چینی کمپنیاں نال 42-40 ملین ڈالر دے عملی معاہدے، پاکستان سرمایہ کاری تے مبنی معاشی بحالی دے نویں دوراچ داخل تھی چکئے، قیصر احمد شیخ

فیصل آباد ۔ 19 جولائی (اے پی پی) وفاقی وزیر سرمایہ کاری بورڈ قیصر احمد شیخ آکھیے جو چینی فارماسیوٹیکل کمپنیاں دے نال تقریباً 40 توں 42 ملین ڈالر مالیت دے عملی سرمایہ کاری معاہدیں دے بعد پاکستان سرمایہ کاری تے مبنی معاشی بحالی دے ہک نویں مرحلے اچ داخل تھی چکئے۔ انھاں آکھیا جو غیر ملکی سرمایہ کاری دے ودھارے، سیاسی استحکام تے قومی معاشی اتفاقِ رائے دے ذریعے نہ صرف روزگار دے نویں موقع پیدا تھیسن بلکہ صحت دے شعبے دا بنیادی ڈھانچہ تکڑا تھیسی تے ملکی معیشت کوں پائیدار بنیاداں تے استحکام حاصل تھیسے۔اے ڳالھ انہاں چنیوٹ دے نواحی علاقے اچ 146 بھکڑی چوک اچ منعقدہ ہک فری میڈیکل کیمپ دے دورے دے موقع تے میڈیا نال نال الویندے آکھی۔ انھاں آکھیا جو ایں ویلھے تقریباً 100 چینی سرمایہ کار تے کاروباری شخصیات اسلام آباد اچ موجود ہن جتھاں پاکستان تے چین وچال فارماسیوٹیکل تے صحت دے شعبیں اچ سرمایہ کاری دے ودھارے کیتے ہک اہم بزنس ٹو بزنس (بی ٹو بی) کانفرنس منعقد کیتی ڳئی اے۔انھاں آکھیا جو ماضی اچ ایں نوعیت دے بیشتر پروگرام مفاہمتی یادداشتاں (ایم او یوز) تئیں محدود رہندے ہن، تاں جو ایں واری کانفرنس اچ تقریباً 40 توں 42 ملین ڈالر مالیت دے عملی سرمایہ کاری معاہدے طے پاتن۔ انھاں ایں کامیابی کوں وزیراعظم محمد شہباز شریف دی سرمایہ کار دوست پالیسیاں تے بورڈ آف انویسٹمنٹ دی مؤثر حکمتِ عملی دا نتیجہ قرار ݙتا۔ قیصر احمد شیخ آکھیا جو انھاں معاہدیں دے تحت چینی کمپنیاں پاکستان اچ دوائیں دی تیاری دے منصوبیں اچ سرمایہ کاری کریسن جیں توں نویں صنعتاں دے قیام دا رستہ ہموار ہووݨ دے نال نال روزگار دے وسیع موقع پیدا تھیسن تے ملکی فارماسیوٹیکل صنعت مزید مستحکم تھیسی ڄݙاں جو ایں منصوبے دے مثبت اثرات مجموعی قومی معیشت تے وی پمسن۔