر گھنن تاں او عظیم کامیابیاں حاصل کر سڳدن، انہاں کوں دنیا دی کوئی طاقت زیر کر سڳدی اے نہ ہی انھاں کوں محکوم ٻݨایا ونج سڳدے۔ انہاں ترکیہ نال یکجہتی کریندے اکھیا جو ساݙے تعلقات تاریخی ہین جیہڑے آندیان نسلاں تک جاری رہسن۔ وفاقی وزیر پاکستان دے قومی ترانے دے ہک مصرعے ”پرچم ستارہ و ہلال، رہبر ترقی و کمال“ دا حوالہ ݙیندے آکھیا جو ایںدا مفہوم اے ہے جو ستارے اتے ہلال آلا پرچم خوشحالی اتے عظمت دی بلندی دی علامت اے۔ انھاں آکھیا جو پاکستان اتے ترکیہ ہک ہی ہلال اتے ہک ہی ستارے دی علامت نال جڑے ہوئن جیہڑا ݙوہیں ممالک دے ودھارے اتے پیشرفت دی نشانی اے۔ وفاقی وزیر آکھیا جو اوکھے ویلھے اچ پاکستان اتے ترکیہ ہمیشہ ہک ٻئے دا بھرپور ساتھ ݙتے۔ انھاں آکھیا جو ݙوہیں ممالک دے عوام وچال ݙھاکیاں دے مضبوط عوامی رابطہ موجود اے جیہڑا مستقبل اچ وی قائم رہسی۔ وفاقی وزیرِ اطلاعات ترکیہ دے صدر رجب طیب ایردوان دی قیادت کوں خراجِ تحسین پیش کریندیں ہوئیں آکھیا جو صدر ایردوان جیویں ترک قوم دی قیادت کیتی اتے ملک کوں معاشی ودھارے دے راہ تے گامزن کیتا، او قابلِ ستائش اے، انہاں ترک جمہوریہ کوں نمایاں طور تے تبدیل کیتے اتے اڄ ترکیہ نہ صرف ہک معاشی ٻھل مضبوط دفاعی طاقت وی ٻݨ چکے، تہوں ترک عوام آپݨی قیادت تے اعتماد رکھدن اتے کہیں وی مشکل دا سامنا کرݨ کیتے تیار رہندن۔ انھاں آکھیا جو عالمی سطح تے جݙاں وی کوئی اہم پیشرفت یا صورتحال سامݨے آئی، پاکستان اتے ترکیہ ہمیشہ ہک ٻئے دا ساتھ ݙتے۔ وفاقی وزیر آکھیا جو شمالی قبرص دے معاملے تے پاکستان ہمیشہ ترکیہ دے موقف دی حمایت کریندا آئے، مسئلہ کشمیر تے  ترکیہ ہمیشہ پاکستان دے موقف دی بھرپور حمایت کیتی اے۔ وفاقی وزیر پاکستان اچ ترکیہ دے سفیر ڈاکٹر عرفان نذیر اوغلو دی تاریخی خدمات کوں خراج تحسین پیش کیتا۔ وفاقی وزیر پاکستانی عوام نال محبت تے یکجہتی دے اظہار تے ترکیہ دی قیادت دا دلی شکریہ ادا کیتا۔