سکیورٹی فورسز دی بلوچستان اچ فتنۃ الہندوستان دے دہشت گرداں دے خلاف کارروائیاں، 11 ہلاک

راولپنڈی۔ 09 ستمبر (اے پی پی) سکیورٹی فورسز صوبہ بلوچستان دے اضلاع خاران تے واشک اچ بھارتی پراکسی فتنۃ الہندوستان دے دہشت گرداں دے خلاف کارروائیاں دے دوران 11 دہشت گرداں کوں ہلاک کر ݙتے۔ بدھ کوں پاک فوج دے شعبہ تعلقاتِ عامہ (آئی ایس پی آر) توں بیان دے مطابق سکیورٹی فورسز 6 تے 7 ستمبر 2026 کوں بلوچستان دے اضلاع خاران تے واشک اچ بھارتی پراکسی فتنۃ الہندوستان نال وابستہ دہشت گرداں دی موجودگی دیاں اطلاع تے انٹیلی جنس بیسڈ آپریشنز کیتے ڄنہاں دے دوران بھارتی سرپرستی اچ سرگرم 11 دہشت گرداں کوں ہلاک کر ݙتا ڳیا، 6 ستمبر کوں دہشت گرداں خاران اچ سڑک بند کر تے مقامی ٹریفک اچ خلل پاوݨ دی کوشش کیتی، سکیورٹی فورسز ویلھے تے کارروائی کریندیں ہوئیں دہشت گرداں کوں روکیا اتے مؤثر انداز اچ نشانہ بݨایا ڄیندے نتیجے اچ بھارتی سرپرستی اچ سرگرم 8 دہشت گرد ہلاک تھئے، 7 ستمبر کوں ہک ٻئی کارروائی دے دوران ضلع واشک اچ دہشت گرداں دی موجودگی دی اطلاع تے منصوبہ بندی دے تحت انٹیلی جنس بیسڈ آپریشن کیتا ڳیا ڄیندے دوران سکیورٹی فورسز دہشت گرداں دے ٹکاݨے کوں مؤثر انداز اچ تباہ کیتا، شدید فائرنگ دے تبادلے بعد 3 دہشت گرد ہلاک کر ݙتے ڳئے۔ سکیورٹی فورسز 2.9 ٹن دھماکہ خیز مواد وی برآمد کیتا ڄینکوں دیسی ساختہ دھماکہ خیز آلات دی تیاری کیتے استعمال کیتا ویندا پیا ہئی، علاقے اچ موجود بھارتی سرپرستی اچ ٻئے دہشت گرداں دے خاتمے کیتے کلیئرنس تے سینیٹائزیشن آپریشنز جاری ہن۔ آئی ایس پی آر آکھیا جو وفاقی ایپکس کمیٹی برائے نیشنل ایکشن پلان دی منظوری نال ’’عزمِ استحکام‘‘ دے وژن دے تحت سکیورٹی فورسز تے قانون نافذ کرݨ آلے اداریاں ولوں ملک توں غیر ملکی سرپرستی تے حمایت یافتہ دہشت گردی دے ناسور دے مکمل خاتمے کیتے بلا امتیاز تے مسلسل انسدادِ دہشت گردی مہم پوری رفتار نال جاری رہسی۔