ویلھے توں پہلے دھاندلی دا شور مچاوݨ پیپلز پارٹی دی پراݨی روایت اے، بیرسٹر دانیال چوہدری

راولپنڈی۔27جولائی (اے پی پی) وفاقی پارلیمانی سیکرٹری اطلاعات و نشریات بیرسٹر دانیال چوہدری پاکستان پیپلز پارٹی دے رہنماواں ندیم افضل چن تے سعید غنی دی مشترکہ پریس کانفرنس کوں حقائق دے منافی، بے بنیاد الزامات تے سیاسی مایوسی دا مظہر قرار ݙتے۔اپݨے بیان اچ انھاں آکھیا جو مسلم لیگ (ن) دی حکومت عوامی خدمت، ترقیاتی منصوبیں تے معاشی استحکام تے یقین رکھیندی اے، ندیم افضل چن دی طرفوں حکومتی کارکردگی، گرین بس منصوبے، کݨک، ساوݨ مینھ تے ٻئے معاملات تے لاتے ڳئے الزامات بے بنیاد تے سیاسی پوائنٹ سکورنگ دے سوا کجھ کائنی۔ بیرسٹر دانیال چوہدری آکھیا جو پیپلز پارٹی اپݨی سیاسی ناکامیاں دا ملبہ ݙوجھیاں تے سٹݨ دے بجائے اپݨی کارکردگی دا جائزہ گھنے۔انھاں سعید غنی دی طرفوں مسلم لیگ (ن) دے امیدوار تے فائرنگ دے الزام کوں مسترد کریندیں آکھیا جو کارکن مختیار یونس دے جاں بحق تھیوݨ تے دلی افسوس اے تے اہلِ خانہ نال تعزیت کریندوں۔ انھاں واضح کیتا جو آزاد جموں و کشمیر دے انتخابات آئین تے قانون دے مطابق آزاد، منصفانہ تے شفاف انداز اچ تھیندے پئن، شکست دے ݙر پاروں ویلھے توں پہلے دھاندلی دا شور مچاوݨ پیپلز پارٹی دی پراݨی روایت اے۔وفاقی پارلیمانی سیکرٹری آکھیا جو وزیراعلیٰ پنجاب مریم نواز شریف دی قیادت اچ پنجاب حکومت عوامی فلاح دے منصوبیں تے تکھے عمل پیرا اے، گرین بس منصوبہ شہریاں کوں جدید، محفوظ، باوقار تے ماحول دوست سفری سہولتاں ݙیندا پئے تے روزانہ ہزاراں لوک ایں توں فیدہ چیندے پئن، ایجھے منصوبیں کوں سیاسی تنقید دا نشانہ بݨاوݨ عوامی مفاد دے خلاف اے