وزیراعظم شہباز شریف ولوں خطے اچ غیر یقینی صورتحال پاروں ہر ممکن چیلنج نال نبڑݨ کیتے مکمل تیاری رکھݨ تے جامع لائحہ عمل بݨاوݨ دی ہدایت

اسلام آباد۔16جولائی (اے پی پی) وزیراعظم محمد شہباز شریف خطے اچ غیر یقینی صورتحال پاروں ہر ممکن چیلنج نال نبڑݨ کیتے مکمل تیاری رکھݨ تے جامع لائحہ عمل بݨاوݨ دی ہدایت کیتی اے۔وزیراعظم دفتردے میڈیا ونگ توں جاری بیان موجب وزیراعظم محمد شہباز شریف دی زیرِ صدارت خطے اچ کشیدگی دے ملکی معیشت تے اثرات دا جائزہ گھنݨ کیتے اجلاس اتھاں منعقد تھیا۔ اجلاس اچ سادگی تے کفایت شعاری دے اقدامات تے رپورٹ پیش کیتی ڳئی۔وزیراعظم اجلاس توں خطاب کریندیں آکھیا جو خطے دی صورتحال اچ غیر یقینی برقرار اے۔ انھاں ہدایت کیتی جو ہر ممکن چیلنج نال نبڑݨ کیتے مکمل تیاری رکھی ونڄے۔ انھاں آکھیا جو گزریل سادگی تے کفایت شعاری مہم اچ عوام بھرپور کردار ادا کیتا جئیں تے دلوں مشکور ہن۔ وزیراعظم پٹرولیم مصنوعات تے توانائی دی بچت دی قومی مہم اچ عوام دے بھرپور تعاون دی تعریف کریندے آکھیا جو اللہ دے فضل و کرم نال ملکی معیشت ایں ویلھے مستحکم اے، لوڑھ پووݨ تے وقتی اقدامات کیتے جامع لائحہ عمل بݨایا ونڄے۔وزیراعظم آکھیا جو وقتی تے موثر حکومتی حکمتِ عملی نال ملک اچ ایندھن دی فراہمی دی صورتحال دا بہترین انداز اچ انتظام کیتا ڳیا، حکومت عام آدمی، موٹر سائیکل سواراں، رکشہ ڈرائیوراں تے ٹرانسپورٹرز کوں تحفظ ݙتا۔ انھاں آکھیا جو حکومت ولوں ݙتی ڳئی سبسڈی دے نتیجے اچ ایندھن دی قیمتاں دے ودھارے دے اثرات کوں موثر انداز اچ کنٹرول کیتا ڳیا۔ انھاں ہدایت کیتی جو صوبائی حکومتاں نال رل تے پٹرولیم مصنوعات دی مصنوعی قلت پیدا کرݨ آلیں دے خلاف سخت کارروائی کیتی ونڄے۔ انھاں آکھیا جو خطے اچ کشیدگی ودھݨ دے منفی اثرات نال ملکی معیشت دے مستقبل اچ متاثر تھیوݨ دا ݙر اے، جیں طرز تے گزریل سادگی مہم اچ عوام بھرپور ساتھ ݙتا ہئی، ایں طرز تے کفایت شعاری کوں قومی سطح تے اپݨاوݨا ہوسی۔وزیراعظم کوں بریفنگ اچ ݙسایا ڳیا جو ملکی ضرورتاں موجب پٹرولیم مصنوعات دے وافر ذخیرے موجود ہن تے مستقبل کیتے ایں دی فراہمی کوں یقینی بݨا ڳھدا ڳئے۔ اجلاس اچ وفاقی وزراء احد خان چیمہ، محمد اورنگزیب، علی پرویز ملک، اویس خان لغاری، وزیرِ مملکت بلال اظہر کیانی، معاونِ خصوصی طارق باجوہ، گورنر سٹیٹ بینک جمیل احمد تے اعلیٰ سرکاری حکام شرکت کیتی۔