عوام کوں بہتر تے سوکھی خدمات ݙیوݨ دے عزم دے تحت وزارتِ خارجہ قونصلر سروسز کیتے شام دی شفٹ دا آغاز کرݙتے،اسحاق ڈار

اسلام آباد۔27جولائی (اے پی پی) نائب وزیرِاعظم تے وزیرِخارجہ سینیٹر محمد اسحاق ڈار آکھیا جو عوام کوں بہتر تے سوکھی خدمات ݙیوݨ دے عزم دے تحت وزارتِ خارجہ قونصلر سروسز کیتے شام دی شفٹ دا آغاز کرݙتے۔سماجی رابطہ دی ویب سائٹ ایکس تے آپݨے پیغام اچ سینیٹراسحاق ڈار آکھیا جو وزارتِ خارجہ دے ایں اقدام دے بعد شہری ہݨ سنوار توں جمعہ تئیں سویلے8:00 وڄے توں رات 8:00 وڄے تئیں قونصلر خدمات حاصل کرسڳسن جیں نال خدمات زیادہ قابلِ رسائی، سوکھی تے موثر بݨ ویسن۔وزارتِ خارجہ موجب نویں اوقاتِ کار دی تفصیلات عوامی نوٹس اچ ݙتیاں ڳئن۔ 27 جولائی 2026ء توں ݙو ہفتے کیتے آزمائشی بنیاداں تے شام دی شفٹ دا آغاز کیتا ڳئے، سنوار توں خمیس تئیں سویلے دی شفٹ ٹوکن اجراء کیتے سویلے 8 توں 12 جݙاں جو شام دی شفٹ ٹوکن اجراء کیتے تریجھے پہر 3 توں شام ساݙھے پنج وڄے تئیں ہوسی جݙاں جو جمعہ کوں سویلے8 توں 11 جݙاں جو شام دی شفٹ تریجھےپہر 3 توں شام 5 وڄے تئیں ہوسی۔