پاکستان تے کشمیر دا رشتہ سانجھی تاریخ، عقیدے تے جغرافیے تے استواراے، محسن نقوی

اسلام آباد۔19جولائی (اے پی پی) وفاقی وزیر داخلہ محسن نقوی یومِ الحاقِ پاکستان دے موقع تے جموں و کشمیر دے عوام کوں خراجِ تحسین پیش کریندیں کشمیری شہداء تے تحریکِ آزادی دی قیادت دی قربانیاں دی تعریف کیتی تے کشمیریاں دے حقِ خودارادیت کیتے پاکستان دی غیر متزلزل حمایت دا اعادہ کیتا۔ آپݨے خصوصی پیغام اچ وزیرداخلہ آکھیا جو کشمیری شہداء تے حریت رہنماواں ݙہاکیں تے محیط جدوجہد تے قربانیاں دے ذریعے آزادی دی شمع روشن رکھی، جیں تے پوری قوم انھاں کوں سلام پیش کریندی اے۔انھاں آکھیا جو 19 جولائی1947ء دی تاریخی قرارداد کشمیری عوام دی اجتماعی امنگاں دی حقیقی ترجمان تے تحریکِ آزادی دا ہک اہم سنگِ میل اے جیڑھی کشمیر دے عوام دے پاکستان نال الحاق دے غیر متزلزل عزم دی عکاس اے۔ محسن نقوی آکھیا جو کشمیری قیادت قیامِ پاکستان توں پہلے ہی آپݨے مستقبل کوں پاکستان دے نال وابستہ کرݨ دا فیصلہ کیتا ہئی۔ انھاں آکھیا جو پاکستان تے کشمیر دا رشتہ سانجھی تاریخ، عقیدے تے جغرافیے تے استواراے۔وزیر داخلہ آکھیا جو پاکستانی قوم آپݨے کشمیری بھراویں تے بھیݨاں دے رلے کھڑے تے بھارتی ظلم دے باوجود کشمیری عوام دے صبر، استقامت تے جرات کوں خراجِ تحسین پیش کریندی اے۔ انھاں آکھیا جو جموں و کشمیر دے عوام کوں آپݨے مستقبل دا فیصلہ کرݨ دا بنیادی حق ݙتا ونڄݨا چاہیدے۔ انھاں دا آکھݨ ہئی جو کشمیری عوام دی خواہشات موجب مسئلہ کشمیر دا پائیدار تے پرامن حل جنوبی ایشیا اچ دیرتئیں امن و استحکام کیتے ناگزیر اے۔ محسن نقوی ایں عزم دا اعادہ کیتا جو پاکستان کشمیری عوام دے حقِ خودارادیت دی غیر مشروط تے اصولی حمایت جاری رکھیسی۔