حکومت قومی یکجہتی کوں مزید تکڑا بݨاوݨ کیتے آپݨی ذمہ واریاں ادا کریندی رہسی، بیرسٹر دانیال چوہدری

راولپنڈی۔20جولائی(اے پی پی) وفاقی پارلیمانی سیکرٹری اطلاعات و نشریات بیرسٹر دانیال چوہدری نورین نیازی دے پاکستان مخالف بیان دی مذمت کریندیں ایں کوں ناقابلِ قبول، ناقابلِ معافی تے قومی مفادات دے منافی قرار ݙتے۔ انھاں آکھیا جو نورین نیازی آپݨے بھرا دی سیاست کیتے معرکہ حق تے سوالات چیندیں پئن تے ایجھے بیانات ݙیندیں پئن جیڑھے بھارتی میڈیا دی زینت بݨدے پئن۔ااے الھ انہاں سینئر صوبائی وزیر مریم اورنگزیب دی قیادت اچ کڈھی ڳئی ریلی توں خطاب کریندیں آکھی۔ ایں موقع تے وفاقی وزیرریلوے محمد حنیف عباسی، اراکین قومی اسمبلی طاہرہ اورنگزیب تے ملک ابرار سودھے مسلم لیگ (ن) دے رہنماواں، کارکناں تے شہریاں دی وݙی تعداد شرکت کیتی۔ بیرسٹر دانیال چوہدری آکھیا جوحکومت قومی سلامتی، ریاستی وقار، خودمختاری تے ملکی مفادات دے تحفظ تے کوئی سمجھوتہ کائنی کریسی تے پاکستان دے خلاف کہیں وی منفی بیانیے یا پروپیگنڈے کوں ہر سطح تے بھرپور انداز اچ مسترد کیتا ویسی۔انھاں آکھیا جو نورین نیازی دے بھرا دی سیاست دفن تھی چکی اے، انھاں دی جماعت شدید انتشار دا شکار اے ڄݙاں جو خیبر پختونخوا دی حکومت عوامی مسئلیں دے حل اچ ناکام تھی چکی اے۔ انھاں آکھیا جو آپݨی سیاسی ناکامیاں توں توجہ ہٹاوݨ کیتے کجھ عناصر پاکستان کوں بدنام کرݨ دی کوشش کریندے پئن، تاں جو قوم ایجھے عزائم کوں کݙاہیں کامیاب نہ تھیوݨ ݙیسی۔ وفاقی پارلیمانی سیکرٹری آکھیا جو پوری قوم پاکستان دی سلامتی، خودمختاری، استحکام تے قومی وقار دے تحفظ کیتے متحد اے تے حکومت قومی یکجہتی کوں مزید تکڑا بݨاوݨ کیتے آپݨی ذمہ واریاں ادا کریندی رہسی