پائیدار قومی ترقی کیتے تریمتیں کوں بااختیار بݨاوݨ ضروری اے، قائم مقام صدر سید یوسف رضا گیلانی دا پاکستان ویمن لیڈرشپ اینڈ پالیسی سمٹ 2026 نال خطاب

اسلام آباد۔ 09 ستمبر (اے پی پی) قائم مقام صدر سید یوسف رضا گیلانی آکھیا جو پائیدار قومی ترقی کیتے تریمتیں کوں بااختیار بݨاوݨ ضروری اے، پاکستان دی جمہوری طاقت، معاشی ترقی تے سماجی ہم آہنگی ایں ویلھے تئیں مکمل طور تے حاصل نئی کیتی ونڄ سڳدی ڄݙاں تائیں تریمتیں اداریاں، معیشت تے مستقبل دی تشکیل اچ مساوی طور تے حصہ نہ گھنن، مالیاتی ادارے تریمتیں دی مالی معاونت یقینی بݨاون۔ اے ڳالھیں انہاں بدھ کوں اتھاں اسلام آباد چیمبر آف کامرس اینڈ انڈسٹریز ولوں پاکستان ویمن لیڈرشپ اینڈ پالیسی سمٹ 2026 نال خطاب کریندیں ہوئیں کیتا۔ قائم مقام صدر اسلام آباد چیمبر آف کامرس اینڈ انڈسٹری تے تمام شراکت داراں کوں ایں اہم فورم دے انعقاد تے خراجِ تحسین پیش کریندیں ہوئے آکھیا جو سمٹ ݙو ناگزیر قومی ترجیحاں، تریمتیں دی قیادت تے موثر عوامی پالیسی کوں یکجا کریندے۔ انہاں آکھیا جو ملک دی بھرپور معاشی صلاحیت بروئے کار گھن آوݨ کیتے اے یقینی بݨاوݨا ہوسی جو تریمتیں صرف ترقی توں مستفید تھیوݨ آلیاں نہ ہوون ٻلکہ کاروباری شخصیتاں، پیشہ ور افراد، پالیسی سازاں، جدت کاراں تے قائدین دی حیثیت نال ایں دی فعال محرک وی ہوون، کہیں وی پس منظر یا علاقے نال تعلق رکھݨ آلی تریمت کوں تعلیم، مالی وسائل، ٹیکنالوجی، منڈیاں تے فیصلہ سازی تائیں مساوی رسائی حاصل ہووے۔ سید یوسف رضا گیلانی آکھیا جو بینظیر انکم سپورٹ پروگرام دے ذریعے مالی معاونت براہِ راست تریمتیں دے ہتھاں اچ پڄاوݨ نال گھراں دے اندر معاشی فیصلہ سازاں دے طور تے انہاں دے کردار کوں تقویت ملی، اے باوقار معاونت تے انحصار توں بااختیاری دی پاسے تبدیلی دی نمائندگی کریندے۔ انہاں تریمتیں دی مساوی شرکت، تحفظ تے قیادت دی اہمیت تے زور ݙیندے ہوئیں آکھیا جو تریمتیں کوں بااختیار بݨاوݨ کوئی محدود سماجی فکرمندی نئی ٻلکہ اے قومی ترقی کیتے مرکزی حیثیت رکھیندے۔ انہاں زور ݙتا جو مالی وسائل تئیں رسائی، ڈیجیٹل شمولیت، تریمتیں دی زیرِ قیادت کاروبار، محفوظ کم دیاں جھیں، قیادت دی ترقی، رہنمائی تے مضبوط مارکیٹ روابط تے توجہ مرکوز کریندیں ہوئیں ہک عملی ایجنڈے کوں اڳوں ودھاوݨ اچ ساریاں کوں آپݨا کردار ادا کرݨا ہوسی۔ قائم مقام صدر آکھیا جو تعلیمی اداریاں کوں متعلقہ مہارتاں فراہم کرݨی پوسن۔قائم مقام صدر پاکستان ویمن لیڈرشپ اینڈ پالیسی سمٹ 2026 دی کامیابی کیتے نیک تمناواں دا اظہار کیتا۔ ایں موقع تے قائم مقام صدر سید یوسف رضا گیلانی اسلام آباد چیمبر آف کامرس اینڈ انڈسٹری دے نمایاں ارکان اچ شیلڈز تے سنداں تقسیم کیتیاں۔ قائم مقام صدر کوں اسلام آباد چیمبر آلے پاسے شیلڈ پیش کیتی ڳئی۔