وزیراعظم شہباز شریف دی کاروبار اچ سوکھ کیتے پالیسی اقدامات تے سوکھا کاروبار ایکٹ 2025 دے نفاذ دا عمل تِکھا کرݨ دی ہدایت

اسلام آباد۔17جولائی (اے پی پی) وزیراعظم محمد شہباز شریف مقامی و ٻاہرلی سرمایہ کاری کوں حکومت دی اولین ترجیح قرار ݙیندیں کاروبار اچ سوکھ کیتے حکومت دے پالیسی اقدامات تے سوکھا کاروبار ایکٹ 2025 دے نفاذ دا عمل تکھا کرݨ دی ہدایت کیتی اے۔وزیراعظم محمد شہباز شریف دی صدارت اچ کاروبار اچ سوکھ کیتے اقدامات تے جائزہ اجلاس تھیا جیں اچ وفاقی وزراء اعظم نذیر تارڑ، قیصر احمد شیخ، جام کمال خان، احد خان چیمہ، سید مصطفی کمال، وزیرِ مملکت بلال اظہر کیانی، مشیرِ وزیراعظم محمد علی، معاونِ خصوصی ہارون اختر، اٹارنی جنرل منصور اعوان تے متعلقہ اعلیٰ حکام شرکت کیتی ڄݙاں جو گورنر سٹیٹ بینک جمیل احمد، گلگت بلتستان تے آزاد کشمیر سودھے چارے صوبیں دے چیف سیکریٹریز تے بین الاقوامی شہرت یافتہ شعبے دے ماہرین ویڈیو لنک دے ذریعے شریک تھئے۔وزیراعظم دفتردے میڈیا ونگ توں جاری بیان موجب وزیراعظم اجلاس اچ ہدایت کیتی جو کاروبار اچ سوکھ کیتے حکومت دے پالیسی اقدامات تے سوکھا کاروبار ایکٹ 2025 دے نفاذ کوں تِکھا کیتا ونڄے ۔ انھاں کاروبار اچ سوکھ دے اقدامات دی افادیت تے نفاذ دی جانچ کیتے بین الاقوامی اداریں توں تھرڈ پارٹی ویلیڈیشن یقینی بݨاوݨ دی وی ہدایت کیتی۔ وزیراعظم آکھیا جو پاکستان اچ مقامی و ٻاہرلی سرمایہ کاری دی وسیع استعداد توں بھرپور فیدہ چاوݨ حکومت دیاں اولین ترجیحات اچ شامل اے۔ انھاں کاروبار اچ سوکھ کیتے پالیسی اقدامات دے نفاذ تے جامع رپورٹ بݨا تے وقتی پیش کرݨ دا حکم ݙتا۔وزیراعظم کاروبار اچ سوکھ کیتے قانون و پالیسی سازی تے وزارتِ قانون و انصاف، ایس آئی ایف سی، سرمایہ کاری بورڈ، وزارتِ کامرس، وزارتِ صنعت تے سارے متعلقہ اداریں دیاں کوششاں کوں لائقِ تحسین قرار ݙتا۔ اجلاس کوں اقدامات دے نفاذ تے جائزے تے آندے لائحہ عمل تے بریفنگ ݙتی ڳئی۔ اجلاس کوں ݙسایا ڳیا جو ملک اچ کاروبار اچ سوکھ کیتے مختلف ضوابط تے کاغذی کارروائیاں و منظوریاں کوں گھٹ کرݨ دے حوالے نال 558 اصلاحات تے کم مکمل تھی چکیے جیں اِچوں 71 پالیسی اقدامات نافذ تھی ڳئن ڄݙاں جو 272 دے نفاذ تے کم تکھے جاری اے، 7 مرحلیں اچ مختلف شعبیں اچ انھاں دا نفاذ کیتا ویندا پئے، انھاں اقدامات پاروں کاروباری برادری کوں مختلف ضابطیں و شرطاں تے خرچ تھیوݨ آلی بچت دی رقم دا تخمینہ 468.7 ارب روپے اے۔اجلاس کوں مزید ݙسایا ڳیا جو غیر ضروری و پیچیدہ کاغذی کارروائی تے ضوابط دے خاتمے نال برآمدات تے براہِ راست ٻاہرلی سرمایہ کاری اچ ودھارا تے روزگار دے نویں موقع پیدا تھیسن۔ وزیراعظم ہدایت کیتی جو متعلقہ اداریں دے افسران دی کارکردگی دی جانچ اچ انھاں ولوں کاروبار اچ سوکھ دے اقدامات دے نفاذ تے ایں دی وجہ توں پیدا تھیوݨ آلے روزگار دے موقع کوں کلیدی اہمیت ݙتی ونڄے۔