نائب وزیرِاعظم نال وینزویلا دے وزیرخارجہ تعلقات و بین الاقوامی تجارت دا ٹیلی فونک رابطہ

اسلام آباد۔19جولائی (اے پی پی) نائب وزیرِاعظم تے وزیرِخارجہ اسحاق ڈار نال وینزویلا دے نویں وزیرِ خارجہ تعلقات و بین الاقوامی تجارت فیلکس پلاسینسیا ٹیلی فونک رابطہ کیتا اتے تجارت، سرمایہ کاری، کاروبار، زراعت، انفارمیشن ٹیکنالوجی (IT) تے سانجھی دلچسپی دے ٻئے شعبیں سودھے وسیع تر شعبہ جات اچ تعاون کوں وسعت ݙیوݨ دے موقع بارے ڳالھ مہاڑ کیتی۔ وزارت خارجہ توں جاری بیان موجب نائب وزیرِاعظم/وزیرِخارجہ وزیر فیلکس پلاسینسیا کوں نویں عہدے تے تقرری تے مبارخ ݙتی۔ انھاں وینزویلا اچ آوݨ آلے تباہ کن زلزلے دے نتیجے اچ جانی تے مالی ضیان تے پاکستان دی طرفوں ݙکھ تے تعزیت کیتی ۔ نائب وزیراعظم اوکھے ویلھے وینزویلا دی حکومت تے عوام دے نال پاکستان دی غیر متزلزل یکجہتی دا اعادہ کیتا تے انھاں دی ہمت تے وقتی بحالی تے مکمل اعتماد دا اظہار کیتا۔فیلکس پلاسینسیا ہمدردی تے یکجہتی دے پیغام تے نائب وزیرِ اعظم/وزیرِخارجہ دا شکریہ ادا کیتا۔ انھاں قدرتی آفتاں دے متاثرین کیتے پاکستان دی حمایت تے انسانی ہمدردی دے جذبے دی وی تعریف کیتی تے لوڑھ ویلھے سانجھے تعاون دی اہمیت تے زور ݙتا۔ ایں توں انڄ انہاں امریکا تے ایران وچال علاقائی صورتحال اچ مذاکرات تے کشیدگی مکاوݨ کیتے پاکستان دے مثبت کردار دا اعتراف کیتا تے امن و سفارت کاری کیتے پاکستان دے عزم دی تعریف کیتی۔ݙوہیں رہنماواں پاکستان تے وینزویلا وچال پراݨے دوستانہ تعلقات تے ڳالھ کیتی تے ݙوطرفہ تعلقات کوں تکڑا مضبوط بݨاوݨ کیتے آپݨے سانجھے عزم دا اعادہ کیتا۔ انھاں تجارت، سرمایہ کاری، کاروبار، زراعت، انفارمیشن ٹیکنالوجی (IT) تے سانجھی دلچسپی دے ٻئے شعبیں سودھےوسیع تر شعبہ جات اچ تعاون کوں وسعت ݙیوݨ دے موقع تے ڳالھ کیتی۔ ݙوہیں رہنماواں معاشی تعاون ودھاوݨ تے ݙوہیں ملکاں دے سانجھے فیدے کیتے عوامی سطح تے رابطے تکڑے بݨاوݨ دے وسیع امکانات تے روشنی پاتی۔ نائب وزیرِاعظم/وزیرِخارجہ ݙوطرفہ تعلقات کوں نویں جلا بخشݨ تے تعاون ودھاوݨ کیتے مسلسل اعلیٰ سطح دے رابطیں دی اہمیت تے زور ݙتا۔ ݙوہیں رہنماواں سانجھی دلچسپی دے امور تے کثیر الجہتی فورمز تے پاکستان تے وینزویلا وچال نیڑے ہم آہنگی دی تعریف کیتی ۔ انھاں مستقبل اچ وی نیڑے رابطے اچ رہݨ تے وقتی مناسب موقع تے ملاقات کرݨ تے وی اتفاق کیتا۔