وفاقی وزیرِ پٹرولیم علی پرویز ملک دی زیر صدارت اوگرا، آئل انڈسٹری تے متعلقہ اداریں دا اعلیٰ سطحی مشاورتی اجلاس

اسلام آباد۔18جولائی (اے پی پی) وفاقی وزیرِ پٹرولیم علی پرویز ملک دی زیر صدارت اوگرا، آئل انڈسٹری تے متعلقہ اداریں دا اعلیٰ سطحی مشاورتی اجلاس منعقد تھیا، جیں اچ نویں پرائسنگ میکنزم، ایں دے نفاذ تے درپیش تکنیکی و انتظامی امور تے تفصیلی غور کیتا ڳیا۔ اجلاس اچ صنعتی نمائندیں اصلاحاتی اقدام دا خیرمقدم کریندیں مختلف تجویزاں پیش کیتیاں ڄݙاں جو حکومت شفاف، مارکیٹ تے مبنی تے مرحلہ وار ڈی ریگولیشن دے ذریعے یومیہ قیمتاں دے نظام دے کامیاب نفاذ دے عزم دا اعادہ کیتا۔وفاقی وزیرِ پٹرولیم علی پرویز ملک آئل اینڈ گیس ریگولیٹری اتھارٹی (اوگرا)، آئل کمپنیز ایڈوائزری کونسل (او سی اے سی)، آئل مارکیٹنگ ایسوسی ایشن آف پاکستان (او میپ)، ریفائنریز، آئل مارکیٹنگ کمپنیاں (او ایم سیز) تے پٹرولیم ڈویژن دے اعلیٰ حکام دے نال اعلیٰ سطحی اجلاس دی صدارت کیتی جیں اچ پٹرولیم مصنوعات دی قیمتاں دے تعین دے ہفتہ وار نظام کوں یومیہ بنیاداں تے منتقل کرݨ دے نویں طریقہ کار تے تفصیلی مشاورت کیتی ڳئی۔ اجلاس اچ صنعتی نمائندیں کوں نویں پرائسنگ میکنزم تے بریفنگ ݙتی ڳئی۔وفاقی وزیر علی پرویز ملک ݙسایا جو اے اصلاحات وزیراعظم دی ہدایت تے وفاقی کابینہ دی منظوری دے بعد متعارف کرائیاں ویندیاں پئن جنھاں دا مقصد قواعد تے مبنی پٹرولیم نظام کوں ودھارا ݙیوݨ اے ۔ انھاں آکھیا جو نویں طریقہ کار دے تحت پٹرولیم مصنوعات دی خوردہ قیمتاں شفاف تے فارمولہ تے مبنی نظام دے ذریعے مارکیٹ دی حقیقی صورتحال دے مطابق مقرر تھیسن جیں توں صارفین کوں سیاسی بنیاداں تے قیمتاں اچ ردوبدل دے اثرات توں تحفظ حاصل ہوسے۔ انھاں آکھیا جو یومیہ قیمتاں دے نظام دا نفاذ پاکستان دی معیشت کوں زیادہ مسابقتی تے مارکیٹ تے مبنی بݨاوݨ دی طرف بنیادی پیش رفت اے۔ ہفتہ وار قیمتاں دے اعلان تے حکومتی منظوری دے روایتی طریقہ کار توں علیحدگی دے نتیجے اچ مارکیٹ اچ ناجائز منافع خوری تے مصنوعی اتار چڑھاؤ دے امکانات اچ کمی آسی۔اجلاس کوں ݙسایا ڳیا جو نواں نظام صارفین کیتے زیادہ شفاف تے منصفانہ قیمتاں کوں یقینی بݨیسی ڄݙاں جو قیمتاں دے تعین اچ سیاسی مداخلت دی بجائے مارکیٹ دے حقیقی عوامل کوں بنیاد بݨایا ویسی۔ وفاقی وزیر آکھیا جو پٹرولیم ڈویژن، اوگرا تے صنعتی شراکت داراں دے تعاون توں جامع معیاری طریقہ کار (ایس او پیز) تیار کیتے ویندی پئی اے۔ انھاں ݙسایا جو ان لینڈ فریٹ ایکولائزیشن مارجن (آئی ای ایف ایم)، ریفائنری ایڈجسٹمنٹس تے ٹرو اپ میکنزم سودھے سارے تکنیکی معاملات سانجھی مشاورت نال حل کیتے ویندے پئن تاں جو نظام دی کامیاب منتقلی یقینی بݨائی ونڄ سڳے۔اجلاس دے چھیکڑ تے وفاقی وزیر علی پرویز ملک پٹرولیم ڈویژن تے اوگرا کوں ہدایت کیتی جو صنعتی نمائندیں دے نال مزید مشاورتی اجلاس منعقد کیتے ونڄن تاں جو تکنیکی فارمولے کوں مزید بہتر بݨایا ونڄ سڳے، باقی ماندہ مسئلیں دا حل کڈھیا ونڄ سڳے تے یومیہ پٹرولیم قیمتاں دے نظام دا کامیاب نفاذ یقینی بݨایا ونڄ سڳے