چیف آف آرمی اسٹاف فیلڈ مارشل سید عاصم منیر نال امریکی قانون سازاں دی ملاقات

راولپنڈی، 27 جولائی (اے پی پی) امریکی ایوانِ نمائندگان (ریاست مونٹانا) دے رکن مسٹر رایان کیتھ زِنکے تے ایوانِ نمائندگان (ریاست واشنگٹن) دے رکن مسٹر مائیکل جیمز اتھاں جنرل ہیڈ کوارٹرز جی ایچ کیو اچ چیف آف آرمی اسٹاف تے چیف آف ڈیفنس فورسز (سی ڈی ایف) فیلڈ مارشل سید عاصم منیر، نشانِ امتیاز (ملٹری)، ہلالِ جرات نال ملاقات کیتی۔انٹر سروسز پبلک ریلیشنز توں جاری پریس ریلیز دے موجب ملاقات دے دوران سانجھی دلچسپی دے امور، علاقائی سلامتی، ݙوطرفہ دفاعی تعاون تے معاشی تعاون و خوشحالی کوں ودھارا ݙیوݨ دے ذرائع تے ڳالھ مہاڑ کیتی ڳئی۔فیلڈ مارشل پاکستان دے وسیع معاشی امکانات کوں اجاگر کریندیں ایں ڳالھ تے زور ݙتا جو پائیدار علاقائی استحکام دی بنیاد معاشی ترقی، تجارت دے ودھارے تے علاقائی رابطے تے استوار اے، انھاں کاروباری دوستانہ ماحول ݙیوݨ تے غیر ملکی سرمایہ کاری کوں راغب کرݨ کیتے پاکستان دی طرفوں کیتیاں ونڄݨ آلیاں جاری ساختاتی اصلاحات تے روشنی پاتی۔معزز مہماناں علاقائی استحکام تے معاشی استحکام اچ پاکستان دے اہم کردار دا اعتراف کیتا۔ وفد دے پیشہ ورانہ پس منظر تے بصیرت دی تعریف کریندے ، ݙوہیں فریقین ݙوطرفہ معاشی شمولیت، نجی شعبے دی شراکت داری تے ݙوطرفہ تجارتی تعلقات کوں ودھاوݨ دے ممکنہ موقع تے ڳالھ مہاڑ کیتی۔آئی ایس پی آر دی پریس ریلیز موجب دورہ کرݨ آلے وفد گرم جوش مہمان نوازی تے فوجی قیادت دا شکریہ ادا کیتا تے امریکہ تے پاکستان وچال معاشی، تجارتی تے ادارہ جاتی تعلقات کوں مزید مضبوط بݨاوݨ دے مشترکہ عزم دا اظہار کیتا۔