موثر تے عوام دوست نظامِ انصاف کیتے ادارہ جاتی تعاون ناگزیر اے، چیف جسٹس یحییٰ آفریدی

اسلام آباد۔16جولائی (اے پی پی) چیف جسٹس آف پاکستان جسٹس یحییٰ آفریدی موثر عدالتی انتظام، پیشہ ورانہ استعدادِ کار تے عوام کوں بہتر عدالتی خدمات ݙیوݨ کیتے ادارہ جاتی تعاون تے بہترین طریقہ کار دے مسلسل تبادلے کوں ناگزیر قرار ݙیندیں آکھیے جو عدلیہ دا جاری اصلاحاتی ایجنڈا عوام مرکز، ٹیکنالوجی نال ہم آہنگ، شفاف تے موثر نظامِ انصاف دے قیام تے مرکوز اے۔سپریم کورٹ دے شعبہ تعلقاتِ عامہ دے جاری اعلامیہ موجب اے ڳالھ انہاں سپریم کورٹ آزاد جموں و کشمیر دے افسران دے وفد نال ملاقات اچ آکھی جیڑھا ادارہ جاتی استعدادِ کار تے تجربیں دے تبادلے دے پروگرام دے تحت سپریم کورٹ آف پاکستان دے ݙو ݙینھ دے  دورے تے اسلام آباد آیا ہویا اے۔چیف جسٹس یحییٰ آفریدی وفد دا خیرمقدم کیتا تے عدالتی امور اچ سانجھے تعاون، پیشہ ورانہ مہارت اچ ودھارے تے جدید انتظامی طریقیں دے ودھارے دی اہمیت تے زور ݙتا۔ ایں موقع تے وفد کوں سپریم کورٹ آف پاکستان دے جاری اصلاحاتی ایجنڈے، انتظامی تے عدالتی امور تے تفصیلی بریفنگ ݙتی ڳئی۔ وفد کوں ای فائلنگ، ویڈیو لنک دے ذریعے سماعت، ڈیجیٹل کیس مینجمنٹ سسٹم، نیشنل جوڈیشل اینالیٹکس ڈیش بورڈ، پبلک فیسیلیٹیشن سینٹر تے ٻئی ٹیکنالوجی تے مبنی اصلاحات دا وی ݙسایا ڳئے۔وفد سپریم کورٹ آف پاکستان دے پبلک فیسیلیٹیشن سینٹر، سپریم کورٹ میوزیم تے آئی ٹی ڈائریکٹوریٹ دا وی دورہ کیتا تے عدالتی اصلاحات و تکنیکی اقدامات دی تعریف کیتی۔ وفد ڈیجیٹل نقول دے اجراء، کیس مینجمنٹ تے عدالتی ٹیکنالوجی دے ٻئے شعبیں اچ ادارہ جاتی تعاون دی پیشکش کیتی۔ملاقات دے اختتام تے ݙوہیں اداریں سانجھا تعاون، پیشہ ورانہ استعدادِ کار تے بہترین طریقہ کار دے مسلسل تبادلے دے عزم دا اعادہ کریندیں موثر، قابلِ رسائی تے عوام دوست نظامِ انصاف دے ودھارے کیتے مشترکہ کوششاں جاری رکھݨ تےاتفاق کیتا۔