وزیرِ خزانہ نال اے سی سی اے دے وفد دی ملاقات، افرادی قوت، آئی ٹی تے ایس ایم ایز دے ودھارے تے ڳالھ مہاڑ

اسلام آباد۔ 10 ستمبر(اے پی پی) وفاقی وزیرِ خزانہ و محصولات سینیٹر محمد اورنگزیب نال اے سی سی اے (ACCA) دی گلوبل ایگزیکٹو ڈائریکٹر لوسیا ریئل مارٹن دی قیادت اچ وفد ملاقات کیتی، جیندے اچ نجی شعبے دی قیادت اچ معاشی ترقی، پیشہ ورانہ افرادی قوت، آئی ٹی خذمتاں تے ایس ایم ایز دے استحکام کیتے سانجھے تعاون کوں ٻیا تکڑا بݨاوݨ دے عزم دا اعادہ کیتا ڳیا۔ وزیرِخزانہ پاکستان اچ اقتصادی اصلاحات دیاں ترجیحات تے ڳالھ کریندے آکھیا جو حکومت نجی شعبے کوں تکڑا بݨاوݨ تے برآمدات تے مبنی معاشی ترقی کوں ودھارا ݙیوݨ تے کم کریندی پئی اے۔ انہاں آئی ٹی تے آئی ٹی خذمتاں دے شعبے کوں وسعت ݙیوݨ، فائیو جی (5G) دی بہتر رابطہ کاری، تے مصنوعی ذہانت و بلاک چین جیھے جدید شعبیں اچ ہنر مندی تے استعداد کار ودھاوݨ دی لوڑھ تے زور ݙتا۔ وزیرِ خزانہ دا آکھݨ ہئی جو ملک اچ ہنرمند افرادی قوت دی تیاری تے شیئرڈ سروس سینٹرز دے ذریعے زیادہ قدر رکھݨ آلیاں تے علم تے مبنی سرگرمیاں دے پاسے منتقل تھیوݨ ویلھے دی اہم لوڑھ اے، تاں جو عالمی منڈیاں توں موثر فیدہ چاتا ونڄ سڳے۔ اے سی سی اے دی گلوبل ایگزیکٹو ڈائریکٹر لوسیا ریئل مارٹن پاکستان دی معاشی پیش رفت تے ہنر مندی دے ایجنڈے دی حمایت دا اعادہ کیتا۔ انہاں عوامی مالیاتی انتظام، ڈیجیٹلائزیشن، تے ٹیکس انتظامیہ اچ بہتری کیتے حکومت کوں تکنیکی و عملی معاونت ݙیوݨ تے آمادگی دا اظہار کیتا۔ ملاقات اچ چھوٹے تے درمیانے درجے دے کاروباری اداریں (SMEs) کوں مالیاتی وسائل تے بینکنگ سہولتاں تئیں بہتر رسائی ݙیوݨ تے وی ڳالھ تھئی۔ لوسیا ریئل مارٹن “فریکشنل چیف فنانشل آفیسر (CFO)” سروسز دی تجویز ݙتی جیندے تحت چھوٹے ادارے بغیر بھاری لاڳت دے پیشہ ورانہ مالیاتی ماہرین دیاں خذمتاں حاصل کرسڳدن۔ وزیرِ خزانہ ایں تجویز دا خیرمقدم کریندے ایس ایم ایز دی مالیاتی صلاحیت کوں بہتر بݨاوݨ کیتے اے سی سی اے دے نال نیڑے تعاون دی خواہش دا اظہار کیتا۔