سابقہ حکومت دیاں پالیسیاں پاروں میڈیا ادارے مالی بحران دا شکار تھئے، صحافیاں تے میڈیا اداریں کوں پیش مالی مشکلات دے حل تے میڈیا انڈسٹری دے استحکام کیتے نویں پالیسی متعارف کرواوݨ تے کم کریندے پیوں، عطاء اللہ تارڑ

اسلام آباد۔27جولائی (اے پی پی) وفاقی وزیر اطلاعات و نشریات عطاء اللہ تارڑ آکھیا جو میڈیا انڈسٹری کوں ایں ویلھے پیش آندی مالی مشکلات دی بنیادی وجہ 2019ء دی پالیسیاں ہن جیں پاروں میڈیا اداریں کیتے دستیاب مالی گنجائش اچ نمایاں کمی آئی جیں دے اثرات اڄ وی برقرار ہن، گزریل دورِ حکومت اچ پریس کلبز دے فنڈز محدود جݙاں جو ٹی وی چینلز دے سرکاری اشتہارات دے نرخ تئیں گھٹ کیتے ڳئے جیں نال میڈیا انڈسٹری کوں مالی اوکھ دا سامنا کرݨا پیا، موجودہ حکومت دے دور اچ کہیں وی ٹی وی چینل یا اخبار دے سرکاری اشتہارات بند نی کیتے ڳئے، حکومت صحافیاں تے میڈیا اداریں کوں درپیش مالی مشکلات دے حل تے میڈیا انڈسٹری دے استحکام کیتے نویں پالیسی متعارف کرواوݨ تے کم کریندی پئی اے۔ااے ڳالھ انہاں اتھاں نیشنل پریس کلب دی ویب سائٹ دے اجراء دی تقریب نال خطاب کریندیں آکھی ۔ ایں موقع تے پرنسپل انفارمیشن افسر رئیسہ عادل، سینئر صحافی حاجی نواز رضا، نیشنل پریس کلب دے صدر عبدالرزاق سیال، سیکریٹری ڈاکٹر فرقان راؤ سودھے پریس کلب دے ٻئے عہدیداران تے صحافیاں دی وݙی تعداد موجود ہئی۔وفاقی وزیرِ اطلاعات آکھیا جو نیشنل پریس کلب اچ خوش اسلوبی نال ہک گورننگ باڈی توں ݙوجھی گورننگ باڈی کوں ذمہ واریاں منتقل تھئیاں، انتخابات وی انتہائی خوشگوار تے پرامن ماحول اچ تھئے جیڑھے سیاستداناں کیتے قابلِ تقلید مثال اے۔ وفاقی وزیر آکھیا جو نیشنل پریس کلب محض فیڈریشن دا حصہ نی بلکہ انتہائی اہم ادارہ اے۔ عطاء اللہ تارڑ ایں موقع تے پرنسپل انفارمیشن افسر رئیسہ عادل کوں بطور ڈی جی آئی پی ونگ اسلام آباد ٹاکس دے دوران بہترین انتظامات کرݨ تے خراجِ تحسین پیش کیتا۔ انھاں آکھیا جو اسلام آباد مذاکرات دے دوران صحافیاں کیتے بہترین انتظامات کیتے ڳئن جݙاں جو ایں تقریب کوں عالمی سطح تے وی سراہیا ڳیا جیں نال پاکستان دا مثبت تشخص اجاگر تھیا۔وفاقی وزیر آکھیا جو ڈیجیٹائزیشن دی جانب ودھݨ احسن تے اہم اقدام اے، ایہو مستقبل دی ضرورت اے۔ ویب سائٹ تے فہرستاں کوں ڈیجیٹلائز کرݨ توں ظاہر تھیندے جو نیشنل پریس کلب دا وژن اصلاحات تے جدت تے مبنی اے۔ وفاقی وزیرِ اطلاعات نیشنل پریس کلب کیتے ڈیجیٹل لیب دے قیام کوں ویلھے دی لوڑھ قرار ݙیندیں ڈیجیٹل لیب کیتے ہال مختص کرݨ دی ہدایت کیتی۔ انھاں آکھیا جو وزارتِ اطلاعات اچ وی ڈیجیٹل کمیونیکیشن ڈیپارٹمنٹ اچ ڈیجیٹل لیب قائم کیتی ڳئی اے جتھاں پوڈ کاسٹ سٹوڈیو وی تیار کیتا ڳئے۔ ایں سہولت دے ذریعے لوک اپݨی ریلز ریکارڈ تے رپورٹ فائل کر سڳدن۔ اسلام آباد نیشنل پریس کلب دے اندر وی ایجھی سہولت موجود ہووݨی چاہیدی اے کیوں جو اے ویلھے دی لوڑھ اے تے ڈیجیٹل دور اچ ایں دے بغیر اڳوں ودھݨ ممکن کائنی ۔عطاء اللہ تارڑ آکھیا جو حکومت دی کوشش ہوندی اے جو میڈیا اداریں دے واجبات وقتی ادا کیتے ونڄن، حکومت میڈیا اداریں توں اے یقین ڳھدے جو جݙاں وی انھاں دے واجبات دی ادائیگی تھیسی تاں ساریں توں پہلے ملازمین دا حق ادا کیتا ویسی تے انھاں دی زیرِ التواء تنخواہواں جاری کیتیاں ویسن۔ انھاں آکھیا جو حکومت ایجھا ماحول پیدا کرݨ دی کوشش کریندی پئی اے جیں اچ میڈیا ادارے مالی طور تے مستحکم رہن تے صحافی برادری کوں روزگار دے بہتر مواقع میسرآ سڳن۔وفاقی وزیر آکھیا جو ڈیجیٹل میڈیا دی اہمیت اپݨی جاہ مسلمہ اے تاں جو پرنٹ تے الیکٹرانک میڈیا دی اپݨی اہمیت برقرار اے۔ انھاں آکھیا جو سوشل میڈیا تے آوݨ آلی خبراں دا وݙا حصہ اخبارات تے ٹیلی ویژن توں حاصل تھیوݨ آلی معلومات تے مبنی تھیندے ایں کیتے روایتی میڈیا دی اہمیت بدستور موجود اے۔ انھاں آکھیا جو جݙاں وی پاکستان براڈ کاسٹرز ایسوسی ایشن (پی بی اے) یا آل پاکستان نیوز پیپرز سوسائٹی (اے پی این ایس) دے نال ملاقات تھیندی اے تاں ہمیشہ ایں ڳالھ تے زور ݙتا ویندے جو ملازمین دی فلاح و بہبود اولین ترجیح اے تے رہسی۔انھاں آکھیا جو پچھلے ݙینہاں قائمہ کمیٹی اطلاعات دے اجلاس اچ وی ایں معاملے تے زور ݙتا جݙاں جو پی بی اے تے اے پی این ایس کوں تحریری طور تے ݙسایا ویندا پئے جو اگر خدانخواستہ کہیں صحافی دی دورانِ ڈیوٹی وفات تھی ویندی اے تاں ایں ویلھے ایجھا کوئی پیکج یا نظام موجود کائنی جیں نال ایں دے اہلِ خانہ دی مالی معاونت کیتی ونڄ سڳے۔ انھاں آکھیا جو ایں اچ حکومت وی اپݨا حصہ پا سڳدی اے لیکن اے ضروری اے جو میڈیا ہاؤسز ہک جامع پالیسی مرتب کرن۔ انھاں آکھیا جو اے بنیادی انسانی حقوق دا تقاضہ اے جو صحافیاں تے انھاں دے اہلِ خانہ کوں تحفظ ݙتا ونڄے۔وفاقی وزیر ایں موقع تے صحافیاں کوں ہیلتھ کارڈ دی سہولت ݙیوݨ کیتے اقدامات دی وی ہدایت کیتی۔ ڈیجیٹل سکلز دی اہمیت تے زور ݙیندیں وفاقی وزیرِ اطلاعات عطاء اللہ تارڑ آکھیا جو سکل ڈویلپمنٹ انتہائی اہمیت دی حامل اے بالخصوص ڈیجیٹل شعبے اچ ڈیجیٹل کانٹینٹ کری ایشن تے ڈیجیٹل مارکیٹنگ ہݨ صحافیاں دے پیشہ ورانہ امور دی انجام دہی کیتے ناگزیر تھی چکی اے۔ انھاں آکھیا جو وزارتِ اطلاعات و نشریات قائداعظم یونیورسٹی، نسٹ، کامسیٹس تے نمل یونیورسٹی سودھے مختلف جامعات دے نال انتظامات کریندی پئی اے تاں جو انفارمیشن افسران تے نامزد صحافیاں کیتے ڈیجیٹل کانٹینٹ کری ایشن تے ڈیجیٹل مارکیٹنگ دے مختصر کورسز دا انعقاد کیتا ونڄ سڳے۔ انھاں آکھیا جو انھاں تربیتی کورسز دے اخراجات وزارتِ اطلاعات و نشریات برداشت کریسی۔میڈیا اداریں کوں درپیش مالی اوکھ دا حوالہ ݙیندیں عطاء اللہ تارڑ آکھیا جو انھاں دی مالی مشکلات دی بنیاد ماضی اچ متعارف کروائی ڳئی پالیسیاں اچ رکھی ڳئی۔ مالی مشکلات دی ہک وجہ او پالیسی اے جیں دے تحت اے طے کیتا ڳیا جو وفاقی حکومت نیشنل پریس کلب کیتے 10 لکھ روپے توں ودھ گرانٹ جاری نہ کریسی جݙاں جو چھوٹے پریس کلبز کیتے اے حد پنج لکھ روپے مقرر کیتی ڳئی۔ انھاں سوال کیتا جو اے پالیسی کئیں بݨائی؟ کئیں دور اچ بݨائی ڳئی تے ایں دے کیا مقاصد ہن؟ ایں تے غور تھیوݨا چاہیدے۔ انھاں آکھیا جو ایں پالیسی دے بݨاوݨ آلیں کوں ݙیکھݨا چاہیدے جو ایں دے کیا اثرات مرتب تھئے۔ انھاں آکھیا جو جنھاں لوکاں دے دور اچ اے پالیسی بݨائی ڳئی انھاں دی حکومت پنجاب تے خیبر پختونخوا اچ وی ہئی لیکن اے پالیسی اتھاں نافذ نہ کیتی ڳئی بلکہ صرف نیشنل پریس کلب تے لاگو کیتی ڳئی۔ انھاں آکھیا جو اے فیصلہ کئیں مقصد دے تحت کیتا ڳیا، ایں دا بہتر علم ایں کوں نافذ کرݨ آلیں کوں اے۔ انھاں آکھیا جو نیشنل پریس کلب ملک دا ساریں توں وݙا پریس کلب اے تے ایں تے کہیں قسم دا قدغن نی ہووݨا چاہیدا۔ حکومت ایں پالیسی اچ ترمیم کیتے اقدام شروع کر ݙتن۔وفاقی وزیر آکھیا جو اے واحد پالیسی نہ ہئی بلکہ ایں دے نال ہک ٻئی پالیسی وی متعارف کروائی ڳئی جیں دے تحت ٹی وی چینلز دے سرکاری اشتہارات دے نرخاں تے نظرثانی کریندیں انھاں کوں گھٹ کر ݙتا ڳیا۔ وݙے ٹیلی ویژن چینلز جنھاں دے سرکاری اشتہارات دے نرخ پہلے تقریباً ترائے لکھ روپے فی منٹ ہن، انھاں کوں گھٹ کر تے تقریباً ہک لکھ 85 ہزار روپے فی منٹ کر ݙتا ڳیا جݙاں جو ٻئے چینلز وی ایں فیصلے توں متاثر تھئے۔ انھاں آکھیا جو ہک پاسے نیشنل پریس کلب دی گرانٹ کوں محدود کیتا ڳیا جݙاں جو ݙوجھے پاسے سارے ٹی وی چینلز دے سرکاری اشتہارات دے نرخاں اچ کمی کر ݙتی ڳئی جیں دے اثرات اڄ وی میڈیا انڈسٹری تے موجود ہن۔ انھاں آکھیا جو اے فیصلہ 2019ء اچ کیتا ڳیا تاں جو ایں دے اثرات ہݨ وی جاری ہن۔ انھاں آکھیا جو سابقہ حکومت دی پالیسی دی وجہ توں ہی اڄ میڈیا اداریں کوں مالی دٻاؤ دا سامݨا کرݨا پوندا پئے۔ انھاں آکھیا جو موجودہ دورِ حکومت اچ کہیں اخبار یا ٹیلی ویژن چینل دے اشتہارات بند نی کیتے ڳئے۔ حکومت دا مقصد سابقہ پالیسیاں دی جاہ بہتر پالیسیاں متعارف کرواوݨا اے جنھاں دے ذریعے ٹیلی ویژن چینلز تے اخبارات کیتے مزید مالی گنجائش پیدا تھیوے تے پورے پاکستان دے صحافی باعزت روزگار کما سڳن۔وزیرِ اطلاعات آکھیا جو حکومت ایں حوالے توں اقدامات کریندی پئی اے تاں جو اے ضروری اے جو صحافیاں کیتے ملازمت دے تحفظ (سکیورٹی آف ٹینور) توں متعلق جامع پالیسی وضع کیتی ونڄے۔ انھاں آکھیا جو آئی ٹی این ای (Implementation Tribunal for Newspapers Employees) دی نویں چیئرپرسن تعینات کیتیاں ویندیاں پئن جو ایں عہدے کیتے میرٹ تے سرفہرست امیدوار رہیاں ہن تے انھاں دا نوٹیفکیشن وقتی جاری تھی ویسی۔ انھاں آکھیا جو کونسلز آف کمپلینٹس متعلق زیرِ التواء معاملات وی مکمل کر ݙتے ڳئن تانجو الیکٹرانک میڈیا کوں مشکلات دا سامݨا نہ کرݨا پووے۔عطاء اللہ تارڑ آکھیا جو پی ایف یو جے تے سی پی این ای سودھے ٻئی نمائندہ تنظیماں اپݨا کردار ادا کریندیں میڈیا ورکرز تے صحافیاں دی ملازمت دے تحفظ متعلق پالیسی مرتب کرن تاں حکومت ایں تے عملدرآمد یقینی بݨاوݨ کیتے اپݨا کردار ادا کریسی۔ انھاں آکھیا جو ایں مقصد کیتے پہلے وی جوائنٹ ایکشن کمیٹی قائم کیتی ڳئی ہئی، ایں حوالے توں مزید تجویزاں ݙتیاں ونڄن تاں جو عملی پیش رفت کیتی ونڄ سڳے۔ انھاں آکھیا جو او صحافی برادری دے مسئلیں توں آگاہ ہن تے انھاں معاملات تے کھلے دل نال ڳالھ مہاڑ کریندے پئن تاں جو بہتر تجویزاں دی روشنی اچ حل تلاش کیتے ونڄ سڳن۔وزیرِ اطلاعات آکھیا جو اے قابلِ قبول نی جو کہیں ملازم کوں سویلے نوٹس ݙے تے شام کوں ملازمت توں فارغ کر ݙتا ونڄے۔ انھاں آکھیا جو سارے متعلقہ تنظیماں رل تے ایں حوالے نال لائحہ عمل بݨاون تاں جو صحافیاں کوں ملازمت دا تحفظ ݙتا ونڄ سڳے۔ انھاں آکھیا جے رپورٹر، نیوز کاسٹر یا اینکر ڈیجیٹل پلیٹ فارمز دے ذریعے مونیٹائزیشن توں آمدݨ حاصل کریندے پئن تاں ایں توں چینل وی مستفید تھی سڳدے۔ عطاء اللہ تارڑ آکھیا جو دورانِ سروس کہیں صحافی دے انتقال دی صورت اچ معاوضے یا مالی معاونت کیتے پالیسی مرتب کرݨ دی لوڑھ اے تے ایجھی پالیسی بݨݨ دے بعد حکومت ایں تے عملدرآمد اچ اپݨا کردار ادا کریسی۔انھاں آکھیا جو کئی ٹی وی چینلز کوں شدید مالی مشکلات دا سامݨا اے جݙاں جو کجھ دارے بند وی تھیندے پئن۔ ایں مسئلے دے حل کیتے ساری نمائندہ تنظیماں دی طرفوں مشترکہ تجویزاں سامݨے آوݨیاں چاہیدن۔ نیشنل پریس کلب دی عمارت دے معاملے تے وزیرِ اطلاعات آکھیا جو ایں حوالے توں تجویزاں ݙتیاں ونڄن، او صحافی نمائندیں کوں نال گھن تے وزیرِ داخلہ محسن نقوی نال ڳالھ کریسن تے ایں معاملے کوں بھرپور انداز اچ چیسن۔ انھاں آکھیا جو حکومت دی ذمہ داری اے جو او اپݨی استطاعت موجب ایں مسئلے دے حل کیتے اقدامات کرے۔انھاں آکھیا جو صحافیاں کیتے پاکستان ریلویز دی سفری سہولت دے معاملے تے وفاقی وزیرِ ریلوے حنیف عباسی نال ڳالھ کر تے ایں کوں حل کرݨ دی کوشش کیتی ویسی۔ عطاء اللہ تارڑ تجویز ݙتی جو میڈیا دے مسئلیں تے تجاویز تے ڳالھ مہاڑ کیتے ہر مہینے ݙو توں ترائے اجلاس منعقد کیتے ونڄن تاں جو مختلف حلقیں توں مفید تجویزاں حاصل کیتیاں ونڄ سڳن تے میڈیا دی سپیس کوں مزید وسعت ݙتی ونڄ سڳے۔ انھاں آکھیا جو معاشرہ ایں ویلھے تکڑا رہندے جݙاں الیکٹرانک تے پرنٹ میڈیا دی سپیس موجود ہووے۔ انھاں آکھیا جو اڄ وی اخبارات اچ ایڈیٹوریل بورڈز موجود ہن تے ادارتی پالیسی دے تحت ایڈیٹرز تے سینئر رپورٹرز خبر دی تیاری، اشاعت تے نشر تھیوݨ دے معیار کوں یقینی بݨیندن جیں نال معاشرے اچ توازن برقرار رہندے۔وزیرِ اطلاعات آکھیا جو او ڈیجیٹل میڈیا دی اہمیت توں انکار نی کریندے، حکومت خود وی ڈیجیٹل نظام متعارف کروائن تاں جو الیکٹرانک تے پرنٹ میڈیا دا تحفظ تے ودھارا وزارتِ اطلاعات و نشریات دی پالیسی دا حصہ اے۔ ہک سوال دے جواب اچ وفاقی وزیرِ اطلاعات آکھیا جو جرنلسٹس ہاؤسنگ فیز ٹو منصوبے دے حوالے نال پنجاب حکومت نال ڳالھ کیتی ویسی، ایں معاملے تے پنجاب دی وزیرِ اطلاعات عظمیٰ بخاری نال وی ڳالھ کر تے صحافی برادری کوں ݙسایا ویسی۔ہک سوال دے جواب اچ وزیرِ اطلاعات سنو ٹی وی دے معاملے دا حوالہ ݙیندیں آکھیا جو گزریل ݙینہاں سنو ٹی وی دی انتظامیہ اسلام آباد آئی ہئی جیں دے نال ڳالھ مہاڑ دے نتیجے اچ 12 ملازمین کوں بحال کیتا ڳیا جنھاں اچ زیادہ تعداد میڈیا ورکرز دی ہئی۔ انھاں آکھیا جو انتظامیہ توں اے یقین ݙیوایا ڳیا جو اڳوں کہیں ملازم کوں بے روزگار نہ کیتا ویسی۔ انھاں آکھیا جو صحافیاں دے حقوق کیتے وہ اپݨا کردار ادا کریندے رہسن۔تنخواہواں تے واجبات دے معاملے تے وزیرِ اطلاعات آکھیا جو انھاں دا موقف واضح اے جو ملازمین دی تنخواہواں تے واجبات ترجیحی بنیاداں تے ادا ہووݨے چاہیدن۔ انھاں آکھیا جو پی بی اے تے اے پی این ایس دے نال ہر ملاقات اچ اے معاملات ساریں توں پہلے زیرِ بحث آندن۔ انھاں آکھیا جو حکومت وݙی حد تئیں ادائیگیاں دے طریقہِ کار کوں وی ملازمین دی تنخواہواں تے واجبات دی ادائیگی نال مشروط کیتے۔ انھاں آکھیا جو میڈیا مالکان عید تے رمضان المبارک توں پہلے حکومت نال رابطہ کریندن جو ملازمین کوں ادائیگیاں کرݨیاں ہن تے واجبات کلیئر کیتے ونڄن جیں تے حکومت ادائیگیاں دے عمل کوں وی مزید سوکھا تے مختصر کیتے۔ عطاء اللہ تارڑ آکھیا جو سرکاری اشتہارات کوں ملازمین دی تنخواہواں تے واجبات دی ادائیگی نال مکمل طور تے منسلک ہووݨا چاہیدے تے ایں حوالے نال اقدامات کیتے ویسن۔ایں موقع تے نیشنل پریس کلب دی طرفوں وفاقی وزیرِ اطلاعات کوں اعزازی رکنیت ݙیوݨ دا وی اعلان کیتا ڳیا تے انھاں کوں شیلڈ پیش کیتی۔ وفاقی وزیرِ اطلاعات نیشنل پریس کلب دی ویب سائٹ دا باقاعدہ افتتاح کیتا۔ ایں موقع تے پرنسپل انفارمیشن افسر رئیسہ عادل، پریس کلب دے صدر عبدالرزاق سیال، سیکریٹری ڈاکٹر فرقان رائو تے ٻئے وی موجود ہن۔