وفاقی وزیرآئی ٹی شزہ فاطمہ خواجہ نال گیٹس فاؤنڈیشن دے اعلیٰ سطح دے وفد دی ملاقات

اسلام آباد۔ 10 ستمبر (اے پی پی) وفاقی وزیرانفارمیشن ٹیکنالوجی و ٹیلی کمیونیکیشن شزہ فاطمہ خواجہ نال گیٹس فاؤنڈیشن دے ہک اعلیٰ سطح دے وفد ملاقات کیتی۔ وفد دی قیادت گیٹس فاؤنڈیشن دی گلوبل پالیسی اینڈ ایڈووکیسی ڈویژن دی قائم مقام صدر ڈاکٹر کلپنا کوچہر تے جینڈر ایکویلٹی ڈویژن دی صدر ڈاکٹر انیتا زیدی کریندیاں پیاں ہن۔ ملاقات دے دوران ڳالھ کریندے وفاقی وزیر آئی ٹی شزہ فاطمہ خواجہ حکومت دے فلیگ شپ ’’ڈیجیٹل نیشن پاکستان‘‘ ایجنڈے کوں اجاگر کیتا تے شمولیت تے مبنی ڈیجیٹل ترقی کوں ودھارا ݙیوݨ، پبلک سروس ڈیلیوری کوں جدید بݨاوݨ تے ہک مضبوط ڈیجیٹل معیشت دی تعمیر اچ ایں دے کردار دی وضاحت کیتی۔ انہاں ایں ڳالھ تے زور ݙتا جو ڈیجیٹل طور تے خودمختار پاکستان دے وژن کوں حاصل کرݨ کیتے بین الاقوامی شراکت داریاں، بالخصوص گیٹس فاؤنڈیشن دے نال تعاون اہمیت دا حامل اے۔ وفد اڄوکے سالاں اچ پاکستان دی ڈیجیٹل تبدیلی اچ پیشرفت بالخصوص وزارتِ آئی ٹی دی پاسوں کیتیاں ونڄݨ آلیاں اصلاحات تے اقدامات دی تعریف کیتی ۔ݙوہیں فریقاں آرٹیفیشل انٹیلی جنس (اے آئی)، ڈیجیٹل معیشت، ڈیٹا سسٹمز، ہیلتھ ٹیکنالوجی، مالیاتی شمولیت (فنانشل انکلوژن)، کیپیسٹی بلڈنگ، تے ٹیکنالوجی تے مبنی ترقی دے شعبیں اچ تعاون کوں ٻیا تکڑا کرݨ تے اتفاق کیتا۔