وزیراعظم دی صدارت اجلاس، مون سون دے دوران کہیں وی ہنگامی صورتحال نال نبڑݨ کیتے تمام اداریاں کوں ہر دم تیار رہݨ دی ہدایت

اسلام آباد۔28جولائی (اے پی پی) وزیراعظم محمد شہباز شریف تمام ادارویاں کوں ایں مون سون دے دوران کہیں وی ہنگامی صورتحال نال نبڑݨ کیتے ہر دم تیار رہݨ دی ہدایت کریندیں ہوئیں آکھیا جو این ڈی ایم اے تمام اداریاں دے تعاون نال مون سون دے جاری سپیل اچ جانی تے مالی نقصان کوں روکݨ یقینی بݨاوے۔ پی ایم آفس دے میڈیا ونگ توں جاری بیان دے مطابق وزیراعظم اے ڳالھیں انہاں منگل کوں آپݨی صدارت ملک اچ جاری مون سون بارشاں تے انھاں دے نتیجے اچ سیلابی صورتحال تے جائزہ اجلاس نال خطاب کریندیں ہوئیں کیتا۔ انھاں ہدایت کیتی جو این ڈی ایم اے، پی ڈی ایم ایز تے صوبائی حکومتاں دے نال مسلسل رابطے اچ راہوے، تمام ادارے جاری مون سون دے نتیجے اچ کہیں وی ہنگامی صورتحال نال نبڑݨ کیتے ہر دم تیار رہن۔ انھاں دا آکھݨ ہئی جو این ڈی ایم اے تمام وفاقی تے صوبائی اداریاں کوں مون سون دی صورتحال تے متوقع بارشاں دی اطلاعات بروقت فراہم کرے، وفاقی وزیرِ منصوبہ بندی روزانہ دی بنیاد تے فلڈ کمیٹی دے اجلاس دی صدارت کرن اتے صورتحال دے جائزے دے بعد لائحہ عمل طے کرن۔ وزیراعظم شمالی علاقہ جات اچ گلوف تے طوفانی ریلیاں دے حوالے نال پیشگی اطلاعات دے نظام کوں بھرپور طریقے نال فعال رکھݨ دی وی ہدایت کیتی۔ انھاں آکھیا جو پاکستان دا ماحول دشمن گیساں دے اخراج اچ حصہ معمولی اے مگر موسمیاتی تبدیلی دے مضر اثرات ایں کوں بری طرح متاثر کریندے پئن، موسمیاتی تبدیلی دے مضر اثرات دے پیشِ نظر حکومت طویل، وسط تے قلیل مدتی اقدامات تے تیزی نال کام کریندی پئی اے۔ وزیراعظم حکم ݙتا جو این ڈی ایم اے تمام اداریاں دے تعاون نال اے یقینی بݨاوے جو مون سون دے جاری سپیل اچ جانی تے مالی نقصان کوں روکیا ونڄے۔ اجلاس کوں این ڈی ایم اے، گلگت بلتستان تے آزاد کشمیر سمیت چاریں صوبیاں دے چیف سیکرٹریز حالیہ مون سون تے ایں دے نتیجے اچ نقصانات، ریسکیو تے بحالی دے اقدامات بارے بریفنگ ݙتی۔ اجلاس کوں ݙسایا ڳیا جو این ڈی ایم اے ملک دے شمالی علاقیاں اچ مون سون توں پیدا تھیوݨ آلی سیلابی صورتحال تے سندھ تے بلوچستان اچ جاری گرمی دی شدید لہر دے حوالے نال صوبائی حکومتاں تے اداریاں کوں تمام تر معاونت و وسائل فراہم کریندا پئے، آئندہ ݙو ݙینہاں اچ آزاد کشمیر تے گلگت بلتستان تے جنوبی سندھ اچ مون سون بارشاں دے ہک وݙے سپیل دی توقع اے، ایں دے علاوہ ستمبر دے ݙوجھے ہفتے توں ملک بھر اچ مون سون دا ہک وݙا سپیل وی متوقع اے، وزیراعظم دی ہدایت تے قائم کردہ فلڈ کمیٹی دا اجلاس باقاعدگی نال منعقد تھیندا پئے جئیں اچ تمام متعلقہ ادارے موجودہ صورتحال تے کڑی نظر رکھݨ دے نال نال ریسکیو تے ریلیف تے بحالی دے اقدامات دا جامع لائحہ عمل مرتب کر تے ایں دا نفاذ یقینی ٻݨیندے پئن۔ اجلاس کوں ݙسایا ڳیا جو موجودہ مون سون سپیل اچ ہݨ تئیں 110 اموات، 360 لوک زخمی تھئے، 796 مکاناں کوں نقصان تھیا اتے 376 مویشی ہلاک تھئے۔ اجلاس کوں ݙسایا ڳیا جو عالمی سطح تے جاری ایل-نینو (El-Nino) دی وجہ توں پاکستان دے شمالی علاقہ جات اچ موجود گلیشیئرز دے پگھلݨ دے تناسب اچ اضافہ تھیے جئیں دی وجہ توں آئندہ ہک مہینے اچ گلوف تے سیلابی ریلیاں دا خطرہ لاحق اے، ممکنہ طور تے متاثرہ علاقیاں دی نشاندہی کر تے تمام تر حفاظتی اقدامات چاتے ویندے پئن۔ اجلاس کوں ݙسایا ڳیا جو وسطی پنجاب بشمول لاہور اچ شہری سیلابی صورتحال تے قابو پاوݨ کیتے فوری اقدامات چاتے ڳئے جڈانجو کڄھ علاقیاں اچ برساتی نالیاں اچ سیلابی ریلیاں دی وجہ توں زرعی زمین زیرِ آب اے جئیں توں نکاسی دا کام جاری اے، ڈیرہ غازی خان تے ایں نال ملحقہ علاقیاں اچ وی سیلابی ریلیاں دی صورتحال ایں وقت قابو اچ اے۔ اجلاس کوں این ایچ اے ولوں مٹی دے تودے ڈہاوݨ نال سڑکاں دی بندش تے انھاں دی بحالی بارے وی بریفنگ ݙتی ڳئی۔ اجلاس کوں ݙسایا ڳیا جو 106 مقامات تے سڑکاں دی بندش کوں بروقت اقدامات نال بحال کر ݙتا ڳئے۔ اجلاس کوں ݙسایا ڳیا جو وزارتِ آئی ٹی ولوں نیشنل ایمرجنسی تے ٹیلی کمیونیکیشن سینٹر فعال اے، کہیں وی موبائل فون توں ہنگامی صورتحال اچ مدد دی کال تے فوری طور تے ریسکیو 1122 فعال تھی تے ریسکیو تے ریلیف اقدامات کیتے موقع تے پڄدی اے۔ دریں اثناء وزیرِ اعظم کوں بریفنگ اچ ݙسایا ڳیا جو مون سون دے دوران برساتی پاݨی کوں سٹور کرݨ کیتے ملک دے مختلف مقامات تے 700 مقامات دی نشاندہی کیتی ڳئی اے تانجو خشک موسم دے دوران او پاݨی زراعت کیتے استعمال کیتا ونڄ سڳے۔ وزیراعظم این ڈی ایم اے، پی ڈی ایم ایز، صوبائی حکومتاں تے تمام متعلقہ اداریاں دی حالیہ مون سون دی پیشگی اطلاعات، تیاری تے ریسکیو و ریلیف دے اقدامات تے پذیرائی کیتی۔ اجلاس اچ وفاقی وزراء خواجہ محمد آصف، پروفیسر احسن اقبال، اعظم نذیر تارڑ، ڈاکٹر مصدق ملک، رانا تنویر حسین، محمد اورنگزیب، انجینئر امیر مقام، عطاء اللہ تارڑ، شزہ فاطمہ خواجہ، سردار اویس خان لغاری، میاں محمد معین وٹو، مشیرِ وزیراعظم رانا ثناء اللہ، چیئرمین این ڈی ایم اے لیفٹیننٹ جنرل انعام حیدر ملک اتے متعلقہ اعلیٰ حکام شرکت کیتی۔