یومِ استحصالِ کشمیر، صدرِ مملکت، وزیراعظم تے نائب وزیراعظم دا کشمیری عوام دے منصفانہ نصب العین کیتے پاکستان دی مسلسل سیاسی، سفارتی تے اخلاقی حمایت دا اعادہ

اسلام آباد۔ 5 اگست (اے پی پی) حکومتِ پاکستان تے پاکستانی عوام بھارت دے غیر قانونی زیرِ تسلط جموں تے کشمیر اچ 5 اگست 2019ء دے بھارت دے غیر قانونی تے یکطرفہ اقدامات دے 7 سال مکمل تھیوݨ دے موقع تے بدھ کوں یومِ استحصال منایا اتے کشمیری عوام دے نال پاکستان دی غیر متزلزل یکجہتی تے انھاں دے ناقابلِ تنسیخ حقِ خودارادیت کیتے آپݨی غیر متزلزل حمایت دا اعادہ کیتا۔ دفترِ خارجہ دے مطابق یومِ استحصال دے موقع تے آپݨے سنیھے اچ صدرِ مملکت، وزیراعظم تے نائب وزیراعظم تے وزیرِ خارجہ کشمیری عوام دے منصفانہ نصب العین کیتے پاکستان دی مسلسل سیاسی، سفارتی تے اخلاقی حمایت دا اعادہ کریندیں ہوئیں ایں گالھ تے زور ݙتا جو تنازعہِ جموں تے کشمیر دا اقوامِ متحدہ دی سلامتی کونسل دی متعلقہ قرارداداں تے کشمیری عوام دی خواہشاں دے مطابق حل تھیوݨا چاہیدے۔ پاکستانی قیادت ایں عزم دا اعادہ کیتا جو پاکستان ہر بین الاقوامی فورم تے مسئلہِ کشمیر کوں بھرپور انداز اچ اجاگر کریندا رہسی۔ انھاں آکھیا جو بھارت دے 5 اگست 2019ء دے یکطرفہ اقدامات جموں تے کشمیر دی بین الاقوامی سطح تے تسلیم شدہ متنازعہ حیثیت کوں تبدیل نئی کر سڳدے۔ ایں موقع تے نائب وزیراعظم تے وزیرِ خارجہ اقوامِ متحدہ دے سیکرٹری جنرل دے نام ہک خط وی ارسال کیتا جئیں اچ انھاں کوں بھارتی غیر قانونی زیرِ تسلط جموں تے کشمیر دی تازہ ترین صورتحال توں آگاہ کریندیں ہوئیں اقوامِ متحدہ دیاں متعلقہ قرارداداں تے عملدرآمد کیتے نوی کوششاں دی ضرورت تے زور ݙتا تانجو جموں و کشمیر دی عوام آپݨے حقِ خودارادیت دا آزادانہ استعمال کر سڳن۔ ایں موقع تے سیکرٹری خارجہ دی قیادت اچ اسلام آباد اچ یکجہتی واک دا انعقاد کیتا ڳیا جئیں اچ وزارتِ خارجہ دے افسراں تے ٻیاں حکام شرکت کیتی۔ پاکستان دے بیرونِ ملک سفارتی مشنز وی پاکستانی تے کشمیری تارکینِ وطن دے تعاون نال مختلف تقریبات دا انعقاد کیتا۔