پاک چین فارماسیوٹیکل اینڈ ہیلتھ کیئر بی ٹو بی انویسٹمنٹ کانفرنس توں حاصل تھیوݨ آلیاں کامیابیاں غیرمعمولی ہن، مصطفیٰ کمال

اسلام آباد۔18جولائی (اے پی پی) وفاقی وزیرِ صحت سید مصطفیٰ کمال آکھیے جو پاک چین فارماسیوٹیکل اینڈ ہیلتھ کیئر بی ٹو بی انویسٹمنٹ کانفرنس توں حاصل تھیوݨ آلیاں کامیابیاں غیر معمولی ہن تے پاکستان دی فارماسیوٹیکل صنعت کیتے ہک نویں دور دا آغاز ثابت تھیسن۔پاک چین فارماسیوٹیکل اینڈ ہیلتھ کیئر بی ٹو بی انویسٹمنٹ کانفرنس دے ݙوجھے ݙینھ پریس کانفرنس توں خطاب کریندیں وفاقی وزیر ݙسایا جو کانفرنس اچ پاکستان تے چین وچال 850 ملین امریکی ڈالر دی کاروباری شراکت داری طے پا چکی اے، جنھاں اچ 600 ملین امریکی ڈالر دے باقاعدہ معاہدے ڄݙاں جو 250 ملین امریکی ڈالر مالیت دیاں 80 مفاہمتی یادداشتاں شامل ہن۔ انھاں آکھیا جو انھاں معاہدیں اچ 18 ہربل میڈیسنز متعلق منصوبے وی شامل ہن، نویں معاہدیں دے تحت میڈیکل ڈیوائسز، ویکسین دی مقامی تیاری تے روایتی چینی ادویات دی پیداوار دے منصوبے وی پاکستان اچ شروع کیتے ویسن۔مصطفیٰ کمال آکھیا جو پاکستان تے چین وچال فارما سیکٹر اچ بزنس ٹو بزنس تعاون نویں بلندیاں کوں پڄدا پئے تے حکومت چینی کمپنیاں دی پاکستان اچ سرمایہ کاری دا خیرمقدم کریندی اے۔ سید مصطفیٰ کمال ایں کامیابی تے پوری قوم تے وزیراعظم پاکستان کوں مبارخ ݙیندیں آکھیا جو اے سرمایہ کاری عالمی برادری دے پاکستان تے ودھدے اعتماد دا مظہر اے۔ انھاں آکھیا جو پاکستان اچ ویکسین دی مقامی پیداوار شروع کرݨ کیتے وی چینی کمپنیاں دے نال اہم معاہدے کیتے ڳئن۔ پاکستان ایں ویلھے 13 قسم دیاں ویکسینز درآمد کریندے ڄݙاں جو مقامی پیداوار شروع نہ کیتی ڳئی تاں 2030 تئیں ویکسین دی درآمدی لاڳت 1.2 ارب امریکی ڈالر تئیں پڄ سڳدی اے۔ انھاں آکھیا جو حکومت دی اولین ترجیح ملک کوں ویکسین دی درآمد تے انحصار توں کڈھݨ اے، اِیں مقصد دے تحت پاکستان دی پہلی قومی ویکسین پالیسی تیار کرتے وفاقی کابینہ توں منظور کرائی ونڄ چکی اے۔وفاقی وزیر آکھیا جو پاکستان آپݨی 90 فیصد دوائیں دا خام مال درآمد کریندے تاں جو ہݨ چینی کمپنیاں دے تعاون نال خام مال دی مقامی پیداوار کیتے معاہدے کیتے ڳئن جیں توں دوائیں دی پیداواری لاڳت تے قیمتاں اچ کمی آسی تے ایں دا براہِ راست فیدہ عوام کوں پڄسے۔ انھاں آکھیا جو پاکستان اچ میڈیکل ڈیوائسز دی مقامی تیاری، کلینیکل ٹرائلز تے ووکیشنل ٹریننگ دے شعبیں اچ وی اہم معاہدے کیتے ڳئن جیہڑے ٹیکنالوجی ٹرانسفر، مہارتاں دے ودھارے تے صنعتی ترقی اچ معاون ثابت تھیسن۔ مصطفیٰ کمال آکھیا جو ڈرگ ریگولیٹری اتھارٹی آف پاکستان (ڈریپ) دی 80 فیصد توں ودھ خدمات ڈیجیٹلائز کیتیاں ڳئن ۔ ہݨ دوائیں دے لائسنس کیتے گھر ٻیٹھے آن لائن درخواست ݙتی ونڄ سڳدی اے تے ڈریپ پورٹل تے رجسٹریشن دے 20 ݙینھ دے اندر لائسنس ای میل دے ذریعے جاری کر ݙتا ویندے۔انھاں آکھیا جو پاکستان کوں فارما ریگولیشن دے شعبے اچ عالمی سطح تے پذیرائی حاصل تھیندی پئی اے تے گزریل ہک سال دے دوران پاکستان کوں فارماسیوٹیکل ریگولیٹری شعبے اچ چار بین الاقوامی اعزازات حاصل تھئن، عالمی ادارہِ صحت (ڈبلیو ایچ او) پاکستانی لیبارٹریز کوں پری کوالیفائی کر چکئے، ڄݙاں جو پاکستان ڈبلیو ایچ او لیول ٹو دے تحت 52 ملکاں کوں دوائیں برآمد کریندا پئے۔ انھاں ݙسایا جو اپریل 2027 اچ ڈبلیو ایچ او لیول تھری دی انسپیکشن متوقع اے جیں دے حصول دے بعد مزید 100 ملکاں کوں دوائیں برآمد کرݨ دے موقع ملسن۔ انھاں آکھیا جو پاکستان دی فارماسیوٹیکل صنعت عالمی لوڑھ پوریاں کرݨ دی بھرپور صلاحیت رکھیندی اے۔ انھاں ݙسایا جو کانفرنس اچ چین توں 170 وفد ڄݙاں جو پاکستان توں 300 توں ودھ مقامی وفد شریک ہن۔