وزیرِ داخلہ محسن نقوی اتے وزیرِ مملکت طلال چوہدری نال چین دی نیشنل امیگریشن ایڈمنسٹریشن دے ڈائریکٹر جنرل چی جنگ یانگ دی اعلیٰ سطح دے وفد نال ملاقات

اسلام آباد۔ 17 جولائی(اے پی پی)وفاقی وزیرِ داخلہ محسن نقوی اتے وزیرِ مملکت طلال چوہدری نال چین دی نیشنل امیگریشن ایڈمنسٹریشن دے ڈائریکٹر جنرل چی جنگ یانگ دی قیادت اچ ہک اعلیٰ سطح دے وفد ملاقات کیتی جیندے اچ ݙوہیں ملکاں وچال امیگریشن، بارڈر مینجمنٹ اتے ادارہ جاتی تعاون کوں ٻیا ودھاوݨ تے اتفاق کیتا ڳیا۔ ملاقات اچ غیر قانونی امیگریشن، اسلحے دی سمگلنگ اتے سرحد پار جرائم دے خلاف مشترکہ کارروائیاں کوں موثر ٻݨاوݨ دا فیصلہ کیتا ڳیا ڄݙاں جو امیگریشن پراسیس کوں تکھا ٻݨاوݨ کیتے ہک معاہدے کوں تیکھے حتمی شکل ݙتی ویسی۔ ایں موقع تے بارڈر مینجمنٹ تے سکیورٹی دی نگرانی کیتے ہک ’’پاک چین مشترکہ ورکنگ گروپ‘‘ قائم کرݨ تے وی اتفاق تھیا۔ وزیرِ داخلہ محسن نقوی آکھیا جو لینڈ بارڈر، سی پورٹس اتے امیگریشن مینجمنٹ اچ چین نال تعاون ودھایا ویسی۔ انھاں آکھیا جو حکومتِ پاکستان غیر قانونی امیگریشن اتے سمگلنگ دے خلاف ’زیرو ٹالرنس‘ پالیسی تے چلدی پئی اے اتے انھاں جرائم اچ ملوث عناصر دے خلاف بلاتفریق کارروائی کیتی ویندی پئی اے۔ ایں توں علاوہ، خنجراب پاس تے سکیورٹی کوں مضبوط بݨاوݨ کیتے چیک پوسٹ قائم کیتی ویندی پئی اے۔ وزیرِ مملکت طلال چوہدری آکھیا جو باہمی تعاون نال سرحدی جرائم کوں رکیسوں۔ چینی وفد دے سربراہ چی جنگ یانگ پاکستان دے اقدامات سراہندت آکھیا جو چین اتے پاکستان سٹریٹجک پارٹنر ہین اتے چین پاکستانی اداریاں دی استعداد کار ودھاوݨ اچ تعاون جاری رکھیسی۔ ملاقات اچ چینی وفد وزیرِ داخلہ محسن نقوی کوں چین دے وزیرِ داخلہ ولوں ’’پبلک سکیورٹی فورم‘‘ اچ شرکت دا دعوت نامہ پیش کیتا ڄݙاں جو ایف آئی اے دے وفد کوں وی سݙیا ڳیا۔ چینی سفیر ݙسایا جو پاکستانی پولیس افسران ایں مہینے تربیت کیتے چین ویندے پئن ڄݙاں جو چینی اساتذہ پاکستان اچ سپیشل پروٹیکشن یونٹ دے اہلکاراں کوں چینی زبان دی خصوصی تربیت ݙیندے پئن۔ ایں اہم ملاقات اچ چینی سفیر، سیکرٹری داخلہ، ڈی جی ایف آئی اے، ڈی جی این سی سی آئی اے، چیف کمشنر تے آئی جی اسلام آباد وی موجود ہن۔