نائب وزیراعظم اسحاق ڈار دی چینی وزیرِخارجہ نال ملاقات

شنگھائی۔17جولائی (اے پی پی) نائب وزیراعظم تے وزیرخارجہ سینیٹر محمد اسحاق ڈار شنگھائی اچ ورلڈ آرٹیفیشل انٹیلیجنس کوآپریشن آرگنائزیشن دے قیام دے موقع تے چین دے وزیرِ خارجہ وانگ ای نال ملاقات کیتی۔دفترِ خارجہ موجب نائب وزیراعظم دے رلے وفاقی وزیر انفارمیشن ٹیکنالوجی و ٹیلی کمیونیکیشن شزا فاطمہ خواجہ، وزیراعلیٰ پنجاب دے مشیر مصنوعی ذہانت (اے آئی) و خصوصی اقدامات علی مصطفیٰ ڈار، پاکستان ورچوئل اثاثہ جات ریگولیٹری اتھارٹی دے چیئرمین بلال بن ثاقب، وزارتِ خارجہ دے ایڈیشنل سیکرٹری (ایشیا پیسیفک) ڈاکٹر سید اسد علی گیلانی تے چین اچ پاکستان دے ناظم الامور اعزاز خان وی موجود ہن۔ݙوہیں رہنماواں پاکستان تے چین وچال ݙوطرفہ تعلقات دے وسیع پہلواں دا جائزہ ڳھدا۔ انھاں سانجھی شراکت داری دی مسلسل مضبوطی تے مستقل پیش رفت تے اطمینان دا اظہار کریندیں پاکستان۔چین ہمہ موسمی سٹریٹجک تعاون تے مبنی شراکت داری کوں مزید ودھاوݨ دے آپݨے سانجھے عزم دا اعادہ کیتا۔ݙوہیں فریقاں سی پیک 2.0 دے تحت اعلیٰ معیار دی ترقی کوں اڳوں ودھاوݨ دی اہمیت تے زور ݙتا۔ ایں موقع تے تجارت، سرمایہ کاری، سائنس و ٹیکنالوجی، ڈیجیٹل معیشت تے مصنوعی ذہانت دے شعبیں اچ عملی تعاون تے سانجھے اشتراک کوں مزید ودھارا ݙیوݨ تے اتفاق کیتا ڳیا۔ملاقات دے دوران خطے تے دنیا دی تازہ ترین صورتحال تے وی ڳالھ کیتی ڳئی۔ ݙوہیں ملکاں سانجھی دلچسپی دے امور تے نیڑے رابطہ برقرار رکھݨ تے مسلسل مشاورت جاری رکھݨ دے عزم دا اعادہ کیتا۔ ݙوہیں رہنماواں کثیرالجہتی فورمز تے تعاون جاری رکھݨ دے آپݨے عزم دا وی اعادہ کیتا۔ملاقات پاکستان تے چین وچال سٹریٹجک تعاون کوں مزید تکڑا بݨاوݨ اچ اہم کردار ادا کیتا، نال ہی اے ݙوہیں ملکاں وچال جدت تے مبنی ترقی، ابھردی ہوئی ٹیکنالوجیز تے مصنوعی ذہانت دے شعبیں اچ تعاون کوں ودھارا ݙیوݨ دے مشترکہ عزم دا وی مظہر اے