وزیراعظم محمد شہباز شریف دا یومِ الحاقِ پاکستان تے پیغام

اسلام آباد۔19جولائی (اے پی پی) وزیر اعظم محمد شہباز شریف آکھیے جو پاکستان، اقوام متحدہ دی سلامتی کونسل دی قرارداداں موجب، جموں و کشمیر دے عوام دے ناقابل تنسیخ حقِ خودارادیت دی اصولی حمایت تے ثابت قدم اے، جنوبی ایشیا اچ پائیدار امن ایں صورت ممکن اے ڄݙاں ایں جھیڑے کوں اقوامِ متحدہ دی سلامتی کونسل دی قرارداداں تے کشمیری عوام دی خواہشات موجب پرامن طریقے نال حل کیتا ونڄے۔یوم الحاق پاکستان، جیڑھا اڄ منایا ویندا پئے ، دے موقع تے آپݨے پیغام اچ وزیراعظم آکھیا جو یومِ الحاقِ پاکستان ہر سال 19 جولائی کوں ایں تاریخی قرارداد دی یاد اچ منایا ویندے جیڑھی 19 جولائی 1947 کوں سری نگر اچ منعقدہ آل جموں و کشمیر مسلم کانفرنس دے اجلاس اچ متفقہ طور تے منظور کیتی ڳئی ہئی۔ اے متفقہ قرارداد برصغیر دی تاریخ دے ہک فیصلہ کن مرحلے تے جموں و کشمیر دے مسلماناں دی اجتماعی سیاسی امنگاں دی آئینہ دار ہئی۔ ایں قرارداد اچ ریاست دے پاکستان توں الحاق دی خواہش دا اظہار کیتا ڳیا تے ڈوگرہ حکمراناں تے زور ݙتا ڳیا جو او عوام دی خواہشات دا احترام کرن۔ اے قرارداد اڄ وی جموں و کشمیر دے عوام دی سیاسی جدوجہد دا ہک اہم تاریخی سنگِ میل سمجھدی ویندی اے۔وزیر اعظم آکھیا جو اے ݙینھ پاکستان تے جموں و کشمیر دے عوام وچال موجود انھاں مضبوط تے پراݨے رشتے دی وی عکاسی اے جیڑھا مشترکہ تاریخ، عقیدے، ثقافت، جغرافیے تے سانجھی وابستگی تے استوار ہن۔ ساریں توں ودھ تے، اے ایں بنیادی اصول کوں اجاگر کریندے جو کشمیری عوام دی آزادانہ طور تے ظاہر کیتی ڳئی خواہشات تے امنگاں دا احترام کیتا ونڄݨا چاہیدے۔ انھاں آکھیا جو پاکستان، اقوام متحدہ دی سلامتی کونسل دی متعلقہ قرارداداں موجب، جموں و کشمیر دے عوام دے ناقابل تنسیخ حقِ خودارادیت دی اصولی حمایت تے ثابت قدم اے۔ جموں و کشمیر دا غیر حل شدہ جھیڑا اڄ وی خطے دے امن و سلامتی تے اثرات مرتب کریندا پئے۔وزیراعظم آکھیا جو جنوبی ایشیا اچ پائیدار امن ایں صورت ممکن اے ڄݙاں ایں جھیڑے کوں اقوامِ متحدہ دی سلامتی کونسل دی متعلقہ قرارداداں تے کشمیری عوام دی خواہشات موجب پرامن طریقے نال حل کیتا ونڄے۔ انھاں آکھیا جو حکومتِ پاکستان تے پاکستانی عوام، بھارتی غیر قانونی زیرِ تسلط جموں و کشمیر دے عوام دی آپݨے بنیادی حقوق دے حصول کیتے جاری منصفانہ جدوجہد، انھاں دی جرات، استقامت تے ثابت قدمی کوں سلام پیش کریندن۔ پاکستان کشمیری عوام دی غیر متزلزل سفارتی، سیاسی تے اخلاقی حمایت جاری رکھیسی تا وقت جو او آپݨے ناقابلِ تنسیخ حقِ خودارادیت کوں آزادانہ طور تے استعمال کرݨ دے قابل نئی تھی ویندے