پاکستان معیاری تعلیم، تحقیق تے اختراع اچ سرمایہ کاری دے ذریعے علم تے مبنی معیشت دی بنیاد رکھیندا پئے، وفاقی وزیر پروفیسر احسن اقبال

اسلام آباد۔16جولائی (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو پاکستان معیاری تعلیم، تحقیق تے اختراع اچ سرمایہ کاری دے ذریعے علم تے مبنی معیشت دی بنیاد رکھیندا پئے، حکومت عالمی معیار دے تعلیمی تے تحقیقی اداریں دے نال اشتراک کوں مزید وسعت ݙے تے انسانی وسائل دی ترقی، تحقیق، انوویشن تے پائیدار معاشی نمو کوں ودھارا ݙیوݨ کیتے بھرپور اقدامات جاری رکھیسی تاں جو اڑان پاکستان دے وژن دے تحت پاکستان کوں علم تے مبنی، مسابقتی تے جدید معیشت اچ تبدیل کیتا ونڄ سڳے۔وزارتِ منصوبہ بندی، ترقی و خصوصی اقدامات دی جاری پریس ریلیز موجب پروفیسر احسن اقبال آپݨے دورہ بوسٹن دے دوران ممتاز تعلیمی اداریں، محققین تے جدت نال وابستہ اداریں دے سربراہان نال اعلیٰ سطح دیاں ملاقاتاں کیتیاں۔ ملاقاتاں اچ اعلیٰ تعلیم، موسمیاتی لچک، معاشی ترقی، عوامی پالیسی، تحقیق تے اختراع دے شعبیں اچ پاکستان تے امریکا وچال ادارہ جاتی تعاون کوں ودھارا ݙیوݨ تے تفصیلی ڳالھ مہاڑ کیتی۔ بوسٹن یونیورسٹی اچ احسن اقبال پروفیسر عادل نجم تے تحقیق دے نائب صدر ڈاکٹر کین لچن نال ملاقات کیتی جیں اچ اعلیٰ تعلیم تے تحقیق دے شعبے اچ تعاون دے ودھارے تے پاکستان دے انسانی وسائل دی استعداد ودھاوݨ دے مختلف امکانات دا جائزہ ڳھدا ڳیا۔وفاقی وزیر حکومت دے اہم منصوبے امریکا پاکستان نالج کاریڈور دا ݙسیندے آکھیے ایں منصوبے دے تحت ݙاہ ہزار پاکستانی طلبہ کوں دنیا دی بہترین جامعات توں ڈاکٹریٹ دی تعلیم حاصل کرݨ دے موقع ݙتے ویندے پئن۔ انھاں ہک ایجھے اشتراکی ماڈل دی تجویز پیش کیتی جیں دے تحت پاکستانی محققین پاکستان کوں درپیش اہم ترقیاتی چیلنجز تے امریکی جامعات اچ تحقیق کریسن ڄݙاں جو جامعات تعلیمی اخراجات اچ معاونت ݙیوݨ تے پاکستان سفری و انتظامی خرچے برداشت کرے۔ ایں تجویز دی تعریف کیتی ڳئی تے ݙوہیں پاسوں ایں تے پیش رفت اچ دلچسپی ڳھدی ڳئی ۔ ایں موقع تے احسن اقبال آکھیا جو امریکا دی حقیقی طاقت ایں دیاں جامعات ہن، پاکستان وی معیاری تعلیم، تحقیق تے اختراع اچ سرمایہ کاری دے ذریعے علم تے مبنی معیشت دی بنیاد رکھیندا پئے تے ایں مقصد کیتے دنیا دے ممتاز تعلیمی اداریں دے نال تکڑی شراکت داری ناگزیر اے۔وفاقی وزیر آکھیا جو حکومت ملک اچ اعلیٰ تعلیم تئیں رسائی ودھاوݨ کیتے بھرپور اقدامات کریندی پئی اے۔ انھاں ایں ڳالھ دی وی نشاندہی کیتی جو پاکستان انھاں کجھ ملکاں اچ شامل اے جیڑھے فل برائٹ وظائف دی مشترکہ مالی معاونت کریندن جیں پاروں ٻہوں وݙی تعداد اچ پاکستانی طلبہ امریکا دی جامعات اچ زیرِتعلیم ہن۔ انھاں مصنوعی ذہانت کوں اعلیٰ تعلیم اچ موثر انداز نال شامل کرݨ، نصاب، تدریسی طریقہ کار تے طلبہ دی جانچ دے جدید نظام توں فیدہ چاوݨ دے حوالے نال وی تعاون دی خواہش ظاہر کیتی۔بعد اچ وفاقی وزیر بوسٹن یونیورسٹی دے ادارہ عالمی پائیداری تے عالمی ترقیاتی پالیسی مرکز دا دورہ کیتا جتھاں ڈاکٹر بینجمن سوواکول تے ڈاکٹر ولیم کرنگ نال ملاقات اچ موسمیاتی تبدیلی، پائیدار ترقی تے تحقیقی تعاون دے مختلف پہلواں تے ڳالھ کیتی۔آپݨے دورے دے اختتام تے وفاقی وزیر کیمبرج انوویشن سینٹر تے وینچر کیفے دا وی دورہ کیتا جتھاں انھاں کوں دنیا دے کامیاب ترین انوویشن ایکو سسٹم اچوں ہک تے بریفنگ ݙتی ڳئی۔ احسن اقبال جامعات، صنعت، سرمایہ کاراں تے نویں کاروباری کمپنیاں وچال تکڑے رابطے معاشی ترقی دا اہم ذریعہ قرار ݙیندیں آکھیا جو پاکستان وی ایجھا موثر ایکو سسٹم دا ماحول قائم کرݨ چاہندے جیڑھا تحقیق کوں تجارتی کامیابی، نویں صنعتاں تے روزگار دے موقع اچ بدال سڳے۔