سکیورٹی فورسز 24 گھنٹے اچ بنوں تے نیڑے علاقیں اچ 24 خوارج کوں جہنم واصل کرݙتے، آئی ایس پی آر

راولپنڈی۔17جولائی (اے پی پی) سکیورٹی فورسز گزریل چووی گھنٹے اچ ضلع بنوں تے نیڑے علاقیں اچ شدید فائرنگ دے تبادلے دے دوران بھارتی پراکسی فتنہ الخوارج نال تعلق رکھݨ آلے 24 خوارج کوں جہنم واصل کرݙتے۔ پاک فوج دے شعبہِ تعلقاتِ عامہ (آئی ایس پی آر) توں جاری بیان موجب ضلع بنوں اچ پولیس تے گاݙیاں دے خلاف دہشت گردی دی کارروائیاں اچ اڄوکے اضافے دے پسِ منظر، جیں اچ ہندوستانی پراکسی فتنہ الخوارج قانون نافذ کرݨ آلے اداریں تے نشوم شہریاں کوں نشانہ بݨایا، سکیورٹی فورسز انھاں گھناؤنے حملیں دے مرتکب لوکاں تے انھاں دے حامیاں دی ڳول کیتے انٹیلی جنس تے مبنی وسیع آپریشن شروع کیتے۔ جیں موجب گزریل چووی گھنٹے اچ ضلع بنوں تے نیڑے علاقیں اچ شدید فائرنگ دے تبادلے دے بعد بھارتی پراکسی فتنہ الخوارج نال تعلق رکھݨ آلے چووی خوارج کوں جہنم واصل کر ݙتا ڳئے۔ہلاک تھیوݨ آلے خوارج دے قبضے توں اسلحہ تے گولہ بارود وی برآمد تھئے، جیڑھے دہشت گردی دیاں ٻہوں سرگرمیاں تے بے گناہ شہریاں دے قتل اچ سرگرم ریہے۔ بیان اچ آکھیا ڳئے جو علاقے اچ کارروائیاں جاری رہسن تے انھاں گھناؤنی تے بزدلانہ کارروائیوں دے مرتکب لوکاں کوں انصاف دی کچاری اچ گھن آیا ویسی۔ پاکستان دی سکیورٹی فورسز تے قانون نافذ کرݨ آلے اداریں ولوں عزمِ استحکام وژن دے تحت انسدادِ دہشت گردی دی مہم پوری رفتار نال جاری رہسی۔