یوم الحاق پاکستان اساکوں پاکستان تےجموں و کشمیر دے عوام وچال گھاٹے تاریخی، ثقافتی اتے روحانی رشتیں دی یاد ݙویندے، صدر آصف علی زرداری

اسلام آباد۔19جولائی (اے پی پی) صدر مملکت آصف علی زرداری آکھیے جو یوم الحاق پاکستان اساکوں پاکستان اتے جموں و کشمیر دے عوام وچال گھاٹے تاریخی، ثقافتی اتے روحانی رشتیں دی یاد ݙویندے تے آپݨے مستقبل دا فیصلہ کرݨ اچ کشمیری عوام دی آزادانہ مرضی دا احترام کرݨ دی اہمیت دا وی اعادہ کریندے، تقریباً اٹھ ݙھاکیں توں جموں و کشمیر دا جھیڑا اقوامِ متحدہ دی سلامتی کونسل دی متعلقہ قرارداداں دے باوجود، جنھاں اچ جموں و کشمیر دے عوام دے حقِ خودارادیت کوں تسلیم کیتا ڳئے، حل نئی تھی سڳیا۔ ایوان صدر دے پریس ونگ توں جاری بیان موجب آپݨے پیغام اچ صدر آصف علی زرداری آکھیا جو اڄ دا ݙینھ جموں و کشمیر مسلم کانفرنس ولوں 19 جولائی 1947 کوں منظور کیتی ونڄݨ آلی ایں تاریخی قرارداد دی یاد اچ اے جیڑھی برصغیر دی تاریخ دے ہک فیصلہ کن موڑ تے جموں و کشمیر دے مسلماناں دی سیاسی امنگاں دی آئینہ دار بݨی۔ اے ݙینھ اساکوں پاکستان تے جموں و کشمیر دے عوام وچال گھاٹے تاریخی، ثقافتی اتے روحانی رشتیں دی یاد ݙویندے تے آپݨے مستقبل دا فیصلہ کرݨ اچ کشمیری عوام دی آزادانہ مرضی دا احترام کرݨ دی اہمیت دا وی اعادہ کریندے۔ تقریباً اٹھ ݙھاکیں توں جموں و کشمیر دا جھیڑا اقوامِ متحدہ دی سلامتی کونسل دی متعلقہ قرارداداں دے باوجود، جنھاں اچ جموں و کشمیر دے عوام دے حقِ خودارادیت کوں تسلیم کیتا ڳئے، حل نئی تھی سڳیا۔ ایں بنیادی حق دا مسلسل انکار تے بھارت دے غیر قانونی زیرِ تسلط جموں و کشمیر اچ انسانی حقوق دیاں مسلسل خلاف ورزیاں، عالمی برادری کیتے تشویش دا باعث ہن۔صدر زرداری آکھیا جو پاکستان ہمیشہ اقوامِ متحدہ دی سلامتی کونسل دی متعلقہ قرارداداں تے کشمیری عوام دی امنگاں دے مطابق ایں جھیڑے دے پرامن تے منصفانہ حل دی وکالت کیتی اے۔ اساں عالمی برادری بالخصوص اقوامِ متحدہ تے زور ݙیندوں جو او کشمیری عوام دے حقِ خودارادیت دے حصول کوں یقینی بݨاوݨ دی کوششاں دی حمایت کر تے آپݨی ذمہ واری پوری کرے۔ صدر مملکت آکھیا جو میں جموں و کشمیر دے عوام دے حوصلے تے پختہ عزم کوں سلام پیش کرینداں جنھاں آپݨے جائز حقوق دے حصول کیتے لازوال قربانیاں ݙتن۔ پاکستان آپݨے کشمیری بھراویں تے بھیݨاں دے رلے کھڑا رہسی تے انھاں دے ناقابلِ تنسیخ حقِ خودارادیت دے حصول تئیں آپݨی غیر متزلزل سفارتی، سیاسی تے اخلاقی حمایت جاری رکھیسی۔ امید اے جو اے ݙینھ جموں و کشمیر دے جھیڑے دے پرامن، منصفانہ تے پائیدار حل کیتے ساݙے اجتماعی عزم کوں نویں جلا بخشے تے جنوبی ایشیا اچ پائیدار امن، سلامتی تے خوشحالی دا پیش خیمہ ثابت تھیوے