قومی اہمیت دے سارے ترقیاتی منصوبیں کوں مقررہ مدت اچ مکمل کیتا ونڄے، وزیراعظم شہباز شریف دی احسن اقبال نال ڳالھ مہاڑ

اسلام آباد۔20جولائی (اے پی پی) وزیراعظم محمد شہباز شریف آکھیے جو عوامی فلاح و بہبود، روزگار دے موقع پیدا کرݨ تے پائیدار معاشی چنڳائی دے حصول کیتے ترقیاتی منصوبیں دی وقتی تکمیل حکومت دی اولین ترجیح اے۔ انھاں اے ڳالھ وفاقی وزیر منصوبہ بندی، ترقی و خصوصی اقدامات پروفیسر احسن اقبال نال ڳالھ مہاڑ کریندیں آکھی جنہاں اتھاں وزیراعظم ہاؤس اچ انھاں نال ملاقات کیتی۔وزیراعظم دفتردے میڈیا ونگ توں جاری بیان موجب ملاقات اچ ملک بھر اچ پبلک سیکٹر ڈویلپمنٹ پروگرام سودھے جاری ترقیاتی منصوبیں دی پیش رفت تے تفصیلی ڳالھ مہاڑ کیتی ڳئی ۔ وفاقی وزیر نے وزیراعظم کوں جاری ترقیاتی منصوبیں، انھاں تے تھیوݨ آلی پیش رفت تے مستقبل دے لائحہ عمل دا ݙسایا۔ وزیراعظم شہباز شریف ہدایت کیتی جو قومی اہمیت دے سارے ترقیاتی منصوبیں کوں اعلیٰ معیار برقرار رکھیندیں مقررہ مدت دے اندر اعلیٰ معیار دے نال مکمل کیتا ونڄے۔انھاں آکھیا جو عوامی فلاح و بہبود، روزگار دے موقع پیدا کرݨ تے پائیدار معاشی چنڳائی دے حصول کیتے ترقیاتی منصوبیں دی وقتی تکمیل حکومت دی اولین ترجیح اے۔ وزیراعظم ایں ڳالھ تے زور ݙتا جو سارے متعلقہ وزارتاں تے ادارے سانجھے تعاون تے مؤثر رابطے دے ذریعے منصوبیں تے عملدرآمد دی رفتار مزید تکھی کرن تاں جو عوام کوں وقتی ایں دے ثمرات پُڄ سڳن۔ ملاقات اچ قومی چنڳائی دے مختلف پہلوواں تے آندے ترقیاتی اہداف تے وی ڳالھ مہاڑ کیتی۔