قابلِ تجدید توانائی، بیٹری ٹیکنالوجی، موسمیاتی مزاحم انفراسٹرکچر، محفوظ پیوݨ دے پاݨی تے ٻئے شعبیں اچ نینگراں دیاں صلاحیتاں استعمال اچ گھن آتے گرین معیشت کوں ودھارا ݙتا ونڄ سڳدے، ڈاکٹر مصدق ملک

شی زان۔19جولائی (اے پی پی) وفاقی وزیرموسمیاتی تبدیلی و ماحولیاتی ہم آہنگی ڈاکٹر مصدق ملک آکھیے جو قابلِ تجدید توانائی، بیٹری ٹیکنالوجی، موسمیاتی مزاحم انفراسٹرکچر، محفوظ پیوݨ دے پاݨی تے ٻئے ماحول دوست شعبیں اچ نینگراں دیاں صلاحیتاں کوں استعمال اچ گھن آتے خطے اچ گرین معیشت کوں ودھارا ݙتا ونڄ سڳدے، پاکستان تے چین دے تعلقات سانجھے اعتماد تے مبنی ہن، گرین ہاؤس گیساں دے ودھدے اخراج تے عالمی درجہ حرارت اچ ودھارے پاروں گلیشیئرز تکھے پگھلدے پئن جیں دے نتیجے اچ تباہ کن چھل تے بعد اچ خشک سالی جیھے سنگین مسئلے جنم گھندے پئن ۔اے ڳالھ انہاں چین دے شی زانگ خودمختار خطے دے دورے دے دوران پنجویں چائنا شی زانگ ٹرانس ہمالیہ فورم بین الاقوامی تعاون توں خطاب کریندیں آکھی ۔ فورم اچ مختلف ملکاں دے پالیسی سازاں، ماہرین تے متعلقہ اداریں دے نمائندیں شرکت کیتی جتھاں پائیدار ترقی، ماحولیاتی تحفظ تے ہمالیائی خطے کوں درپیش چیلنجز تے ڳالھ مہاڑ کیتی ڳئی ۔ آپݨے خطاب اچ ڈاکٹر مصدق ملک آکھیا جو اے فورم نہ صرف سانجھی تہذیب، ثقافت، تنوع، سیاحت تے سانجھی دوستی دا جشن اے بلکہ انسانیت تے قدرتی ماحول دے تحفظ دے مشترکہ عزم دا اظہاروی اے۔ انھاں حکومتِ چین دا شکریہ ادا کریندیں آکھیا جو چین ہرچنڳے تے اوکھے ویلھے پاکستان دا دوست ریہا اے تے ݙوہیں ملکاں دے تعلقات سانجھے اعتماد تے ہن۔وفاقی وزیر پاکستان تے چین وچال ہمالیائی تے ٹرانس ہمالیائی سلسلۂ کوہ دے ذریعے موجود قدرتی اتے ماحولیاتی ربط کوں اجاگر کریندیں آکھیا جو پاکستان تقریباً 13 ہزار 500 گلیشیئرز دا حامل ملک اے جیڑھا ایں کوں موسمیاتی تبدیلی تے گلیشیئرز دے پگھلݨ دے اثرات توں ساریں توں زیادہ متاثر تھیوݨ آلے ملکاں اچ شامل کریندے۔ انھاں آکھیا جو گرین ہاؤس گیساں دے ودھدے اخراج تے عالمی درجہ حرارت اچ ودھارے پاروں گلیشیئرز تکھے پگھلدے پئن جیں دے نتیجے اچ تباہ کن چھل تے بعد اچ خشک سالی جیھے سنگین مسئلے جنم گھندے پئن۔ انھاں ݙسایا جو گزریل پندراں سالاں دے دوران پاکستان اچ چھل پاروں تقریباً چھی ہزار لوک جاں بحق تے تقریباً 20 ہزار زخمی یا مستقل معذورتھئن۔ اِیں عرصے اچ تقریباً چار کروڑ لوک بے گھر تھئن جیں دے نتیجے اچ طلبہ دے تقریباً ھک ارب اسی کروڑ تعلیمی ݙینھ ضائع تھئے جیڑھے موسمیاتی تبدیلی دے انسانی تے معاشی اثرات دی شدت کوں ظاہر کریندن۔