این ڈی ایم اے 24 جولائی تئیں ملک دے مختلف علاقیں کیتے ممکنہ خطرے دا الرٹ جاری کر ݙتا

اسلام آباد۔21جولائی(اے پی پی) نیشنل ڈیزاسٹر منیجمنٹ اتھارٹی (این ڈی ایم اے) 24 جولائی تئیں ملک دے مختلف علاقیں کیتے ممکنہ خطرے دے حوالے نال الرٹ جاری کر ݙتے۔ دریاواں، مقامی ندی نالیں تے پہاڑی برساتی گزرگاہواں اچ اچانک چھل دی صورتحال تے پاݨی وہݨ اچ ودھارے دا الرٹ وی جاری کر ݙتا ڳئے۔ این ڈی ایم اے توں جاری بیان موجب گلگت بلتستان دے اضلاع ہنزہ، شگر تے گانچھے اچ شمشال، ہنزہ، چپورسن، کلیک، شگر، شیوک تے ہُشے دریاواں اچ اچانک چھل ریلیں دا ݙر اے۔آزاد کشمیر اچ دریائے جہلم، دریائے نیلم، دریائے پونچھ، دریائے مہل، بیتاڑ نالہ، بھمبر نالہ، کانشی دریا تے جہلم و پونچھ دے معاون ندی نالیں اچ پاݨی دی سطح خطرناک حد تئیں اُچا تھیوݨ دا امکان اے۔ خیبر پختونخوا اچ دریائے چترال، دریائے کابل، دریائے سوات، دریائے پنجکوڑہ، مقم نالہ، کلپانی نالہ سودھے خیبر، کرم، اورکزئی، کوہاٹ، بنوں، کرک، ہنگو، لکی مروت، شمالی و جنوبی وزیرستان، باجوڑ، مہمند، مانسہرہ، بونیر تے صوابی دے مقامی ندی نالیں اچ چھل دے ریلیں دا ݙر اے ۔ پنجاب اچ ڈی جی خان دے پہاڑی برساتی نالیں، دریائے سواں، پوٹھوہار ریجن ڄݙاں جو شمال مشرقی بلوچستان دے برساتی ندی نالیں تے دریاواں اچ وی طغیانی دا امکان اے۔ دریائے چناب (مرالہ)، دریائے جہلم (منگلا دے اُتلے علاقے) اچ اتلے درجے دا چھل متوقع، ڄݙاں جو ڈورا، ڈوٹا، ڈوارہ، بھمبر، ہلسی، ایک، پلکھو، بین، بسنتر، ڈیک تے سکھی نالیں اچ وی پاݨی دی سطح اچ اچانک ودھارا متوقع اے۔بھارت دے تھین، پونگ تے بھاکھڑا ڈیمز توں اخراج دی صورت اچ دریائے راوی تے ستلج اچ پاݨی دے وہݨ اچ ودھارا تھی سڳدے۔ راولپنڈی، جہلم، گوجرانوالہ، سرگودھا، خوشاب، سیالکوٹ، گجرات، نارووال، لاہور، اوکاڑہ، چکوال تے اٹک دے شہری علاقیں اچ چھل دی صورتحال دا ݙر اے۔ این ڈی ایم اے ضلعی انتظامیہ کوں دریاواں تے ندی نالیں دی مسلسل نگرانی، امدادی ٹیماں دی پیشگی تعیناتی تے حساس علاقیں اچ حفاظتی اقدامات یقینی بݨاوݨ دی ہدایت جاری کیتی اے۔این ڈی ایم اے آکھیا جو پاݨی دے تکھا وہݨ تے طغیانی دے دوران دریاواں، ندی نالیں تے برساتی گزرگاہواں کوں پار کرݨ توں گریز کرن تے حفاظتی اقدامات یقینی بݨاون۔ این ڈی ایم اے 21 توں 23 جولائی تئیں چترال تے گلگت بلتستان دے مختلف پہاڑی علاقیں اچ لینڈ سلائیڈنگ، پتھر ڈہݨ تے ملبے دے ریلیں دا الرٹ وی جاری کر ݙتے۔ زنگرام۔ایون، بمبوریت، دروش۔لاوی، ہندور۔برکولتی، قرغلتی، بالائی یاسین، بدسوات۔بلہانس، پوریان سر،شمس آباد، اُلتر۔شسپر، کریم آباد۔التت، ہوپر نگر، راما۔استور، تریشنگ۔روپل تے جگلوٹ۔اسکردو روڈ (آر ڈی 20 تا 80) تے لینڈ سلائیڈنگ دا خطرہ اے۔ عوام کوں حساس جہیں تے پہاڑی علاقیں دا غیر ضروری سفر نہ کرݨ دی ہدایت کیتی ڳئی اے۔این ڈی ایم اے متعلقہ اداریں کوں حساس جہیں دی مسلسل نگرانی، ہنگامی ٹیماں دی تیاری تے ممکنہ بند شاہراہواں دی بحالی دے انتظامات یقینی بݨاوݨ دی ہدایت کیتی اے۔ عوام این ڈی ایم اے دی آفیشل ایپ ’’پاک این ڈی ایم اے ڈیزاسٹر الرٹ‘‘ توں وقتی معلومات حاصل کرن۔ این ڈی ایم اے سارے صوبائی تے ضلعی اداریں کوں ممکنہ موسمی صورتحال نال نبڑݨ کیتے الرٹ رہݨ دی ہدایت کر ݙتی اے