وزیراعظم دا پاکستانی اتے چینی کمپنیاں وچال فارماسیوٹیکلز دے شعبے اچ 44 کروڑ ڈالر ودھ دے 9 معاہدیاں دا خیرمقدم

اسلام آباد۔ 17 جولائی(اے پی پی)وزیراعظم محمد شہباز شریف پاکستان اتے چینی کمپنیاں وچال فارماسیوٹیکلز دے شعبے اچ 44 کروڑ ڈالر توں ودھ دے 9 معاہدیاں دا خیرمقدم کریندے آکھیے جو ݙوہیں ملکاں دی نجی کمپنیاں وچال اشتراک نال پاکستان اچ فارماسیوٹیکلز دے شعبیاں کوں ترقی ملسی، چین پاکستان دا سب توں قابلِ اعتماد اتے آزمودہ دوست اے اتے ایںدی معاشی و تزویراتی ترقی دنیا کیتے ہک مثال اے، چینی شہریاں دی سلامتی کیتے کوئی کسر نا چھوڑی ویسی۔ انھاں اے ڳالھ پاکستان اتے چین دیاں فارماسیوٹیکلز کمپنیاں دی بزنس ٹو بزنس کانفرنس نال خطاب کریندے آکھی۔ ایں موقع تے وفاقی وزراء، معاونینِ خصوصی تے اعلیٰ سرکاری حکام دے علاوہ پاکستان اچ چین دے سفیر تے ملکی و چینی فارماسیوٹیکلز کمپنیاں دے نمائندے ٻہوں وݙی تعداد اچ موجود ہن۔ وزیراعظم آکھیا جو ݙوہیں ملکاں دی فارماسیوٹیکلز کمپنیاں وچال 44 کروڑ ڈالر توں زائد مالیت دے 9 معاہدے تھئن۔ وزیراعظم امید کیتی جو اے معاہدے تیکھے عملی شکل اختیار کریسن۔ انھاں چین کوں پاکستان دا سب توں قابلِ اعتماد اتے آزمودہ دوست قرار ݙیندے آکھیے جو ہر اوکھے ویلھے چین پاکستان دا ساتھ ݙتے اتے پاکستان دی اقتصادی ترقی اچ وی اہم کردار ادا کیتے، چین سارے عالمی فورمز تے پاکستان دی حمایت کیتی، سی پیک ون دے تحت 30 ارب ڈالر دی سرمایہ کاری آئی۔ وزیراعظم چین دی غیرمتزلزل حمایت تے چینی قیادت دا شکریہ ادا کریندے آکھیا جوچینی صدر شی جن پنگ وژنری لیڈر ہین جنھاں چینی معاشرے اتے معیشت کوں مکمل طور تے بدل ݙتے، چین نہ صرف معاشی ٻھل تزویراتی ترقی دے میدان اچ وی اپݨا آپ منوائے۔ انہاں آکھیا جو فارماسیوٹیکلز دی ترقی اتے سرمایہ کاری کیتے اج وݙا موقع اے، ݙوہیں ملکاں دے سرمایہ کاراں وچال مینوفیکچرنگ، ویکسین دی تیاری اتے ریسرچ اینڈ ڈویلپمنٹ دے شعبیاں اچ اشتراک نال فارماسیوٹیکلز دے سارے شعبیاں اچ ترقی تھیسی۔ وزیراعظم خطے اچ حالیہ بحران تے آکھیے جو ایں بحران پورے ڄڳ کیتے وݙے مسائل پیدا کر ݙتن، پاکستان امریکہ اتے ایران دی ثالثی اچ اہم کردار ادا کیتے جیندے کیتے چین سودھا دوست و برادر ملکاں بھرپور تعاون کیتا، صدر شی جن پنگ ٻہوں خلوص نال انھاں کوشِشاں دی بھرپور حمایت کیتی۔ وزیراعظم آکھیا جو امریکہ اتے ایران وچال طے تھیوݨ والی ’’اسلام آباد مفاہمتی یادداشت‘‘ اچ پاکستان ثالث اے۔ انھاں فیلڈ مارشل سید عاصم منیر دی انتھک کوشِشاں کوں سراہیندے آکھیا جو تاریخ اچ انھاں دا کردار یاد رکھیا ویسی۔ وزیراعظم نائب وزیراعظم و وزیرِ خارجہ سینیٹر محمد اسحاق ڈار دی کوشِشاں کوں وی خراجِ تحسین پیش کیتا جنھاں عالمی رہنماواں نال رابطے کیتن۔ وزیراعظم آکھیا جو پاک چین دوستی ہمالیہ توں اچی، ماکھی توں مٹھی اتے ترامے توں وی مضبوط اے۔ وزیراعظم آکھیا جو پاکستان اچ چینی شہریاں دی سلامتی ساݙے کیتے سب توں اہم اے، ایں سانڳے کوئی کسر کائنا چھوڑی ویسی، چینی شہری ساݙے مہمان ہین، انھاں دی خوشی ساݙی خوشی اے۔ ایں موقع تے وفاقی وزیرِ صحت سیّد مصطفیٰ کمال، وزیراعظم دے معاونِ خصوصی برائے صنعت و پیداوار ہارون اختر خان وی خطاب کیتے۔ چین دے سفیر جیانگ زیڈونگ اپݨے خطاب اچ پاکستان چین سرمایہ کاری کانفرنس کوں اہم قرار ݙتے۔ انہاں آکھیے جو پاکستان اچ مختلف منصوبیاں تے تعمیراتی کم جاری اے جیندے نال 20 ہزار توں ودھ روزگار دے مواقع نکلݨ دی توقع اے، وزیراعظم شہباز شریف صحت اتے بائیو ٹیکنالوجی دے شعبیاں تے خصوصی توجہ ݙیندے پئن، انھاں دے اقدامات اپݨی عوام دی فلاح و بہبود دے انھاں دے عزم دی بھرپور عکاسی کریندن۔ چینی سفیر آکھیا جو پاکستان اچ صحت دی سہولتاں دی طلب مسلسل ودھدی پئی اے، پاکستان اچ صحت دے شعبے اچ ترقی دے وسیع امکانات موجود ہین، پاکستان دی 29 ادویات دی مصنوعات پہلے ہی چینی منڈی اچ داخل تھی چکین، اساں ݙوہیں ملکاں دے کاروباری اداریاں وچال ہک پل دا کردار ادا کریسوں، کاروباری اداریاں کوں معیاری خدمات ݙیسوں۔ انھاں چینی کاروباری اداریاں تے زور ݙتے جو او قوانین دی پاسداری کریندے ہوئیں اپݨیاں سرگرمیاں انجام ݙیون۔ انھاں آکھیا جو خطے اچ امن و استحکام کیتے چین پاکستان دی حمایت جاری رکھیسی۔ کانفرنس اچ پاکستان اتے چین دے نجی شعبے وچال فارماسیوٹیکل دے شعبیاں بارے 44 کروڑ ڈالرز توں ودھ مالیت دے 9 معاہدے تھئن جنہاں اچ مقامی سطح تے ویکسین دی تیاری، بائیو ٹیکنالوجی، ادویات دی تیاری، ٹیکنالوجی دے تبادلے اتے ہیپاٹائٹس توں بچائو دے معاہدے شامل ہین۔ ایندے علاوہ حفاظتی ٹیکیاں دے قومی پروگرام دے حوالے نال تعاون دا معاہدہ وی کیتا ڳئے۔