2030 تئیں پاکستان کوں ہیپاٹائٹس سی توں پاک ملک بݨاوݨ اے: مصطفیٰ کمال

اسلام آباد۔28جولائی (اے پی پی) وفاقی وزیرِ صحت مصطفیٰ کمال آکھیا جو ہݨ تک ہیپاٹائٹس سی پروگرام دے تحت صرف 21 ہزار شہریاں دی سکریننگ کیتی ونڄ سڳی اے جڈانجو حکومت ہر شہری دی سکریننگ تے تقریباً 7 ہزار روپے خرچ کریندی پئی اے۔ اے ڳالھیں انھاں عالمی یومِ آبادی دے حوالے نال تھیوݨ آلے سیمینار نال خطاب کریندیں ہوئیں کیتا۔ انھاں شہریاں توں اپیل کیتی جو او حکومت دے نال تعاون کرن تانجو سکریننگ دا عمل مزید تیز کیتا ونڄ سڳے۔ انھاں آکھیا جو حکومت دا ہدف 2030 تک پاکستان کوں ہیپاٹائٹس سی توں پاک ملک بݨاوݨ اے۔ وفاقی وزیرِ صحت ݙسایا جو جئیں شہری اچ ہیپاٹائٹس سی دی تشخیص تھیسی، ایں دے علاج دے پہلے کورس تے 34 ہزار روپے لاگت آسی، جو حکومت برداشت کریسی۔ ہر مریض کوں علاج دے ݙو کورس مفت فراہم کیتے ویسن، جنھاں تے مجموعی طور تے 68 ہزار روپے خرچ تھیسن۔ مصطفیٰ کمال آکھیا جو صحت تے ہک ڈالر دی سرمایہ کاری نال معیشت کوں اٹھ ڈالر دا فائدہ حاصل تھیندے، ایں کیتے صحت دے نظام کوں مضبوط بݨاوݨا ناگزیر اے۔ انھاں آکھیا جو اساکوں آپݨے نظامِ صحت کوں خود بہتر بݨاوݨا ہوسی، کیونکہ انھاں مسائل دے حل کیتے کوئی فرشتے نہ آسن۔ وفاقی وزیرِ صحت ݙسایا جو حکومت ہک ایجھا قانون متعارف کروائے ونڄݨ کیتے کم کریندی پئی اے جئیں دے تحت جنھاں افراد دی ہیپاٹائٹس سی اسکریننگ مکمل تھی ڳئی ہوسی، انھاں کیتے ایچ آئی وی ٹیسٹ وی لازمی ہوسی۔ اے قانون 12 سال یا ایں توں ودھ عمر دے افراد تے لاگو تھیسی۔ انھاں اینٹی بائیوٹکس دے غیر مؤثر ہووݨ تے تشویش دا اظہار کریندیں ہوئیں آکھیا جو جنھاں مریضاں کوں ترائے ݙینہاں اچ صحت یاب تھی ونڄݨا چاہیدا ہئی، انھاں کوں ہݨ صحت یاب تھیوݨ اچ اٹھ ݙینہہ لگدے پئن، جو اینٹی مائیکروبیل مزاحمت دے ودھدے ہوئے مسئلے دی عکاسی کریندے۔